Is sardos e is lìgures s’ant a afrontare sena pensamentos, pro ite totus a is duas iscuadras sunt giai sarvas.

Tzertu, is casteddajos ant proare a bìnchere, pro ite ant a bòlere cungiare bene custu campionadu, massimamente in domo ìssoro, a sa Sardigna Arena.

Tocat a nàrrere chi su Casteddu at a fàghere is tres puntos, diat a pòdere balangiare prus dinare pro ite, in base a sa classificatzione finale prus bona, sa federatzione de su fùbalu natzionale at a donare prèmiu prus mannu. E semus chistionende de una diferèntzia tra is 500 mìgia e 1 millione de èuros.

Dinari chi in custos tempos malos de pandemia ant a fàghere meda comodidade a totus is iscuadras, mescamente pro un’iscuadra minore comente su Casteddu.

In prus unos cantos giogadores ant a bòlere fàghere bella figura, pro lòmpere a is obietivos ìssoro, comente su capitanu Joao Pedro: a duas retes dae su record de gol suo in carriera. Imbetzes àteros diant bòlere fàghere bella figura pro chircare de abarrare in su Casteddu s’annu chi benit puru.

S’allenadore Semplici però diat a pòdere proare calicunu giòvunu o àteros giogadores chi sunt istados pagos impreados in custa istajone.

Seguramente at a èssere una festa pro is tifosos chi ant a tènnere sa possibilidade de intrare a bìdere custa partida, mancari pagos abbonados.

Prima de totu pro festare sa permanèntzia de s’iscuadra in Sèrie A e pro torrare a sa Sardigna Arena. Tzertu, s’ispera de totus at a éssere pro s’istajone benidora chi s’ant a torrare a bìdere is istàdios prenos de gente, pro ite naramus sa veridade, sena su pùblicu no est fùbalu beru.

Ocannu e parte de s’annu coladu, a bìdere is ispaltos bóidos no a fatu piànghere. Duncas pro s’istajone benente, chi amus a torrare a agatare is persones in is istàdios, forsis custa pesta mala de Covid-19 at èssere belle colada.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Dae eris sa Sardigna intrada ufitzialmente in zona groga, duncas cun prus pagas limitatziones pro is tzitadinos, chi in custas chidas ant dèvidu afrontare medas sacrifìtzios.

Ma no est s’ùnica novidade. Difatis eris s’est obiada sa Cabina de règia, e nde sunt essidas a campu detzisiones importantes meda.

Su guvernu at detzìdidu disponimentos noos pro s’òbligu de ritiru, chi dae cando est intradu in vigore est dae is 22 a is 5, oràriu acanta non faghet a essire dae domo si non pro motivu de traballu, netzessidade o de salude.

Dae cras s’oràriu at a fugire a is oras 23, una detzisione chi in medas s’isetaiant, màssimu in custu perìodu chi est cumentzende a callentare e sa gente tenet prus gana de essire pro una passigiada, papare unu geladu o pro chenare foras.

Su testu aprovadu in Consìgiu de is ministros at a dèvere èssere sutapostu a controllu de su capu s’Istadu e a pustis de sa firma de su presidente de sa Repùblica at a dèvere èssere publicadu in Gazeta ufitziale. At a èssere difìtzile duncas chi siat eficatze giai dae oe, e duncas s’intrada in vigore diat dèvere èssere mèrcuris.

Ma atentzione: tocat a tènnere a mente una data importante: su 7 de làmpadas. Difatis in cussa die s’oràriu de su ritiru at a passare a mesunote e, solu pro is regiones chi ant a intrare a zona bianca, at a bènnere eliminadu.

Meda acapiadu a su ritiru est su càmbiu de is paràmetros pro istabilire is colores is Regiones. Difatis su Rt, s’ìnditze de ispàinu de sa cundidura, no at a èssere prus determinante: ant a contare su tassu de ocupatzione de terapias intensivas e repartos ordinàrios – su Rt ospedalieru, chi in s’ùrtimu còmpudu fiat a 0,78 – e su pesu de is casos. Cun 250 ogna 100 mìgia abitantes s’andat in zona ruja, cun 150-250 in zona arantzu e cun 50-150 in zona groga.

Duncas cun prus pagu de 50 casos in 3 chidas consecutivas e un’arriscu bassu s’at a andare diretamente in fàscia bianca. In custa zona su ritiru at a bènnere abolidu.

Intre is regiones chi diant pòdere tènnere custos paràmetros ddoe est sa Sardigna.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”