Dae eris sa Sardigna intrada ufitzialmente in zona groga, duncas cun prus pagas limitatziones pro is tzitadinos, chi in custas chidas ant dèvidu afrontare medas sacrifìtzios.

Ma no est s’ùnica novidade. Difatis eris s’est obiada sa Cabina de règia, e nde sunt essidas a campu detzisiones importantes meda.

Su guvernu at detzìdidu disponimentos noos pro s’òbligu de ritiru, chi dae cando est intradu in vigore est dae is 22 a is 5, oràriu acanta non faghet a essire dae domo si non pro motivu de traballu, netzessidade o de salude.

Dae cras s’oràriu at a fugire a is oras 23, una detzisione chi in medas s’isetaiant, màssimu in custu perìodu chi est cumentzende a callentare e sa gente tenet prus gana de essire pro una passigiada, papare unu geladu o pro chenare foras.

Su testu aprovadu in Consìgiu de is ministros at a dèvere èssere sutapostu a controllu de su capu s’Istadu e a pustis de sa firma de su presidente de sa Repùblica at a dèvere èssere publicadu in Gazeta ufitziale. At a èssere difìtzile duncas chi siat eficatze giai dae oe, e duncas s’intrada in vigore diat dèvere èssere mèrcuris.

Ma atentzione: tocat a tènnere a mente una data importante: su 7 de làmpadas. Difatis in cussa die s’oràriu de su ritiru at a passare a mesunote e, solu pro is regiones chi ant a intrare a zona bianca, at a bènnere eliminadu.

Meda acapiadu a su ritiru est su càmbiu de is paràmetros pro istabilire is colores is Regiones. Difatis su Rt, s’ìnditze de ispàinu de sa cundidura, no at a èssere prus determinante: ant a contare su tassu de ocupatzione de terapias intensivas e repartos ordinàrios – su Rt ospedalieru, chi in s’ùrtimu còmpudu fiat a 0,78 – e su pesu de is casos. Cun 250 ogna 100 mìgia abitantes s’andat in zona ruja, cun 150-250 in zona arantzu e cun 50-150 in zona groga.

Duncas cun prus pagu de 50 casos in 3 chidas consecutivas e un’arriscu bassu s’at a andare diretamente in fàscia bianca. In custa zona su ritiru at a bènnere abolidu.

Intre is regiones chi diant pòdere tènnere custos paràmetros ddoe est sa Sardigna.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Erisero amus bidu comente fiat sa situatzione in Aristanis, s’antiga capitale de su Giuigadu de Arborea.

Semus andados a bìdere comente sa gente at pigadu custa detzisione, isetada dae paritzu tempus.

Tocat a nàrrere chi su lunìs est una die de traballu e duncas est una cosa crara chi is carreras non podiant èssere prenas de gente. Però cussu chi nos at prenadu su coro, est istadu chi in fines amus bidu is mesas e is cadreas de is tzilleris e de is recreos in foras, cun òmines e feminas papende e bufende.

Custu est pròpiu unu bellu messàgiu pro is meres de is atividades cummertziales pro su tempus benidore e at a donare coràgiu sa populatzione sarda disigiosa de torrare a sa normalidade, massimamente is imprendidores de su setore de sa retzidura, giai iscambados dae is chidas coladas in zona ruja e arantzu e provados dae is efetos malos causados dae sa pandemia.

Ph: Roberto Anedda

Isperamus chi tra prus pagu de unu mese – comente ant naradu is espertos – chi sa Sardigna potzat torrare in zona bianca.

A bìdere is cussos caminos de sa tzitade, chi ocannu no ant bidu sa Sartìglia, nos at fatu ammentare sa calada de su capu-cursa cando poderat in sa manu sa pipia de maju, su dòpiu iscetru de violas prenu significados.

E torrat a mente sa giostra de caddos de su 2020. S’annu coladu sa manifestatzione fiat renèssida bene a beru, cun unu pùblicu in festa chi aiat acudidu a tropa pro assìstere a s’antiga cursa a caddu de carrasegare.

Ph: Roberto Anedda

Eris Aristanis s’est fata agatare pronta e cortesa, cun sa matessi bellesa medievale incantosa de semper.

Difatis in medas sunt aprontende is butegas pro s’arribbu de is turistas. In sa costera de Aristanis puru, amus bidu chi sunt cumintzende a assetiare is locales pro s’istajone istadiale.

Ph: Roberto Anedda

Sa bellesa de is plajas e is colores bellos de su mare in custu mese de maju, nos at prenadu su coro de felitzidade. Ogni bìculu de custa cussòrgia tenet calicuna cosa chi mèritat de èssere bida.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”