Is ruju-blu sunt sarvos in manera matemàtica gràtzias a su parègiu de su Crotone cun su Benevento e a San Siro firmat su Milan a su 0-0.

Unu gol de s’atacante de su Crotone, marcadu dae su nigerianu Simy, chi firmat su Benevento a su 1-1, at regaladu sa sarvesa matemàtica in Sèrie A a su Casteddu.

Is giogadores e is tècnicos sardos ant festadu noa in is càmeras de s’albergo, pagu a in antis de sa partida contra su Milan a San Siro.

Una bera impresa isportiva cussa de is òmines de Semplici, chi finas a calicuna chida a oe pariant cundennados a nche rùere in Sèrie B.

De seguru, artèfitze mannu de s’impresa est istadu s’allenadore toscanu, capatzu de furriare una situatzione lègia comente sa chi aiat agatadu a pustis de s’esòneru de Di Francesco.

Printzipiende unu traballu fitianu, mescamente psicològicu cun is giogadores, est resèssidu a fàghere iscatare in s’iscuadra gana un’incredìbile de bìnchere, essida a pìgiu durante sa partida contra su Parma.

Mancari su bonu resurtadu isportivu, is casteddajos ant bòlidu onorare campionadu finas a s’ùrtimu. Contra Milan assustadu, is sardos giai sarvos e a mènte sèlia, ant afrontadu su disafiu cun trancuillidade, faghende timoria, e non pagu, a is ruju-nieddos.

S’iscuadra de Pioli s’est bida petzi cun is tiros dae foras de Saelemaekers, parados dae Cragno, e Calàbria, foras. Cussa de Semplici, imbetzes, at proadu a torrare a partire, in su primu tempus, cun duos sarvamentos de Kjaer, mentras in sa ripresa duos corfos de conca sunt istados firmados dae unu miraculosu Donnarumma: prima prontu cun Pavoletti, posca si nch’est iscutu a pitzu de su casteddaju Godin.

A nudda sunt serbidos is càmbios de Pioli, cun Castillejo ebbia chi s’est rèndidu perigulosu, ma sena pretzisione.

Milan-Casteddu s’est serrada duncas 0-0, e pro sa Copa de is Campiones at a èssere un’ùrtima die de coros fortes, cun Juve, Napoli e ruju-nieddos ancora in cursa pro duos postos

Su Casteddu imbetzes at a serrare s’ùrtima die contra su Genoa de s’ex Ballardini, cun sas duas iscuadras serenas pro sa permanèntzia in Sèrie A.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Si provat a torrare a sa vida de prima, cun s’arribu custa istade in Sardigna de cantantes famados de su panorama internatzionale.

Unu messàgiu bellu de isperu cun sa mùsica in is pratzas e in is istàdios, cosa chi dae un’annu est mancada a totus. In prus unu modu pro fàghere mòvere su mundu de s’ispetàculu, cun is traballadores chi sunt firmos dae prus de un’annu e sena istipèndiu. Comente medas artistas ant naradu dae su palcu de su cuntzertu de su su 1 maju, serbit un’agiudu cuncretu dae banda de su guvernu e règulas noas pro torrare a cumentzare e evitare de si torrare a firmare unu incras.

Comente si siat in s’Ìsula calicuna cosa comintzat a si mòvere, cun is programmas de is cartellos chi si sunt definende.

A custu propòsitu faghet meda pràghere chi a su Fèstival Dromos, su 3 de austu a Aristanis at a arribbare Noa.

Sa cantante israeliana at a èssere una de is istellas de sa manifestatzione in programma tra s’agabbu de mese de argiolas e da metade de austu in custa tzitade e in àteros tzentros de sa provìntzia.

S’organizatzione aiat giai annuntziadu sa presèntzia de Niccolò Fabi, chi at a cantare a Fordongianus s’8 austu. Su cartellone de sa manifestatzione at in custas dies.

A su chi s’ischit at a èssere sa pratza Crèsia majore a acasagiare su cuntzertu de sa cantante israeliana de orìgine jemenita, cumposidora, percussionista, oradora e ativista internatzionale. Is postos ant a èssere limitados e istesiados, segundu is normas anticovid.

Noa, nùmene de arte de Achinoam Nini, durante su giru istiale italianu, at a cantare in biu e at a èssere acostagiada dae su chiterrista Gil Dor, pro presentare s’ùrtimu progetu discogràficu suo, su primu totu in crae jazz: “Afterallogy”, registradu durante is meses de acorru in s’istùdiu de domo de sa cantante israeliana e publicadu su 30 de abrile coladu, cun presentada ufitziale sa die in fatu in direta dae de s’aeroportu de Tel Avìv.

Paris cun Noa, boghe e percussiones, e Gil Dor chiterra e diretzione musicale, in su cuntzertu de Aristanis, una setzione rìtmica formada dae Or Lubianiker a su bassu elètricu e dae Gadi Seri a is percussiones.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”