Mancat pagu a torrada de su coete tzinesu Long March 5B.

Is ùrtimas previsiones ponent sa ruta de su mòdulu in s’atmosfera terrestre tra s’8 e su 9 maju. Sa ventana temporale est galu ampra meda, gasi comente s’àrea interessada in modu potentziale dae s’impatu.

Sunt medas is variàbiles chi podent modificare s’òrbita de su coete, ma cun su colare de is oras is càrculos s’ant a fàghere prus pretzisos. Dae su chi s’ischit, fintzas s’Itàlia tzentrumeridionale – cumprèndida sa Sardigna – diat pòdere èssere interessada dae sa torrada de iscàndulas de Long March 5B.

Su coete est istadu iscutu dae sa Tzina su 29 e abrile coladu cun sa fine de giùghere in sa bassa òrbita terrestre unos cantos cumponentes de s’istatzione ispatziale tzinesa benidora. Totu su combustìbile est istadu impreadu pro sa missione: non podende prus èssere ghiadu, immoe su lantziadore de 21 tonnelladas est torrende a rùere in Terra in modu incontrolladu. Is espertos chi lu sunt compidende unu pagu in totu su mundu pensant chi sa torrada potzat acontèssere tra note de s’8 e de su 9 de maju.

S’àrea de su praneta chi diat pòdere èssere interessada dae s’impatu est cussa tra is 41,5 grados N e 41,5 grados S, una fàscia manna meda e pobulada chi cumprendet fintzas s’Itàlia, est a nàrrere is regiones a sud de Roma.

In s’ora sa Protetzione Tzivile regionale sarda at ispainadu unos cantos inditos ùtiles a sa populatzione de is territòrios in manera potentziale espostos a s’impatu, pro more chi leet in manera responsàbile cumportamentos de autoprotetzione.

Prus che totu si racumandat de istare a tesu de ventanas e bidros, de si pònnere in is puntos prus fortes de sa domo e de non tocare eventuales bucones de su coete chi deverent lòmpere a terra. Si consìgiat difatis a chie si siat abbistaret unu canteddu de su mìssile, de si mantènnere a una distàntzia de a su mancu 20 metros e de ddu signalare deretu a is autoridades cumpetentes. Difatis in su coete est presente una sustàntzia meda corrosiva, tosconosa e cancerògena: s’idrazina.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su ministru de sa Salude, Roberto Speranza at firmadu is ordinàntzias a pustis de su còmpudu de cada chida de s’Iss-ministeru de sa Salude: bona parte de s’Itàlia abarrat in àrea groga.

A is territòrios chi giai s’agatant in sa fàscia a bàsciu arriscu si nd’agiunghent àteros tres. Sa Sitzìlia e sa Sardigna abarrant in colore de arantzu, a sa matessi bentina colat sa Badde de Aosta chi duncas no est prus ruja.

Sa permanèntzia de sa Regione sarda in sa zona arantzu, mancari megioramentu de su cuadru epidemiològicu chi est cumpatìbile cun sa fàscia de arriscu groga, at fatu infadare su presidente Christian Solinas.

Su guvernadore at faeddadu in modu craru de s’inadeguadesa de su sistema de classificatzione atuale e de una situatzione paradossale, bidu chi s’ìnditze de contàgiu R(t) est a 0,74 – su prus bàsciu de Itàlia -.

In prus, comente at torradu a nàrrere Solinas, sa detzisione de Roma non prèmiat is sacrifìtzios de is sardos e mancu s’impignu de totu is fortzas in campu contra su Covid.

De sa pròpiu idea s’assessore regionale de sa Sanidade, Mario Nieddu, chi at sutaliniadu comente sa regione siat istada penalizada meda dae custa detzisione de su Ministru, non cunsiderende s’atuale cuadru generale fintzas pro more de su nùmeru artu de vatzionatziones, chi sighit a crèschere.

At afirmadu puru chi s’Ìsula e totu su Paisu non podent abarrare acapiados a unu sistema chi ponet fatu a virus e chi no est capatzu de rispòndere a is netzessidades de cuntenimentu de sa pandemia, cun resurtados farsados non prus sustenìbiles.

Nieddu pedit sa revisione lestra de su sistema de classificatzione, màssimu in bista de s’istajone istiale. Fintzas ca, comente at bòlidu ammentare s’assessore, s’apretu no est petzi sanitàriu, ma fintzas econòmicu e sotziale.

Una cosa est segura, custa detzisione est istada leada in pitzu de sa pedde de is medas imprendidores sardos de su setore de sa retzidura, chi de sòlitu in custu perìodu cumentzaiant a traballare bene.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”