Festa manna eris pro s’Internazionale chi est rèsessidu a bìnchere s’iscudetu nùmeru deghennoe de s’istòria sua.

Difatis gratziàs a su parègiu pro 1 a 1 tra Sassuolo e Atalanta, is nieddos-asulos sunt istados decrarados Campiones de Itàlia firmende su podèriu de sa Juventus, chi at bìnchidu pro noe annos de sighidu su màssimu campionadu natzionale de fùbalu.

Is òmines de Antonio Conte si sunt dimustrados is prus fortes e continos cun is resurtados prus de totus is àteros: in su girone de torrada ant superadu is “fradiles” de su Milan e a pustis ddos ant istrombulados pro 3 a 0.

Cuntentu meda pro sa vitòria de su tìtulu italianu su mere de s’iscuadra milanesa, su tzinesu Steven Zhang – primu presidente istràngiu a bìnchere in Sèrie A – chi pro s’ocurrèntzia est torradu in tzitade pro festare paris cun is giogadores e tifosos.

Tzertu, no est istada una cosa bella meda cussa chi est capitada in Pratza de su Duomo, in ue prus de trinta mìgias persones si sunt atopadas pro festare sa vitòria de s’iscudetu de is nieddos-asulos. Su Covid-19 non càstiat in cara a nemos e cun custu cumportamentu immoe s’at arriscare àteras cundiduras de custa pesta malaita. Nos preguntamus: fiat pretzisu a festare gosi? Creimus chi sa vida e sa salude de totus balet meda de prus de unu campionadu de fùbalu e tocat a rispetare is régulas gosi comente dd’ant fatu is butegheris chi sunt cungiados e sena traballare.

Su Casteddu imbetzes est rèsessidu a leare unu puntu contra su Napoli in s’istàdiu Diego Armando Maradona. A pustis de una partida istragosa meda pro is ruju-blu,su resurtadu est istadu de 1-1, cun is partenopeos chi ant fatu su primu gol gratziàs a Osimhen, e is casteddajos ant paregiadu a coa de sa partida – 94′ minutu – cun s’argentinu Nandez.

Immoe pro is sardos at a èssere importante meda, a bìnchere a ogna còstitu sa gara de sa giorronada benente contra su Benevento. In s’istàdiu Vigorito at a èssere unu beru isparégiu pro si sarbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa partida contra su Napoli, pro su Casteddu at a èssere un’àtera partida istragosa meda chi is sardos ant a proare a bìnchere.

Oramai mancant 5 giorronadas de campionadu cun 15 puntos a disponimentu, cun su Crotone e su Parma foras dae is giogos, pro pòdere abarrare in Sèrie A. Ant a gherrare fintzas a sa fine pro ddos conchistare – paris a is casteddaios – Benevento, Fiorentina, Spezia e Torino. Su Genoa imbetzes, chi est prus pagu a in antis de custas iscuadras, parit bellu sarbu.

Sa vitòria cun sa Roma at torradu a indanimare is ruju-blu, ma comente at naradu s’allenadore Leonardo Semplici, su caminu est galu longu e istragosu.

Pro cussu in sa partida benente is sardos ant a dèpere abarrare ùmiles comente in is garas coladas e semper cun sa gana de gherrare in paris finas a s’ùrtimu.

Tzertu, màssimu rispetu pro su Napoli e, ma est a no ddi tìmere, mancari is partenopeos siat una de is iscuadras prus balentes de Sèrie A. In porta pro is ruju-blu est cunfirmadu su segundu portieri Vicario o su titulare Cragno, corpidu dae su Covid-19 e chi est curadu dae pagu? Amus a bìdere in is dies benentes.

Cosa importante, pro is sardos in campu seguramente s’at a torrare a bìdere su tzentrucampista Nainggolan, a pustis de sa giorronada de iscualìfica. Cussos chi ant a mancare ant a èssere:su regista Marin – pro iscualìfica -, Rog – infortunadu dae tempus meda – e Sottil – chi no est galu curadu dae s’ingollidura-.

Is chi ant a podere fàghere sa diferèntzia ant a èssere de seguru is atacantes Pavoletti e Joao Pedro, ma contra su Napoli at a èssere importante meda a non chistire gol. Duncas is tres difensores, Carboni, Godin e Ceppitelli, ant a dèpere fàghere de totu pro firmare is atacantes campanos.

Is tifosos sardos si diat cuntentare peri de unu puntu ebbia, pro ite sa gara prus importante, chi tocat a bìnchere a ogna còstitu, est cussa de sa chida a pustis contra su Benevento.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”