Bonas noas pro su cuntzertu de su Primu de Maju, s’eventu organizadu dae is tres siglas sindacales italianas prus importante – CGL, CISL e UIL – pro sa Festa de is Traballadores.

Difatis ocannu s’at a torrare a fàghere totu a pitzu de unu palcu, a su Cavea dell’Auditorium Parcu de sa mùsica de Roma in biu, a diferèntzia de s’annu coladu cando medas artistas ant cantadu dae domo in collegamentu internet.

Tzertu custa borta puru pro more de is limitatziones pro sa pesta de su Covid-19, is artistas non s’ant a mustrare dae in antis a unu muntone de gente in festa e su pùblicu at a pòdere assìstere su matessi dae domo. Duncas a custu atòbiu, chi dae prus de trint’annos est in su coro de is italianos, no ant a podere acudire is giòvanos comente e semper.

Sa manifestatziones at a bantare sa presèntzia de is nùmenes prus famados de sa mùsica natzionale e su cantante inglesu Noel Gallagher – tra is prus balentes de su mundu -.

Sa direta de su cuntzertu at a cumintzare dae is 16.30 e at a acabbare a is 24, trasmìtida in is canales televisivos Raitre, e RaiPlay – intramesu su Tg3 e su Tgr – e in prus at a èssere mandadu in cuntemporànea fintzas in is frecuèntzias de Radio2.

Is condutores ant a èssere Ambra Angioini – pro sa de bator bia de sighidu -, Stefano Fresi e su còmicu romanu Lillo Petrolo.

Sa maratona musicale at a tènnere diretas dae àteros palcos puru, comente dae Pratza Giovanni in Roma – acanta s’est semper fata -.

Ma chie ant a èssere totu is artistas presentes chi s’ant a esibire cras?

Custa sa lista: Venditti, Noel Gallagher, Alex Britti cun Flavio Boltro, Après La Classe cun Sud Sound System, Balthazar, Edoardo Bennato, Bugo, Chadia Rodriguez ft. Federica Carta, Colapesce Dimartino, Coma_Cose, Enrico Ruggeri, Ermal Meta, Extraliscio, Fabrizio Moro con Vinicio Marchionni e Giacomo Ferrara, Fasma, Fast Animals and Slow Kids cun Willie Peyote, Fedez, Folcast, Francesca Michielin, Francesco Renga, Gaia, Ghemon, Gianna Nannini e Claudio Capéo, Ginevra, Gio Evan, Il Tre, l’Orchestraccia, La Rappresentante di Lista, Lp, Madame, Mara Sattei, Max Gazzè cun The Magical Mystery Band, Michele Bravi, Modena City Ramblers, Motta, Nayt, Noemi, Orchestra Multietnica di Arezzo con Magherita Vicario, Piero Pelù, The Zen Circus, Tre Allegri Ragazzi Morti, Vasco Brondi e Wrongonyou.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In Ìndia s’apretu Covid est semper prus drammàticu, cun 3645 detzessos in is ùrtimas 24 oras.

Dae su cumintzu de sa pandemia is contàgios sunt prus de 18 milliones e is mortos prus de 200 mìgia, mancari is espertos narant chi custu datu siat sutastimadu, sende chi is persones chi ant pèrdidu sa vida a càusa de su virus diant èssere a su mancu 5 bias de prus de su nùmeru ufitziale. Difatis diant mancare a s’apellu is biddas de su sartu e in unas cantas istruturas sanitàrias non benint fatos is controllos subra de is càusas de morte de is malàidos.

A influire subra custa grave situatzione est istada una mudadura de su virus, mutida variante indiana – B. 1.617 – e is numerosas tzerimònias acanta creant grandu ammuntonamentos de persones, prus che totu in is oros de su riu Gange. Tocat a nàrrere chi in su Paisu asiàticu non s’agatat prus s’ossìgenu, fundamentale pro su tratamentu de is positivos a su Coronavirus, e mancat sa linna pro brusiare is mortos fatu de is caminos. Difatis is furros crematòrios istatales non resessent a ismartire su grandu nùmeru de mortos de ogna die.

Peri in Europa si timet pro s’ispàinu de sa variante indiana, difatis dae pagu est istadu cumproadu calicunu casu riferìbile a sa mudadura de su virus in unos cantos istados, tra custos fintzas s’Itàlia.

Dae una banda s’Unione Europea e àteros Paisos tenende da manu a s’Ìndia – produtore prus de vatzinos a su mundu a in antis de Covid – e dae s’àtera sunt limitende is arribos dae unas cantas natziones de su continente asiàticu.

Bastat a pensare a s’ordinàntzia de su Ministru de sa Salude italianu Speranza, chi cun un’ordinàntzia at blocadu s’intrada in su territòriu natzionale a chie siat istadu in is ùrtimas 14 dies in Ìndia e in Bangladèsh – fintzas petzi de passàgiu -. Dae custos paisos podent intrare in Itàlia petzi persones residentes in Itàlia, a pustis de una recherta a su Ministeru a su mancu 48 oras prima e a pustis devent restare in cuarantena 14 dies.

Giustu eris est arribbadu un’aeroplanu dae Noa Dehli cun 213 passigeris prus 10 cumponentes de s’echipàgiu e de custos sunt resurtadas 23 persones positivas a su Covid-19.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”