Mèrcuris, su 28 de abrile a ora de is 11 in s’Àula de su Consìgiu regionale de sa Sardigna ant cumentzare is tzelebratziones de “Sa Die de sa Sardigna”.

Is traballos ant a èssere abertos dae su presidente de su Consìgiu regionale Michele Pais. Ant a sighire: sa relatzione de Antonello Angioni (Cumponente de su Comitadu pro Sa Die de sa Sardigna) a su tìtulu “Sa Die 2021: Riflessiones tra Sardidade e Istòria” e is interventos de is Presidentes de is Grupos contziliares.

Su grupu musicale Tazenda at intonare s’innu sardu “Procurade de moderare”. Sas tzelebratziones ant a èssere serradas dae su Presidente de sa Regione Christian Solinas.

Fintzas ocannu pro more de s’apretu sanitàriu sa festa at a èssere tzelebrada cun unu nùmeru de partetzipantes limitadu. Pro difùndere s’eventu a foras de s’Àula contziliare est istada aparitzada sa direta internet chi at a èssere trasmìtida in su giassu istitutzionale de su Consìgiu regionale.

Ma ite est Sa Die de sa Sardigna? Est sa festa de su pòpulu sardu, chi ammentat sa rebellia populare de su 28 de abrile 1794 chi nche aiat bogadu dae Casteddu is Piemontesos e su vitzeré Balbiano, a pustis chi su guvernu torinesu no aiat iscurtadu is rechertas de s’ìsula.

Is Sardos pediant chi esserent riservadas a issos is càrrigas tziviles e militares e prus autonomia respetu a is detzisiones de sa classe dirigente locale.

Su guvernu piemontesu aiat naradu chi nono a ogna recherta, pro custu sa burghesia tzitadina, cun s’agiudu de su restu de sa populatzione, aiat iscadenadu su movimentu insurretzionale.

A parte custu, is sardos fiant iscronnosos pro ite cando sa flota frantzesa in su 1793 aiat chircadu de ocupare s’ìsula de Carluforti e de isbarcare a Casteddu, is piemontesos belle si fiant difèndidos a solos, e s’isetaiat unu reconnoschimentu dae su guvernu sabàudu.

A nde betare su noe fiat istadu s’arrestu ordinadu dae su vitzeré de duos capos de su partidu patriòticu, is abogados casteddajos Vincenzo Cabras e Efisio Pintor. Su fatu fiat acontèssidu pròpiu su 28 abrile de su 1794: sa populatzione afelonada aiat detzìdidu de nche bogare dae sa tzitade su vitzeré Balbiano e totu is Piemontesos, chi in su mese de maju s’annu etotu fiant istados imbarcados a truba e incumandados foras de s’ìsula. Indanimados dae su chi fiat sutzèdidu a Casteddu, is abitantes de S’Alighera e Tàtari aiant fatu ateretantu, faghende cumentzare sa Sarda Rivolutzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu est resèssidu a bìnchere contra sa Roma puru, duncas at conchistados àteros tres puntos e immoe est prus de un’isperàntzia sa de abarrare in Sèrie A.

Is òmines de Semplici ant cassadu is grogu-rujus, gràtzias a su resurtadu de 3-2 cun is gol pro is meres de domo de Lykogiannis, Marin e Joao Pedro. Duas retes pro is istràngios marcadas dae Perez.

Cun custa vitòria, is sardos immoe ant segudadu in classìfica su Benevento e su Torino a 31 puntos, e sunt a duos puntos dae su Spezia e a tres dae sa Fiorentina. Custas ant a èssere is iscuadras chi s’ant a giogare sa permanèntzia in su màssimu campionadu natzionale finas a s’ùrtima giorronada.

Tocat a nàrrere chi una pariga de chidas a oe, is casteddajos fiant cun medas puntos a coa dae is àteras iscuadras, e sa partida bìnchida contra su Parma at dadu una furriada – pro immoe bona – a s’istajone.

S’allenadore de su Casteddu, òmine sàbiu e abituadu a sa “gherra” pro abarrare in Sèrie A, at naradu chi at a sighire cust’àndala e a èssere semper ùmile finas a sa fine.

Ma e ite est cambiadu in sa conca de is giogadore ruju-blu? Seguramente in custas ùrtimas partidas s’est bidu un’àteru ispìritu, cun prus gana de gherrare in paris e prus “malesa” isportiva.

De custu grandu mèritu ddu tenet s’iscuadra tècnica de s’allenadore nou Semplici, chi at pigadu su postu de Eusebio Di Francesco.

Domìniga is sardos ant a èssere in campu a Napoli contra s’iscuadra partenopea, chi est gioghende∙si sa possibilidade de si cualificare in sa Liga Europea de is Campiones.

Pro is casteddajos at a èssere una partida istragosa meda, pro ite is asulos sunt un’iscuadra forte meda, bastat a remonare calicunu campione famadu comente, in difesa a Koulibaly, in su tzentru-campu a Fabian Ruiz e in s’atacu Insigne, Mertens e Osimhen.

Su Casteddu si diat cuntentare peri de unu puntu ebbia, pro ite sa gara chi tocat a bìnchere est cussa de sa chida a pustis contra su Benevento, acanta at a èssere proibidu a pèrdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”