A su chi paret sa Regione Sardigna at a abarrare in zona ruja.

Custa est sa detzisione chi diat àere pigadu su Ministeru de sa Salude paris cun s’Istitutu Superiore de sa Sanidade.
A nudda est serbidu si s’ìnditze de cundidura R(t) est caladu a su 0,97% ,chi at a bòlere nàrrere chi s’Ìsula tenet sa matessi situatzione de contàgiu de is àteras regiones de s’Itàlia.

Ma tando, pro ite semus abarrados in custa fàscia arta de guàrdia? Dae su chi s’ischit is fogos de s’infetzione de su Coronavirus sunt galu medas, su bellu de 157.

Tzertu, biende is datos podet pàrrere chi s’epidémia in Sardigna siat meda mègius , ma però tocat a sighire a donare cuidadu e a tènnere passèntzia.

S’assessore de sa Sanidade Mario Nieddu – a pustis de àere faeddadu cun su Ministru de sa Salude Roberto Speranza – at ispiegadu chi is datos de custa chida sunt bonos meda, ma sa regione sarda at abarrare ruja pro more de sa situatzione registrada in sa chida dae su 12 a su 18 de abrile.

In custa iscuta de tempus su R(t) fiat a 1,29, duncas artu meda, e segundu is règulas is datos depent èssere bonos pro 14 dies de sìghidu.

Nieddu pro custu at sollitzitadu chi custos paràmetros siant cambiados, pro ite sa Sardigna est “apretada” dae is limitatziones de sa zona ruja.

Sunt colados pagu prus de duos mese dae cando sa Sardigna fiat in zona bianca, e imbetzes immoe at a èssere s’ùnica regione chi at a sighire a abarrare in zona ruja, sende chi totu s’Itàlia est in colore de arantzu o grogu.
Dae lunis, e a su mancu pro un’àtera chida, in s’ìsula diat dèpere abarrare totu is limitatziones prevìdidas pro is àreas rujas.

Tzertu custu no est pròpiu unu bellu messàgiu pro su benidore e no at a indanimare sa populatzione sarda sarda disigiosa de torrare a sa normalidade, massimamente is imprendidores de su setore de sa retzidura – tzilleris e ristorantes – giai iscambados dae is chidas coladas in zona ruja e provados dae is efetos malos causados dae sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A pustis de sa vitòria cun su Parma, su Casteddu torrat a bìnchere a Ùdine.

A sa Dacia Arena, is sardos sunt resèssidos a brincare s’Udinese pro 1-0 gràtzias a unu tiru de rigore realizadu de Joao Pedro a su 10’minutu, pro more de unu tiru faddidu de Molina a pitzu de su defensore ruju-blu Carboni.

Su brasilianu at iscutu sa botza bia su palu de su portieri biancu-nieddu Mussu, chi però at intzertadu s’àngulu giustu, ma su tiru fiat forte e pretzisu a beru.

Est istada una partida sacrificada meda pro is òmines de Leonardo Semplici, chi contras is friulanos at conchistadu àteros tres puntos – ses in chimbe dies – e in custu modu tenent un’isperàntzia in prus de pòdere sarbare sa permanèntzia in sa màssima sèrie.

Su Casteddu at àpidu duas ocasiones mannas pro marcare gol in su primu tempus: torra cun su capitanu Joao Pedro chi at fatu unu bella rete – chi però s’àrbitru at annulladu – e cun s’atacante Pavoletti chi at pitzigadu unu palu. Ma is meres de domo cun su matzèdone Nestorovsky in su segundu tempus ant proadu a adderetzare sa partida: prima su portieri ruju-blu Vigorito est istadu sarbadu dae sa traversa, e a pustis s’atacante biancu-nieddu no at pitzigadu sa porta mancari dae positzione bona.

Sa vitòria finale est unu triunfu pro is sardos e unu grandu prègiu pro is tifosos casteddajos, chi immoe isperant galu de prus chi s’iscuadra si potzat sarbare dae sa ruta in Sèrie B.

Pro sa partida benente in su retàngulu birde de sa Sardigna Arena, su Casteddu si dd’at a bìdere cun sa Roma.
Is òmines de Fonseca si presentant in s’Ìsula de muta bona, a pustis de su 1-1 contra s’Atalanta. In sa partida chi benit s’at a bìdere si is sardos ant a èssere galu perigulosos e cuntzentradu gosi comente cumandant su presidente Giulini e s’allenadore Semplici.

A is meres de domo at a mancare Nainggolan a tzentru-campu, pro more de una giorronada de iscualìfica, a pustis de unu cartellinu grogu chistidu contra de s’Udinese. Ma mancari sena su belga, is òmines de Semplici ant a dèpere fàghere de totu pro bìnchere, si bolent sìghire a abarrare in su màssimu campionadu de fùbalu natzionale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”