Delusione pro sa Sardigna, a pustis de sa presentada de eris in is Càmeras, dae banda de Mario Draghi, pro su Pianu natzionale de ripresa e resilièntzia.

Difatis in is 336 pàginas no ddoe tenet òperas mannas pro s’Ìsula. Medas imbetzes is investimentos pro su Sud, chi at a retzire 82 de is 248 milliones cumplessivos de su pianu.

Sa Sardigna est sa Regione de su Meridione prus pagu mentovada, difatis su documentu dda chircat solu duas bias, contra is oto de sa Sitzìlia.

Pro nos cumprèndere in su documentu est previstu de estèndere a su Sud is collegamentos ferroviàrios de s’Arta Velotzidade, dae sa Napoli-Bari a sa Palermo-Catania colende pro sa Salerno-Reggio Calabria, totus tratas chi cun is trenos lestros s’ant a pòdere percùrrere in prus pagu tempus.

Pro sa Regione nostra si faeddat petzi de interventos istratègicos “Easy & Smart” in s’istatzione de Aristanis, e de realizatzione de un’ùrtimu mìlliu de rete ferroviària pro collegare Terranoa e S’Alighera cun is rispetivos portos.

Un’àteru atzinnu pro is sardos in mèritu a s’afortiamentu de is Zonas econòmicas ispetziales. Tropu pagu pro ismenguare sa diferèntzia infrastruturale e econòmica cun s’Itàlia e , chi si sunt agravadas de prus a càusa de sa pandemia.Medas esponentes polìticos sardos ant giai puntadu su pòddighe contra su fatu chi su Recovery Plan at pessadu tropu pagu a risòlvere sos graves problemas de s’Ìsula.

De seguru diat èssere serbidu un’interventu prus detzisu cun unu pranu meda de prus importante pro sa Regione Sardigna, ca custos meses ant postu in ghenugru medas realidades impresariales giai in pretzedèntzia in dificultade.

Oltretutto cun un’istajone istiale ancora in duritu, cun s’ausèntzia de sas aparauladuras de sos turistas, si prospettano meses galu prus tostos pro traballadores istajonales, chi tenent possibilidades de creare unu rèditu solu in custu perìodu de s’annu.

Cun un’atòngiu chi s’at a annuntziare galu prus caente, diat èssere istadu unu mannu ristoro pro sa crisi sotziale semper prus grave, ischire chi su Guvernu tenneret in serbu unu pranu de rilantzo importante pro s’Ìsula.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu est resèssidu a bìnchere contra sa Roma puru, duncas at conchistados àteros tres puntos e immoe est prus de un’isperàntzia sa de abarrare in Sèrie A.

Is òmines de Semplici ant cassadu is grogu-rujus, gràtzias a su resurtadu de 3-2 cun is gol pro is meres de domo de Lykogiannis, Marin e Joao Pedro. Duas retes pro is istràngios marcadas dae Perez.

Cun custa vitòria, is sardos immoe ant segudadu in classìfica su Benevento e su Torino a 31 puntos, e sunt a duos puntos dae su Spezia e a tres dae sa Fiorentina. Custas ant a èssere is iscuadras chi s’ant a giogare sa permanèntzia in su màssimu campionadu natzionale finas a s’ùrtima giorronada.

Tocat a nàrrere chi una pariga de chidas a oe, is casteddajos fiant cun medas puntos a coa dae is àteras iscuadras, e sa partida bìnchida contra su Parma at dadu una furriada – pro immoe bona – a s’istajone.

S’allenadore de su Casteddu, òmine sàbiu e abituadu a sa “gherra” pro abarrare in Sèrie A, at naradu chi at a sighire cust’àndala e a èssere semper ùmile finas a sa fine.

Ma e ite est cambiadu in sa conca de is giogadore ruju-blu? Seguramente in custas ùrtimas partidas s’est bidu un’àteru ispìritu, cun prus gana de gherrare in paris e prus “malesa” isportiva.

De custu grandu mèritu ddu tenet s’iscuadra tècnica de s’allenadore nou Semplici, chi at pigadu su postu de Eusebio Di Francesco.

Domìniga is sardos ant a èssere in campu a Napoli contra s’iscuadra partenopea, chi est gioghende∙si sa possibilidade de si cualificare in sa Liga Europea de is Campiones.

Pro is casteddajos at a èssere una partida istragosa meda, pro ite is asulos sunt un’iscuadra forte meda, bastat a remonare calicunu campione famadu comente, in difesa a Koulibaly, in su tzentru-campu a Fabian Ruiz e in s’atacu Insigne, Mertens e Osimhen.

Su Casteddu si diat cuntentare peri de unu puntu ebbia, pro ite sa gara chi tocat a bìnchere est cussa de sa chida a pustis contra su Benevento, acanta at a èssere proibidu a pèrdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”