Erisero amus bidu comente fiat sa situatzione in Aristanis, s’antiga capitale de su Giuigadu de Arborea.

Semus andados a bìdere comente sa gente at pigadu custa detzisione, isetada dae paritzu tempus.

Tocat a nàrrere chi su lunìs est una die de traballu e duncas est una cosa crara chi is carreras non podiant èssere prenas de gente. Però cussu chi nos at prenadu su coro, est istadu chi in fines amus bidu is mesas e is cadreas de is tzilleris e de is recreos in foras, cun òmines e feminas papende e bufende.

Custu est pròpiu unu bellu messàgiu pro is meres de is atividades cummertziales pro su tempus benidore e at a donare coràgiu sa populatzione sarda disigiosa de torrare a sa normalidade, massimamente is imprendidores de su setore de sa retzidura, giai iscambados dae is chidas coladas in zona ruja e arantzu e provados dae is efetos malos causados dae sa pandemia.

Ph: Roberto Anedda

Isperamus chi tra prus pagu de unu mese – comente ant naradu is espertos – chi sa Sardigna potzat torrare in zona bianca.

A bìdere is cussos caminos de sa tzitade, chi ocannu no ant bidu sa Sartìglia, nos at fatu ammentare sa calada de su capu-cursa cando poderat in sa manu sa pipia de maju, su dòpiu iscetru de violas prenu significados.

E torrat a mente sa giostra de caddos de su 2020. S’annu coladu sa manifestatzione fiat renèssida bene a beru, cun unu pùblicu in festa chi aiat acudidu a tropa pro assìstere a s’antiga cursa a caddu de carrasegare.

Ph: Roberto Anedda

Eris Aristanis s’est fata agatare pronta e cortesa, cun sa matessi bellesa medievale incantosa de semper.

Difatis in medas sunt aprontende is butegas pro s’arribbu de is turistas. In sa costera de Aristanis puru, amus bidu chi sunt cumintzende a assetiare is locales pro s’istajone istadiale.

Ph: Roberto Anedda

Sa bellesa de is plajas e is colores bellos de su mare in custu mese de maju, nos at prenadu su coro de felitzidade. Ogni bìculu de custa cussòrgia tenet calicuna cosa chi mèritat de èssere bida.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Is ruju-blu sunt sarvos in manera matemàtica gràtzias a su parègiu de su Crotone cun su Benevento e a San Siro firmat su Milan a su 0-0.

Unu gol de s’atacante de su Crotone, marcadu dae su nigerianu Simy, chi firmat su Benevento a su 1-1, at regaladu sa sarvesa matemàtica in Sèrie A a su Casteddu.

Is giogadores e is tècnicos sardos ant festadu noa in is càmeras de s’albergo, pagu a in antis de sa partida contra su Milan a San Siro.

Una bera impresa isportiva cussa de is òmines de Semplici, chi finas a calicuna chida a oe pariant cundennados a nche rùere in Sèrie B.

De seguru, artèfitze mannu de s’impresa est istadu s’allenadore toscanu, capatzu de furriare una situatzione lègia comente sa chi aiat agatadu a pustis de s’esòneru de Di Francesco.

Printzipiende unu traballu fitianu, mescamente psicològicu cun is giogadores, est resèssidu a fàghere iscatare in s’iscuadra gana un’incredìbile de bìnchere, essida a pìgiu durante sa partida contra su Parma.

Mancari su bonu resurtadu isportivu, is casteddajos ant bòlidu onorare campionadu finas a s’ùrtimu. Contra Milan assustadu, is sardos giai sarvos e a mènte sèlia, ant afrontadu su disafiu cun trancuillidade, faghende timoria, e non pagu, a is ruju-nieddos.

S’iscuadra de Pioli s’est bida petzi cun is tiros dae foras de Saelemaekers, parados dae Cragno, e Calàbria, foras. Cussa de Semplici, imbetzes, at proadu a torrare a partire, in su primu tempus, cun duos sarvamentos de Kjaer, mentras in sa ripresa duos corfos de conca sunt istados firmados dae unu miraculosu Donnarumma: prima prontu cun Pavoletti, posca si nch’est iscutu a pitzu de su casteddaju Godin.

A nudda sunt serbidos is càmbios de Pioli, cun Castillejo ebbia chi s’est rèndidu perigulosu, ma sena pretzisione.

Milan-Casteddu s’est serrada duncas 0-0, e pro sa Copa de is Campiones at a èssere un’ùrtima die de coros fortes, cun Juve, Napoli e ruju-nieddos ancora in cursa pro duos postos

Su Casteddu imbetzes at a serrare s’ùrtima die contra su Genoa de s’ex Ballardini, cun sas duas iscuadras serenas pro sa permanèntzia in Sèrie A.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”