Antonella Sorace, Guido Menshing, Blanca Inès Férnandez Quintana e Gianfranco Fronteddu ant otentu su reconnoschimentu in su campu de sa promotzione de sas limbas minoritàrias europeas, retzende s’importante Prèmiu Ondras 2023. Custu prèmiu, promòvidu dae Crei Acli e sa Fundatzione de Sardigna, est istadu pensadu pro tzelebrare s’aficu sotziale e polìticu a livellu internatzionale pro sa promotzione e sa valorizatzione de sas limbas minoritàrias.

Sa tzerimònia de premiatzione, chi punnat a reconnòschere su  traballu dedicadu a s’amparu de sas limbas minoritàrias, s’est tenta sàbadu 30 cabudanni in sa Manifattura Tabacchi de Casteddu.

Su presidente regionale de sas Acli, Mauro Carta, pregiadu meda at naradu a sos giornalistas: “Semus  satisfatos meda meda de sa calidade de sos premiados e mescamente de s’impinnu contunu issoro pro sa promotzione de sa limba sarda e àteras limbas minoritàrias europeas. Custu aficu est istadu portadu a in antis cun determinu dae medas annos dae sas Acli de sa Sardigna.”

Sos binchidores sunt istados seletzionados dae una cummissione de espertos sardos, cunfirmada a pustis de sa editzione colada. Sa giuria est formada dae Giuseppe Corongiu, autore e ativista chi at dedicadu meda tempus a sas chistiones linguìsticas, Nicolò Migheli, sotziòlogu e autore de trasmissiones radiofònicas in sardu pro sa Rai, e Maria Antonietta Piga, giornalista televisiva, editora e esperta de linguìstica e polìticas linguìsticas. Sas candidaduras propostas sunt istadas posca ratificadas dae sos dirigentes de su Crei.

Lòmpidu a sa segunda editzione sua, su Prèmiu Ondras sighit a tzelebrare personalidades sardas e europeas chi si sunt distintas pro s’istraordinària deditzione a s’amparu e a sa difusione de su patrimòniu inestimàbile de sas limbas minoritàrias.

Su faeddu Ondras, in su sardu literàriu bolet nàrrere “onore”, “reconnoschimentu”, “bantu” in su sentidu de s’atributzione de calidade a una persone o a una cosa.. Sa paràula giusta pro rapresentare su chi su Crei Acli cheret pònnere in campu pro sos chi traballant e gherrant de s’egualidade de sas limbas europeas.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

“S’Istatzione de s’Arte de Ulassai: su viazu infinidu de Maria Lai intre arte e comunidade”.

S’Istatzione de s’Arte de Ulassai est unu museu de arte de oe dedicadu a s’opera de Maria Lai, artista de importantzia internatzionale, naschida propriu in custa biddighedda de s’Ozzastra. Abbertu in su 2006, su museu pigat forma gratzias a sa donassione de pius de centu baranta operas dae parte de s’artista, e d’est accasazadu in sos locales de s’ex istatzione de sos trenos, posta a s’adde de sa idda.

Su seperu de su logu reflettit in manera perfetta unu de sos intentos pius fungudos de su tribagliu de Maria Lai: accurtziare s’arte a sa zente, revertinde unu logu de coladorzu comente s’istatzione in d’unu logu de addobiu culturale.

Su museu est fattu de medas fraicos unu tempus destinados a su serviziu de sas ferrovias, como cumbertidos in logos espositivos e buttegas creativas.

Fintzas dae cando est bistada abberta, s’Istatzione de s’Arte si est annodittada comente unu tzentru bivu e mobbile, capatze de accollire mustras de su tempu de oe ,residentzias de artista e attividades partetzipativas, apprettande unu faeddu continu intre artistas, iscrocca e bisitadores. Su museu est puru parte de fundamentu de sa bista de Ulassai, chi si est revertidu in d’unu museu a chelu abbertu gratzias a sa presentzia de operas chi abbarrant e chi faeddant cun su cuntestu urbanu e nadurale.

Maria Lai at sighidu a partetzipare in sos logos de su museu fintzas pustis sa fundatzione de su museu, arricchindelos cun istallatziones novas.

Intre custa bi sunt sos pannellos in forex de “Sas chimbe esse(1999), sos fettas color’’e aera in tzeramica chi ghiant sos bisitadores intre divressos fraicos, su Telarzu de su bentu(2007), un’istruttura manna de attarzu posta in d’una de sas  bintradas, e su Monumentu a Gramsci(2007), donu a una de sas friguras pius caras a
s’artista. S’Istatzione de s’Arte mustrat gai no solu unu tzentru espositivu, ma unu disignu culturale fungudu e chi sighit a creschere, chi reflettit s’anima de Maria Lai e su disizzu suo de un’arte atzesibile, partetzipada e abbarbada in s’iscrocca.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22