Sa pratzitta de Portu Cherbu at fattu de curnisa a sa tertza edissione de su Longevity Fest, su primu festival a su mundu tottu dedicadu a sa longa vida. S’abbenimentu, chi si est affirmande in manera lestra commente unu fentomu internatzionale po espertos e appassionados de su tema, est bistadu conduidu dae Ambra Pintore e at apparadu una serana ricca de emossiones e temas de calidade.

S’abbertura est bistada intregada a Pedru Mereu, direttore artisticu de su festival, chi at dadu su benennidos a su pubbricu e at introduidu sos momentos divressos de sa serana. In mesu de custos, unu de sos pius de signifficu est bistadu s’intregu de su Longevity Award a Giulio Mogol, tzelebre commente autore. Custu riconnoschimentu, chi rappresentat sabidoria e vivesa, est bistadu intregadu dae su proffessore Gianni Pes , connoscidu po s’iscoperta de sas Blue Zones, sos logos de su mundu inube sas pessones bivent de pius.

Sa serana est andada a daenanti cun sa presentazione de su documentariu “Arzachentos”, affiladu dae su mattessi Mereu. Su film iscumbattat su fenomenu de sa longa vida in Arzachena, fruninde una bista unica supra sas vidas de sos chentenarios de sa bidda e supra su connottu chi favoressit una vida longa e sana. Su documentariu at accattadu s’iscopu cun su pubbricu, po sa capatzidade sua de contare in manera affriscionosa sa cultura e sos segretos de una longa vida.

Daboi, si est tenta una dibatta interessante meda. In su mentres de sa dibatta, est bessida a campu sa volontade de su sindigu de cunviare un’istudiu fungudu supra sa vida longa in su columene suo, affidandesi a s’esperientzia de su proffessore Pes, chi at istudiadu fintzas sos chentenarios de s’Ozzastra, attera Blue Zone importante meda.

S’urtima parte de sa serana at tentu commente tema sa Costa Rica, cun su documentariu “Kentannos” de Victor Cruz, chi iscumbattat sa vida de sos chentenarios de sa penisula de Nicoya, una de sas Blue Zones de su mundu. Custu festival, unicu in sa zenia sua, sighit a essere unu ponte intra connottu, iscientzia e cultura, apparande un’opportunidade po meledare supra commente sa vida longa non siat solu un’accabbu de segudare, ma unu viazzu chi appartennet a sa comunidade, maneras de vida e connessuras umanas fungudas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Museu Nivola, chi si acciappat in su burgu de Orane, in provintzia de Nugoro, est unu de sos polos culturales pius de signifficu de sa Sardigna. Est dedicadu pèrpere a s’opera de Costantino Nivola (1911-1988), artista sardu de fama internatzionale, connoschidu po su contribbudu de annoamentu suo a s’iscultura, su design e s’arte pubbrica de su Noighentos.

Naschidu propriu in Orane, Nivola at passadu sa parte manna de sa carriera sua in sos Istados Unidos, inube at tribagliadu paris cun ordinzadores comente Le Corbusier e cun artistas commente Jackson Pollock e Willem de Kooning. Su Museu est bistadu fattu cun savolontade cropada de sa Regione Sardigna, de su Comune de Orane e de sa famiglia de s’artista, chi in su 1990 ant creadu sa Fundassione Costantino Nivola.

Sa contestura museale est bistada coviada in su 1995. Su museu est bistadu fattu in s’ex labadorzu comunale, unu fraicu de balore istoricu mannu po sa comunidade, revertidu in logu de esposissione dae sos ordinzadores Peter Chermayeff e Umberto Floris. S’accontzu at ischidu ponnere impare su rispettu po s’identidade de su fraigu de bessida cun s’insertamentu armonigu in sa bista, balorizande fintzas sa bena accanta de su Cantaru, dae seculos puntu de relata po sos chi bistant in sa bidda.

Sa zura in fora de su Museu est oe unu parcu de isculturas chi accasazzat calicuna de sas operas mannas de Nivola,intregandelas in su pannu urbanu e nadurale in manera parivile. Sa collessione chi abbarrat de su museu est sa pius ricca e padria dedicada a Nivola a livellu de tottu su mundu. Alcansat pius de 200 operas intre disignos, pinturas, isculturas de ghisu, brunzu, marmaru, tzeramica e cantos fattos cun d’una tennica noa amprariada dae issu chi prenettat s’amparu de sa rena commente madrighe po sa colada de ghisu. Sos temas chi torrant a currere in sas operas suas sunt sa madernidade, sa frigura de sa femina, sa bista mediterranea e su faeddu intre omine e nadura.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22