Michela Murgia, in un’intervista a su “Corriere della Sera” at naradu de tènnere una “cartzinoma renale a su de bator istàdiu”. Una diàgnosi chi s’iscritora de Cabras at contadu in su romanzu nou Tre ciotole. In contu de sa maladia Murgia at naradu: “So curendemi cun un’immunoterapia. No atacat sa maladia; segùgiat sa risposta de su sistema immunitàriu. S’obietivu no est cussu de irraighinare su male, tantis est tropu tardu, ma su de balangiare calicunu mese de vida in prus. Non mi podent operare, pro ite sas metàstasi sunt giai in sos purmones, in sos ossos e in su cherbeddu”.

“Su cancru no est una cosa chi tèngio, est una cosa chi so”, at naradu s’iscritora sarda, “est unu còmplitze de sa cumplessidade mea, no un’inimigu de distrùere. Non potzo, non chèrgio fàghere gherra a su corpus meu, a mie matessi. Su tumore est unu de sos prètzios chi podes pagare pro èssere ispetziale. No lu dia mutire mai su maleitu, o s’alienu”.
“Tèngio chimbanta annos,- at agiuntu s’iscritora-  ma apo bìvidu deghe vidas. Apo fatu cosas chi su prus de sas persones non faghet in totu sa vida. Cosas chi no ischia mancu de disigiare. Tèngio ammentos pretziosos”.
Ispiegat ancora: “Apo comporadu domo, cun deghe postos letu, pro istare totus paris; apo sentidu meda chi  m’apant negadu su mùtuu pro more ca so malàida. Apo fatu totu su chi cheria. E como mi còjuo. Cun un’òmine, ma podiat fintzas èssere una fèmina”. E est crara meda fintzas subra de sa chistione fine vida: “Potzo aguantare meda dolore, ma non de  no èssere in sentidu. Chie mi cheret bene ischit ite devet fàghere. So semper istada a costadu de sas ideas de sos radicales, a Marco Cappato”.

In s’intervista, cando l’ant preguntadu si creet galu in Deus, issa at rispostu: “Emmo. L’apo pregadu e lu prego de fàghere atzetare a sas persones chi m’istimant de atzetare su chi m’at a capitare”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Gramsci e Lussu: duos sardos mannos chi ant sinzadu s’istoria de s’Italia.

Sa Sardigna at dadu sa vida a duas de sas figuras pius influentes de su Noighentos italianu: Antoni Gramsci e Emilio Lussu. Divressos po temperamentu, ma postos impare dae s’impignu tzivile, dae sa passione po sa zustissia sotziale e dae una annaghidura funguda cun sas raighinas isulanas proprias, Gramsci e Lussu ant sinzadu s’istoria politica e culturale de s’Italia, dassande un’eredidade chi est biva e presente puru a dies de oe. Naschidu in Ales in su 1891, Antoni Gramsci est bistadu unu de sos pius mannos istudiosos de su seculu XX.

Fundadore de su Partidu Comunista de Italia in su 1921 e autore de sos tzelebres Cuadernos dae sa Presone, Gramsci at isfroscadu unu pensamentu politicu cumplicadu e originale, tzentradu supra s’idea de dominassione culturale e s’importantzia de s’educatzione de sas massas. Sas ideas suas, trempidas in parte in su mentres de sa presonia longa sutta de su Fascismu, ant influentzadu in manera funguda, non solu sa politica italiana, ma fintzas su pensamentu ratzionale, sotziologicu e formativu a livellu internatzionale.

Mancari attesu dae sa Sardigna po una parte manna de sa vida sua, Gramsci at semper tentu unu ligonzu forte cun sa terra sua.A pagos annos de distantzia, in su 1890, naschiat in Armungia Emilio Lussu, figura de signifficu de s’antifascismu e de su repubblicanesimu italianu. Graduadu in leze e uffitziale in sa prima gherra mondiale, Lussu aiat contadu s’esperientzia de su fronte in su liberu “Un anno sull’altipiano”, memorias de sa gherra.

Fundadore de su Partidu Sardu de Atzione e pustis esponnente importante de su movimentu antifascista “Giustizia e Libertà”, Lussu fit bistadu obbrigadu a su disterru in su mentres chi bi fit Mussolini. Pustis de sa rutta de su fascismu, aiat partetzipadu a torrare a fraigare demograticamente s’Italia. Sa bista sua politica teniat unu sensu fungudu de zustissia sotziale. Gramsci e Lussu, mancari arribberant dae esperientzias divressas ant ambos dadu unu contribbudu a fraigare un’Italia pius cabosa, critiga e democratiga.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22