Erisero a Casteddu, prima de cumintzare sa partida sunt istadas regordadas is vìtimas de sa funivia de Mottarone e sa morte de su difensore famadu de s’Inter e de sa Natzionale Asula, Tarcisio Burgnich.

S’ex tertzinu destru est istadu unu de is prus balentes marcadores italianos de totu is tempos. Sunt istòricos is disafios in campu cun Gigi Riva, su gol in sa semifinale in su Mundiale de Mèssicu ’70, su brìnchidu pro firmare a Pelé in sa matessi cumpetitzione e àteras cosas puru.

S’Itàlia est essida vitòriosa dae sa Sardigna Arena, bìnchende 7-0 contra San Marino.

A marcare sunt istados Bernardeschi, Ferrari, Belotti e duas bias cadaunu Politano e Pessina. Sa gara est istada una bona proa pro aprontare s’Europeu chi sa Natzionale at giogare tra prus pagu de duas chidas.

Tzertu s’aversàriu no est de is prus fortes, ma s’iscuadra at giogadu cuntzentrada e at fatu bìdere bonas cosas a beru. Seguru custa partida est serbida a Roberto Mancini pro cumprèndere chie poderare e chie lassare in domo prima de sa cumpetitzione continentale.

Difatis is asulos cunvocados sunt 35, e de custos noe ant a èssere iscartados prima de su 1 de làmpadas, cando intro sa mesunote, s’allenadore de Jesi at a donare lista de is cunfirmados a sa UEFA.

Seguros de èssere seberados sunt su portieri de su Torino, Salvatore Sirigu, e su tzentrucampista de s’Internazionale Nicolò Barella. Sunt is ùnicos sardos chi ant a fàghere s’Europeu de ocannu. Su defensore estremu de Sa Caletta at a fàghere sa reserva de Gigio Donnarumma, imbetzes su medianu de Casteddu est unu de is òmines prus balentes de s’Itàlia.

Su giogadore ruju-blu, Alessio Cragno est galu in ballotàgiu cun Alex Meret de su Napoli pro intrare in lista comente tertzu portieri de sa Natzionale.

S’Itàlia, prima de cumintzare s’Europeu, su 4 de làmpadas at a giogare un’àtera gara amistosa contra sa Republica Tzeca, chi in cunfrontu sa de erisero at aèssere partida prus istragosa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In s’ùrtima partida de su campionadu ’20/’21 at bìnchidu su Casteddu at pèrdidu contra su Genoa.

Sa gara est acabbada zeru a unu pro is lìgures gratziàs a su gol de s’atacante uzbeko Shomurudov, a su 15′ minutu de su primu tempus, chi at frigadu su portieri Cragno in essida, gràtzias a su passàgiu de su cumpàngiu Rovella

Duncas is sardos non sunt resèssidos a cungiare s’istajone cun una vitòria tra is muros amigos de sa Sardigna Arena, mancari apant tentu ocasione meda pro adderetzare sa gara.

Tzertu prima de su gol su capitanu Joao Pedro at pitzigadu unu palu e su portieri aversàriu Paleari – su postu de Perin – in una pariga de ocasione at fatu bìdere su chi balet. Ma sunt medas puru is retes faddidas dae is òmines de Semplici: una bia cun su tzentrucampista Marin e bàtor bias cun s’atacante Cerri.

Cun is tres puntos su Casteddu diat àere pòdidu balangiare prus dinare gràtzias a sa classificatzione finale prus bona, in base a su prèmiu finale chi donat sa federatzione de su fùbalu natzionale. E semus faeddende de una diferèntzia tra is 500 mìgia e 1 millione de èuros.

Tocat a nàrrere chi seguramente custa pérdida no at a ruinadu sa festa de is giogadores e de is tifosos casteddajos pro sa sarvesa de s’iscuadra in Sèrie A.

Mèritu mannu est de s’allenadore toscanu chi est resèssidu a lograre custu obietivu chi solu solu unas chidas a oe pariat impossìbile de otènnere e is sardos pariant cundennados a nche rùere in Sèrie B.

Semplici, dae cando est intradu a su postu de Di Francesco, cun unu traballu fitianu, mescamente psicològicu cun is giogadores, est resèssidu a nde fàghere bogare a foras a s’iscuadra sa gana de bìnchere.

Comente at naradu s’allendore etotu, custu fogu is giogadores de su Casteddu nde dd’ant bogadu in sa partida contra su Parma, chi at cambiadu sa sorte de su campionadu.

Duncas sa detzisione de su presidente Giulini de cunfirmare Semplici pro s’istajone benente, est sàbia meda e preghe peri a is tifosos ruju-blu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”