Draghi sollìtzitat a gherrare su Covid-19 cun una campagna de vatzinatziones globale e lestra, e prevènnere àteras pandemias.

Custu est su chi nd’est essidu a pìgiu dae su Global Health Summit de Roma, presididu dae Mario Draghi e Ursula Von der Leyen, chi at riunidu is capos de su G20, iscientziados, organizatziones internatzionales e sotziedade tzivile a inghìriu de una mesa – mancari virtuale – pro donare rispostas cuncretas, a cumentzare dae sa re-distributzione solidale de is vatzinos a disponimentu de su ricu Otzidente a iscàpitu de is Paisos pòveros, cumpartzende brevetos, connoschimentu e produtzione.

Su presidente de su consìgiu at naradu de èssere favorèvole a vatzinare totus e in ogna parte de su mundu, una prioridade apretosa pro reduire sa diferèntzia e pro remediare a is ingiustìtzias in custu momentu istòricu de sa pandemia.

Draghi at naradu de èssere a favore de una suspensione de is brevetos, ma in modu provisòriu pro non fàghere dannu a is aziendas farmatzèuticas.

Una proposta fata pro primu dae su presidente americanu Joe Biden, e cumpartzida dae su frantzesu Emmanuel Macron e dae s’ispagnolu Pedro Sànchez, e integrada, mancari pro de badas, in sa Decraratzione de Roma cun unu riferimentu a sa “voluntariedade” in su trasferimentu de litzèntzias, tecnologia e esperièntzia.

Dae acòrdiu a sa proposta fintzas sa cantzillera Angela Merkel, si però sena òbligu e in base voluntària. Prudente fintzas sa presidente de sa Cummissione Ue, favorèvole a impreare totu is flessibilidades previstas, ma determinada a garantire su sistema de propiedade intelletuale.

In su mentrestempus in sa reunione de su G20 nd’est essida a campu sa proposta de tres domos farmatzèuticas americanas mannas – Pfizer, Moderna e Johnson & Johnson – de pònnere a disponimentu 3,5 milliardos de doses pro is Paisos pòveros pro su biènniu 2021-2022. Un’impignu pùblicu de bèndida a prètziu de costu a is Istados a bassu rèdditu e a prètziu reduidu a cuddos a mèdiu rèditu.

In s’ora s’UE at a donare 100 milliones de doses intro su 2021, Frantza e Germània nd’ant promìtidu 30 milliones ognuna, e s’Itàlia 15, prus àteros 300 milliones de èuros de agiudos finantziàrios pro tèndere sa manu a is Paisos in bia de isvilupu, mescamente in Àfrica, a prodùere vatzinos pro contu issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sunt coladas prus de deghe dies dae sa morte de Mirko, su pitzocu de Tortolì mortu dae s’ex cumpàngiu de sa mama Paola pro dda difèndere

S’11 de maju coladu, a in antis de arbèschere, Masih Shahid est intradu a iscusi in sa domo de su tzentru de sa tzitadina ogiastrina agorteddende sa fèmina e posca corfende a morte su fìgiu chi fiat intervènnidu pro firmare sa fùria de su mortore suo.

A pustis de àere feridu in modu grave a Paola e mortu a Mirko, s’òmine s’est fuidu de presse, ma est istadu agatadu dae is carabineris atacadu in Basàura.

Is carabineris dd’ant acapiadu e leadu a caserma, acanta a dd’isetare ddoe fiat una surra de persones – parentes, amigos, e conoschentes de sa vìtimas – chi ant chircadu de si fàghere giustìtzia a manu issoro betende·si a pitzu de su mortore.

Bene dae tando in custas dies, cun totu sa comunidade ogiastrina galu afartzada pro sa morte de Mirko e pro sa sorte de sa mama, sunt sutzèdidas medas cosas.

Is gestos de is cumpàngios suos de s’Istitutu alberghieru, chi ant onoradu in diversos modos a su cumpàngiu issoro, s’interru de su giòvanu cun mìgias de persones presentes pro s’ùrtimu saludu, e sa manifestatzione cuncordada dae is fèminas ogiastrinas pro nàrrere bastat a “violèntzia contra is fèminas”.

Immoe movimus dae custos fatos chi semus deretos de remonare: prima de totu Mirko fiat amadu dae totus, prova nde sunt is messàgios de istima de is levas suos e de is insegnantes de s’iscola acanta istudiaiat. Su gestu suo de difèndere sa mama est istadu calicuna cosa de eròicu e de altruista, pagadu cun sa matessi vida sua. Ma comente ant sutaliniadu is organizadoras de sa manifestatzione contra sa violèntzia subra de is fèminas, non si devet iscarèssere chi in custu acuntessimentu est craru comente is autoridades no apant fatu su possìbile pro evitare su chi poi est sutzèdidu, sende chi Paola aiat denuntziadu su mortore fiat in su mese de idas, e chi est pretzisu a firmare sa violèntzia contra is fèminas.

Serbit unu càmbiu culturale mannu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22