In s’ùrtima partida de su campionadu ’20/’21 at bìnchidu su Casteddu at pèrdidu contra su Genoa.

Sa gara est acabbada zeru a unu pro is lìgures gratziàs a su gol de s’atacante uzbeko Shomurudov, a su 15′ minutu de su primu tempus, chi at frigadu su portieri Cragno in essida, gràtzias a su passàgiu de su cumpàngiu Rovella

Duncas is sardos non sunt resèssidos a cungiare s’istajone cun una vitòria tra is muros amigos de sa Sardigna Arena, mancari apant tentu ocasione meda pro adderetzare sa gara.

Tzertu prima de su gol su capitanu Joao Pedro at pitzigadu unu palu e su portieri aversàriu Paleari – su postu de Perin – in una pariga de ocasione at fatu bìdere su chi balet. Ma sunt medas puru is retes faddidas dae is òmines de Semplici: una bia cun su tzentrucampista Marin e bàtor bias cun s’atacante Cerri.

Cun is tres puntos su Casteddu diat àere pòdidu balangiare prus dinare gràtzias a sa classificatzione finale prus bona, in base a su prèmiu finale chi donat sa federatzione de su fùbalu natzionale. E semus faeddende de una diferèntzia tra is 500 mìgia e 1 millione de èuros.

Tocat a nàrrere chi seguramente custa pérdida no at a ruinadu sa festa de is giogadores e de is tifosos casteddajos pro sa sarvesa de s’iscuadra in Sèrie A.

Mèritu mannu est de s’allenadore toscanu chi est resèssidu a lograre custu obietivu chi solu solu unas chidas a oe pariat impossìbile de otènnere e is sardos pariant cundennados a nche rùere in Sèrie B.

Semplici, dae cando est intradu a su postu de Di Francesco, cun unu traballu fitianu, mescamente psicològicu cun is giogadores, est resèssidu a nde fàghere bogare a foras a s’iscuadra sa gana de bìnchere.

Comente at naradu s’allendore etotu, custu fogu is giogadores de su Casteddu nde dd’ant bogadu in sa partida contra su Parma, chi at cambiadu sa sorte de su campionadu.

Duncas sa detzisione de su presidente Giulini de cunfirmare Semplici pro s’istajone benente, est sàbia meda e preghe peri a is tifosos ruju-blu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Draghi sollìtzitat a gherrare su Covid-19 cun una campagna de vatzinatziones globale e lestra, e prevènnere àteras pandemias.

Custu est su chi nd’est essidu a pìgiu dae su Global Health Summit de Roma, presididu dae Mario Draghi e Ursula Von der Leyen, chi at riunidu is capos de su G20, iscientziados, organizatziones internatzionales e sotziedade tzivile a inghìriu de una mesa – mancari virtuale – pro donare rispostas cuncretas, a cumentzare dae sa re-distributzione solidale de is vatzinos a disponimentu de su ricu Otzidente a iscàpitu de is Paisos pòveros, cumpartzende brevetos, connoschimentu e produtzione.

Su presidente de su consìgiu at naradu de èssere favorèvole a vatzinare totus e in ogna parte de su mundu, una prioridade apretosa pro reduire sa diferèntzia e pro remediare a is ingiustìtzias in custu momentu istòricu de sa pandemia.

Draghi at naradu de èssere a favore de una suspensione de is brevetos, ma in modu provisòriu pro non fàghere dannu a is aziendas farmatzèuticas.

Una proposta fata pro primu dae su presidente americanu Joe Biden, e cumpartzida dae su frantzesu Emmanuel Macron e dae s’ispagnolu Pedro Sànchez, e integrada, mancari pro de badas, in sa Decraratzione de Roma cun unu riferimentu a sa “voluntariedade” in su trasferimentu de litzèntzias, tecnologia e esperièntzia.

Dae acòrdiu a sa proposta fintzas sa cantzillera Angela Merkel, si però sena òbligu e in base voluntària. Prudente fintzas sa presidente de sa Cummissione Ue, favorèvole a impreare totu is flessibilidades previstas, ma determinada a garantire su sistema de propiedade intelletuale.

In su mentrestempus in sa reunione de su G20 nd’est essida a campu sa proposta de tres domos farmatzèuticas americanas mannas – Pfizer, Moderna e Johnson & Johnson – de pònnere a disponimentu 3,5 milliardos de doses pro is Paisos pòveros pro su biènniu 2021-2022. Un’impignu pùblicu de bèndida a prètziu de costu a is Istados a bassu rèdditu e a prètziu reduidu a cuddos a mèdiu rèditu.

In s’ora s’UE at a donare 100 milliones de doses intro su 2021, Frantza e Germània nd’ant promìtidu 30 milliones ognuna, e s’Itàlia 15, prus àteros 300 milliones de èuros de agiudos finantziàrios pro tèndere sa manu a is Paisos in bia de isvilupu, mescamente in Àfrica, a prodùere vatzinos pro contu issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22