Bonas noas pro sa Sardigna, dae martis chi benit, a pustis de prus de duos meses dae s’ùrtima bia, at a torrare in zona bianca.

Si s’àtera borta s’ìsula nostra fiat istada s’ùnica regione italiana a èssere colada in custa fàscia, custa bia at a torrare bianca paris cun su Friuli e de su Molise.

Duncas, francu sa Sardigna e custas duas regiones, totu su restu de s’Itàlia at a tènnere su colore grogu. Sa classificatzione noa est istada fata tenende contu de custu paràmetru: cun prus pagu de 50 casos ogna 100 mìgia abitantes pro 3 chidas de sighidu e un’arriscu bassu, s’andat deretu in fàscia bianca.

In prus de custu, est istadu cunfirmadu chi chie at a retzire custa classificatzione noa no at a tènnere prus s’òbligu de ritiru, pro ite in custa zona at a èssere abolidu. Regordamus chi dae cando su ritiru est intradu in vigore est istadu dae is 22 a is 5, oràriu acanta non faghiat prus a essire dae domo si non pro motivu de traballu, netzessidade o de salude, e in is ùrtimas chidas fiat istadu ispostadu a is 23.

Su passàgiu a sa zona noa de apartenèntzia, cun nudda limitatziones – transi s’òbligu de si pònnere semper sa mascaredda- at a fàghere praghere a totu is sardos, ma prus che totu a tzillerajos e ristoradores.
Una detzisione chi in medas s’isetaiant, màssimu in custu perìodu chi est cumentzende a callentare e sa gente tenet prus gana de essire pro una passigiada, pro papare unu geladu o pro chenare foras de domo.
Ma atentzione però: est a non si fidare meda, pro ite custa pesta malaita no est acabbada e tocat a sighire a donare cuidadu. Tzertu, is vatzinatziones sunt immunizende gente meda, ma nche at a colare paritzu tempus prima chi siant totus immunizados.

E nche bolet pagu a torrare in zona ruja pro more de custas variantes perigulosas de su Covid-19, comente cussa indiana chi pro bona sorte no est lòmpida in Sardigna – e isperamus chi non lompat mai – . Is ùnicos casos sunt istados agatados in pitzu de una nave istràngia ancorada in su portu de Casteddu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Draghi sollìtzitat a gherrare su Covid-19 cun una campagna de vatzinatziones globale e lestra, e prevènnere àteras pandemias.

Custu est su chi nd’est essidu a pìgiu dae su Global Health Summit de Roma, presididu dae Mario Draghi e Ursula Von der Leyen, chi at riunidu is capos de su G20, iscientziados, organizatziones internatzionales e sotziedade tzivile a inghìriu de una mesa – mancari virtuale – pro donare rispostas cuncretas, a cumentzare dae sa re-distributzione solidale de is vatzinos a disponimentu de su ricu Otzidente a iscàpitu de is Paisos pòveros, cumpartzende brevetos, connoschimentu e produtzione.

Su presidente de su consìgiu at naradu de èssere favorèvole a vatzinare totus e in ogna parte de su mundu, una prioridade apretosa pro reduire sa diferèntzia e pro remediare a is ingiustìtzias in custu momentu istòricu de sa pandemia.

Draghi at naradu de èssere a favore de una suspensione de is brevetos, ma in modu provisòriu pro non fàghere dannu a is aziendas farmatzèuticas.

Una proposta fata pro primu dae su presidente americanu Joe Biden, e cumpartzida dae su frantzesu Emmanuel Macron e dae s’ispagnolu Pedro Sànchez, e integrada, mancari pro de badas, in sa Decraratzione de Roma cun unu riferimentu a sa “voluntariedade” in su trasferimentu de litzèntzias, tecnologia e esperièntzia.

Dae acòrdiu a sa proposta fintzas sa cantzillera Angela Merkel, si però sena òbligu e in base voluntària. Prudente fintzas sa presidente de sa Cummissione Ue, favorèvole a impreare totu is flessibilidades previstas, ma determinada a garantire su sistema de propiedade intelletuale.

In su mentrestempus in sa reunione de su G20 nd’est essida a campu sa proposta de tres domos farmatzèuticas americanas mannas – Pfizer, Moderna e Johnson & Johnson – de pònnere a disponimentu 3,5 milliardos de doses pro is Paisos pòveros pro su biènniu 2021-2022. Un’impignu pùblicu de bèndida a prètziu de costu a is Istados a bassu rèdditu e a prètziu reduidu a cuddos a mèdiu rèditu.

In s’ora s’UE at a donare 100 milliones de doses intro su 2021, Frantza e Germània nd’ant promìtidu 30 milliones ognuna, e s’Itàlia 15, prus àteros 300 milliones de èuros de agiudos finantziàrios pro tèndere sa manu a is Paisos in bia de isvilupu, mescamente in Àfrica, a prodùere vatzinos pro contu issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22