Custu sero s’at a giogare sa bella de is playoff tra Dinamo Tàtari e Reyer Venezia.

Custa at a èssere sa gara nùmeru chimbe, a pustis chi is vènetos ant bìnchidu in domo issoro is primas duas partidas, e is sardos ant paregiadu conchistende is àteras duas garas a su Pala Serradimigni.

Oe in su pamentu in linna de su Taliercio, s’at a bìdere una partida gherrada finas a s’ùrtimu puntu.

Chini at a bìnchere at a afrontare s’Olimpia Milano, s’iscuadra prus favorida pro sa conchista de su màssimu campionadu natzionale de basket.

Sa Dinamo at meritadu de si giogare sa possibilidade de lòmpere tra is primas iscuadras italianas, ma tzertu at a èssere traballosu meda a agatare sa vitòria in domo de su Venezia. Difatis s’istatìstica pro sa gara chimbe in is playoff est casi semper a favore de is meres de domo.

Ma is òmines de Pozzecco ant abituadu is tifosos a impresas chi pariant impossìbiles, e in custa gara at a contare meda sa gana e su càratere ìssoro.

S’allenadore de is venetos, De Rafaele, at a puntare meda a pitzu de is giogadores istràngios suos: comente su tzentru Vidmar – capatzu de frimare su tataresu Bilan -, Stone – bonu meda in sa difesa – , Jarrells – balente meda a fàghere puntos – e Daye – chi est semper bravu a cambiare sa gara cando sunt brincados is ischemas -.

A sa Dinamo pro bìnchere seguramente ant a serbire: una bona proa de su croatu Bilan e puntos meda de Katic. In prus su criadore de su giogu, Spissu, at a depere fàghere furriare sa botza in totu su campu. Sena sa vena de custos tres giogadores at a èssere istragosu meda resèssere a si cualificare a su turnu sighente.

Is tifosos sardos isperant chi s’allenadore Pozzecco intzertet cartas bonas pro sa vitòria e chi is giogadores tàtaresos siant indanimados a bìnchere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Dae eris sa Sardigna intrada ufitzialmente in zona groga, duncas cun prus pagas limitatziones pro is tzitadinos, chi in custas chidas ant dèvidu afrontare medas sacrifìtzios.

Ma no est s’ùnica novidade. Difatis eris s’est obiada sa Cabina de règia, e nde sunt essidas a campu detzisiones importantes meda.

Su guvernu at detzìdidu disponimentos noos pro s’òbligu de ritiru, chi dae cando est intradu in vigore est dae is 22 a is 5, oràriu acanta non faghet a essire dae domo si non pro motivu de traballu, netzessidade o de salude.

Dae cras s’oràriu at a fugire a is oras 23, una detzisione chi in medas s’isetaiant, màssimu in custu perìodu chi est cumentzende a callentare e sa gente tenet prus gana de essire pro una passigiada, papare unu geladu o pro chenare foras.

Su testu aprovadu in Consìgiu de is ministros at a dèvere èssere sutapostu a controllu de su capu s’Istadu e a pustis de sa firma de su presidente de sa Repùblica at a dèvere èssere publicadu in Gazeta ufitziale. At a èssere difìtzile duncas chi siat eficatze giai dae oe, e duncas s’intrada in vigore diat dèvere èssere mèrcuris.

Ma atentzione: tocat a tènnere a mente una data importante: su 7 de làmpadas. Difatis in cussa die s’oràriu de su ritiru at a passare a mesunote e, solu pro is regiones chi ant a intrare a zona bianca, at a bènnere eliminadu.

Meda acapiadu a su ritiru est su càmbiu de is paràmetros pro istabilire is colores is Regiones. Difatis su Rt, s’ìnditze de ispàinu de sa cundidura, no at a èssere prus determinante: ant a contare su tassu de ocupatzione de terapias intensivas e repartos ordinàrios – su Rt ospedalieru, chi in s’ùrtimu còmpudu fiat a 0,78 – e su pesu de is casos. Cun 250 ogna 100 mìgia abitantes s’andat in zona ruja, cun 150-250 in zona arantzu e cun 50-150 in zona groga.

Duncas cun prus pagu de 50 casos in 3 chidas consecutivas e un’arriscu bassu s’at a andare diretamente in fàscia bianca. In custa zona su ritiru at a bènnere abolidu.

Intre is regiones chi diant pòdere tènnere custos paràmetros ddoe est sa Sardigna.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”