Su Casteddu est in festa pro more de èssere rèsessidu a bìnchere s’isfida de sa sarvesa contra su Benevento.

In domo de is campanos, is ruju-blu ant bìnchidu cun su resurtadu de 3-1, gratziàs a is retes de su grecu Lykogiannis, de s’italianu Pavoletti e de su brasilianu Joao Pedro. Pro is grogu-rujos at signadu Lapadula.

Is òmines de Leonardo Semplici si sunt dimustrados prus fortes de is meres de domo, in custa partida chi s’est dimustrada istragosa meda.

Cuntentos meda pro sa vitòria is tifosos sardos e su presidente Giulini e immoe, a tres partidas de sa fine de su màssimu campionadu italianu, mancat a beru pagu pro sa sarvesa segura.

Custa gara pèrdida pro is òmines de Filippo Inzaghi, paret una cundenna pro falare in Sèrie B. Tzertu in su fùbalu totu podet capitare, ma biende calendàriu de is partidas chi isetant su Benevento, no at a èssere fàtzile.

Su Casteddu imbetzes depet giogare contra sa Fiorentina in sa Sardigna Arena, a pustis at a giogare contra su Milan e in s’ùrtima gara de campionadu at a giogare contra su Genoa. De seguru, de custas sa partida prus matanosa at a èssere cussa contra is lombardos, chi sunt gherrende pro sa cualificatzione pro sa Liga de is Campiones benente.

Tzertu, is ruju-blu ant a tènnere màssimu rispetu pro totu custas iscuadras, ma a su Milan puru est a no ddi tìmere, mancari is milanesos siat una de is iscuadras prus balentes de Sèrie A.

Is chi ant a podere fàghere sa diferèntzia ant a èssere de seguru is atacantes Pavoletti, Joao Pedro e su tzentrucampista Nainggolan, ma galu una bòrta at a èssere importante meda a non chistire gol.

Duncas is difensores ant a dèpere fàghere de totu pro firmare is atacantes de is iscuadras benentes.

Is tifosos sardos si diat cuntentare peri de unu puntos ebbia, pro ite is garas prus importantes, sunt cussas contra sa Fiorentina e su Genoa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Erisero amus bidu comente fiat sa situatzione in Aristanis, s’antiga capitale de su Giuigadu de Arborea.

Semus andados a bìdere comente sa gente at pigadu custa detzisione, isetada dae paritzu tempus.

Tocat a nàrrere chi su lunìs est una die de traballu e duncas est una cosa crara chi is carreras non podiant èssere prenas de gente. Però cussu chi nos at prenadu su coro, est istadu chi in fines amus bidu is mesas e is cadreas de is tzilleris e de is recreos in foras, cun òmines e feminas papende e bufende.

Custu est pròpiu unu bellu messàgiu pro is meres de is atividades cummertziales pro su tempus benidore e at a donare coràgiu sa populatzione sarda disigiosa de torrare a sa normalidade, massimamente is imprendidores de su setore de sa retzidura, giai iscambados dae is chidas coladas in zona ruja e arantzu e provados dae is efetos malos causados dae sa pandemia.

Ph: Roberto Anedda

Isperamus chi tra prus pagu de unu mese – comente ant naradu is espertos – chi sa Sardigna potzat torrare in zona bianca.

A bìdere is cussos caminos de sa tzitade, chi ocannu no ant bidu sa Sartìglia, nos at fatu ammentare sa calada de su capu-cursa cando poderat in sa manu sa pipia de maju, su dòpiu iscetru de violas prenu significados.

E torrat a mente sa giostra de caddos de su 2020. S’annu coladu sa manifestatzione fiat renèssida bene a beru, cun unu pùblicu in festa chi aiat acudidu a tropa pro assìstere a s’antiga cursa a caddu de carrasegare.

Ph: Roberto Anedda

Eris Aristanis s’est fata agatare pronta e cortesa, cun sa matessi bellesa medievale incantosa de semper.

Difatis in medas sunt aprontende is butegas pro s’arribbu de is turistas. In sa costera de Aristanis puru, amus bidu chi sunt cumintzende a assetiare is locales pro s’istajone istadiale.

Ph: Roberto Anedda

Sa bellesa de is plajas e is colores bellos de su mare in custu mese de maju, nos at prenadu su coro de felitzidade. Ogni bìculu de custa cussòrgia tenet calicuna cosa chi mèritat de èssere bida.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”