Oe in Sardigna sunt istadas cunsignadas 21.060 doses de vatzinu Pfizer comente at referidu a vàrios òrganos de imprenta s’assessore regionale de sa Sanidade, Mario Nieddu.

Un’ òtima noa pro sa campagna de vatzinatzione de s’Ìsula, chi in custu modu podet sighire cun prus lestresa a pustis de is polèmicas pro is ritardos de is ùrtimas chidas.

In is dies sighentes diant dèpere arribbare àteros càrrigos de àteros vatzinos. Chenàbura su 2 de abrile diant dèpere èssere cunsinnadas 13.100 fialas de Moderna. Custas sunt una parte de is 77.080 doses de intregare intro su 31 de martzu e chi cumprendet fintzas 35.900 vatzinos de AstraZeneca.

Àtera cosa importante, est chi immoe sa Sardigna, comente àteras Regiones, no ant a tènnere prus s’òbrigu de allogare in onnia su 30% de is meighinas chi benint imbiadas.

Difatis pròpiu su respetu de custa “riserva”, difèntdida dae presidente Solinas, aiat fatu lassinare s’Ìsula a s’ùrtimu postu de sa classìfica natzionale de is regiones chi ant fatu prus pagu doses de vatzinos a is tzitadinos.

Dae immoe in susu si diat dèpere recuperare su tempus pèrdidu bidu chi benit a mancare custa genia de medida de seguridade, pro garantire sa segunda dose a is chi ant retzidu sa primu dose.

Intro su 12 de abrile diant dèpere arribbare àteras 82 mìgia doses de Pfizer, mentras a cumentzare dae su 19 e intro mese de làmpadas ant a èssere cunsignadas belle 200.000 doses de sa Johnson e Johnson.

Una calendarizatzione chi medas abetaiant pro chircare de immunizare su nùmeru prus mannu de persones possìbiles in su prus pagu tempus possìbile.

Custu est s’ùnicu modu pro pòdere essire dae sa pandemia, parende fronte a s’aumentu de is contàgios e donende respiru a s’economia de s’Ìsula, oramai dangiada meda dae is limitatziones de su guvernu.

Finas a immoe in Sardigna sunt istadas somministradas 223.87 doses de is 283.190 cunsignadas, est a nàrrere su 79,1% de su totale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Nos devimus iscarèssere is ritos e is usàntzias antigas de Simana Santa chi amus conoschidu dae pitzinnos. Ocannu puru is apuntamentos traditzionales de sa Pasca Manna ant a èssere annullados o modificados.

Difatis, comente at declaradu su governu ghiadu dae Mario Draghi, totu s’Itàlia at a èssere in zona ruja.

Duncas nudda pràngios cun is parentes e nuddas gitas foras de is biddas, che a s’annu coladu etotu. Totus ant at a festare in domo issoro, ognunu pro contu suo.

Comente in su 2020 medas s’ant a iscambiare is augùrios in vìdeocunferèntzia, cun s’ispera chi s’annu chi benit sa Chida Santa si potzat festare comente dd’amus semper connota.

Tocat a nàrrere chi pro sa Sardigna is chidas coladas in zona bianca sunt istadas una befa manna a beru, prus che totu pagu a in antis de Pasca Manna.

Pro is maeres de is bar e ristorantes est unu dannu mannu, pro ite in custas dies de festa diant pòdidu torrare unu pagu de sùlidu a pustis de is meses de serrada.

Tzertu su pensamentu andat puru a is medas chi in totu Itàlia ant pèrdidu familiares e persones istimadas chi a dolu mannu no ant a pòdere prus abbratzare. Parentes chi si nde sunt andados sena ddis pòdere donare mancu un’ùrtimu saludu.

In prus, pro more de custas variantes de su virus, is cuntagiados chi lutant contra sa maladia sunt medas a beru. Pro custu motivu tocat a ringratziare is mèigos e su personale chi traballant in is ispidales, pro ite medas de custos ant a colare is festas in primu lìnia, chirchende de atremenare s’ispàinu de su coronavirus.

Fintzas si at a èssere istragosu meda, tocat a chircare de colare custas dies cun passièntzia, provende a torrare a agatare sa normalidade chi amus pèrdidu.

Ddu depimus a is pipios nostros, pro more chi no ddis siat de pesu meda custa Pasca Manna diversa. Depimus fàghere de totu pro chi non si nde abbìgient de s’istrachesa e de is pessamentos de is mannos.

In custas dies nòdidas, nde podimus aprofitare pro torrare a iscobèrrere is cosas simples de sa vida, mancari alleghende a calore de fogu a costadu de sa zeminera cun totu sa famìlia, o peri in cumpangia de unu betzu chi nos contat calicunu contu antigu, comente si costumaiat a fàghere a unu tempus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”