Nos devimus iscarèssere is ritos e is usàntzias antigas de Simana Santa chi amus conoschidu dae pitzinnos. Ocannu puru is apuntamentos traditzionales de sa Pasca Manna ant a èssere annullados o modificados.

Difatis, comente at declaradu su governu ghiadu dae Mario Draghi, totu s’Itàlia at a èssere in zona ruja.

Duncas nudda pràngios cun is parentes e nuddas gitas foras de is biddas, che a s’annu coladu etotu. Totus ant at a festare in domo issoro, ognunu pro contu suo.

Comente in su 2020 medas s’ant a iscambiare is augùrios in vìdeocunferèntzia, cun s’ispera chi s’annu chi benit sa Chida Santa si potzat festare comente dd’amus semper connota.

Tocat a nàrrere chi pro sa Sardigna is chidas coladas in zona bianca sunt istadas una befa manna a beru, prus che totu pagu a in antis de Pasca Manna.

Pro is maeres de is bar e ristorantes est unu dannu mannu, pro ite in custas dies de festa diant pòdidu torrare unu pagu de sùlidu a pustis de is meses de serrada.

Tzertu su pensamentu andat puru a is medas chi in totu Itàlia ant pèrdidu familiares e persones istimadas chi a dolu mannu no ant a pòdere prus abbratzare. Parentes chi si nde sunt andados sena ddis pòdere donare mancu un’ùrtimu saludu.

In prus, pro more de custas variantes de su virus, is cuntagiados chi lutant contra sa maladia sunt medas a beru. Pro custu motivu tocat a ringratziare is mèigos e su personale chi traballant in is ispidales, pro ite medas de custos ant a colare is festas in primu lìnia, chirchende de atremenare s’ispàinu de su coronavirus.

Fintzas si at a èssere istragosu meda, tocat a chircare de colare custas dies cun passièntzia, provende a torrare a agatare sa normalidade chi amus pèrdidu.

Ddu depimus a is pipios nostros, pro more chi no ddis siat de pesu meda custa Pasca Manna diversa. Depimus fàghere de totu pro chi non si nde abbìgient de s’istrachesa e de is pessamentos de is mannos.

In custas dies nòdidas, nde podimus aprofitare pro torrare a iscobèrrere is cosas simples de sa vida, mancari alleghende a calore de fogu a costadu de sa zeminera cun totu sa famìlia, o peri in cumpangia de unu betzu chi nos contat calicunu contu antigu, comente si costumaiat a fàghere a unu tempus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A dolu mannu Sant’Efis ocannu s’at a festare una die ebbia e in caminu no ddoe ant a èssere is fideles a dd’acumpangiare.

S’isolvimentu de sa promissa a su màrtire gherradore s’at a fàghere comente a s’annu coladu, pro more de s’apretu de su COVID-19.

Su Santu chi – segundu sa traditzione – at liberadu Casteddu dae sa pesta in su sèculu XVII, at a essire dae sa crèsia de Stampaxi sa die de sa festa de is traballadores – s’annu coladu dd’aiant istacadu su 3 de maju -.

Galu non s’ischit de cale colore at a èssere in cussas dies sa Sardigna, ma seguru sa protzessione fatu de is carrelas de Casteddu prenas de gente dae mangianu, chi fiamus acostumados a bìere, no ddoe at a èssere.

Is grupos – seberados – cun su bestire sardu de is biddas no ant a èssere presentes a sa festa prus manna famadas de Sardigna, e prus pagu is fideles de Sant’Efis pro dd’acumpagiare finas a Nora.

In custas dies s’est atopadu su sótziu provitziale pro s’órdine e sa seguresa, ghiadu dae su prefetu Gianfranco Tomeo, paris cun su Munsennore de Casteddu, su presidente de s’Artzicunfraria e in sìndigos de is biddas acanta s’ant a fàghere is tapas de sa protzessione – Casteddu, Pula, Cabuderra, Sarrocu e Santu Perdu -.

Totus ant cunfirmadu chi s’àndala chi s’at a sighire at a èssere sa pròpiu de s’annu coladu, de àtera manera no ddoe at modu de fàghere su tzerimoniale.

S’istàtua de Sant’Efis at èssere carrada a Nora in una vetura aberta, pro more chi sa gente potzat bìdere su santu colende dae is fentanas de is domos.

In su 2020 est istada impreada sa camioneta de sa Rughe Ruja ebbia – una Volkswagen modellu Amarok – pro iscolletare Sant’Efis in unu biàgiu técnicu chi est istada cambada pro permìtere de carrigare s’istàtua pro su pellegrinàgiu.

Sa gente at a pòdere bìdere in televisione sa protzessione cun màrtire cristianu acumpangiadu finas a su logu de su màrtiriu.

Sa die, totus is fideles ant a pedire torra a su Santu nàschidu in Antiòchia sa gràtzia pro s’acabbu de s’epidémia de su coronavirus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”