Sa Procura de Palermo at pedidu su rinviu a giudìtziu de s’ex ministru de s’Internu Matteo Salvini pro is reatos de secuestru de persone e refudu de atos de ufìtziu.

Custu est su chi est acontèssidu a sa fine de s’udièntzia preliminare de su tribunale de Palermo, acanta est imputadu su capu de sa Lega. Segundu s’acusa Salvini in s’austu de su 2019, diat àere negadu in modu illegìtimu s’isbarcu de 147 migrantes sucùrridos a largu de Lampedusa dae sa nave de s’ong Open Arms.

Su leghista at naradu de no èssere apensamentadu, e de àere traballadu semper pro sa defensa de s’Itàlia e pro su respetu de sa lege. At fintzas afirmadu chi durante su mandadu suo de ministru de s’Internu at sarvadu vidas umanas e cun s’operadu suo at permìtidu chi su problema esseret postu a s’atentu de s’Europa.

S’udièntzia preliminare a càrrigu de su senadore est istadu fatu in s’àula bunker de su càrtzere Ucciardone de Palermu, e est incumentzada cun sa recherta de su Procuradore de Palermu Francesco Lo Voi de fàghere assistire s’imprenta a su protzedimentu chi pro lege s’acumprit a ghennas cungiadas.

Ma ite arriscat Salvini? Sa pena prevìdida, comente at torradu a nàrrere dae su caporione de sa Lega, est de 15 annos.

Segundu su procuradore de Palermu su protzessu contra Salvini no est un’àutu polìticu, sende chi, semper segundu su Francesco Lo Voi, is congruidas a is cales sunt arribbados e is testimonias regortas durante s’istrutòria portant a retènnere chi si tratet de un’atu amministrativu.

In prus s’ex presidente de su Consìgiu Conte diat àere naradu chi non s’est mai discussu in Consìgiu de is ministros de is sìngulos casos. Pro sa cuntzessione de su Pos su Cdm non s’est mai ocupadu e chi niuna detzisione est istada mai cumpartzida e chi su problema de sa re-distributzione fiat unu problema generale e no acapiadu a is sìngulos casos.

Non ddoe diat èssere istada niunu cumpartzimentu cun is àteros esponentes de su Guvernu. Sa detzisione diat èssere istada de su ministru de s’Internu ebbia, e comente diat àere naradu su ministru Di Maio, is àteros nde sunt istados informados solu gràtzias a unu tweet de Salvini. Su cumpartzimentu dae banda de totu su guvernu de tando, diat àere interessadu petzi sa ridistributzione de is migrantes.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A dolu mannu sa Sardigna est istada decrassada torra in zona aràngiu, a pustis de tres chidas chi fiat in zona bianca.

Una befa pro totu is sardos pro ite custa detzisione, segundu is disponimentos prevìdidos dae s’ordinàntzia de su Ministru de sa Salude, Roberto Speranza, bolet nàrrere chi ant a èssere pigadas mesuras meda prus severas pro atremenare s’ispàinu de su Covid-19.

Tzertu, su nùmeru dae is positivos a su coronavirus at crèschidu, cun su Rt a 1,08, ma s’arriscu de sa cundidura est abarradu moderadu cun is àteros paràmetros de zona bianca. Difatis de is bator indicadores importantes, su chi at peoradu est su pesu de is casos ativos ogni 100.000 abitantes, a s’imbesse sa pertzentuale de is letos ocupados in is terapias intensivas, su pesu de s’andamentu de is epitzentros de contàgiu e sa cumpletesa e sa lestresa de trasmissione de is datos, sunt abbarados bonos.Su problema est chi immoe no est prus prevìdida sa zona groga, una fàscia amus a nàrrere mesantera cun limitatzione prus lèbias.

Su passàgiu dae biancu a aràngiu est un’iscomùniga pro is atividades de sa ristoratzione e de su cummèrtziu, chi in is tres chidas coladas ant torradu a torrare unu pagu de sùlidu a pustis is meses de acorru dèpidos a sa pandemia. Comente a primu is locales no ant a pòdere abèrrere a is clientes e is butegheris ant a pòdere bèndere a domitzìliu e bia. In prus s’òrdine de ritiru abarrat finas a is 22.00.

Sa zona aràngiu at a incumentzare in modu ufitziale custu lunis, e seguramente tra oe e cras s’at bìdere prus gente in caminu, e medas esertzìtzios ant a lassare abertu pro balangiare calicuna cosa in prus finas a s’ùrtima die.

Si sa Sardigna at abarrare in zona aràngiu, pro Pasca Manna at a èssere in zona ruja, bitu chi at a èssere difìtzile meda chi in chidas benentes si potzat torrare a sa normalidade – francu sorpresas -.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”