Un’ atmosfera chi non si biviat dae is tempos de sa Gherra Frita, fintzas pro ite su mere nou de sa Domo Bianca – in pagos faeddos- at acusadu a Vladimir Putin de èssere unu mortore.

Su presidente russu no at isetadu meda a torrare isceda a Biden, narende chi chie acusat a calicunu de èssere un’omitzida, est dàbile chi prusaprestu ddu siat issu etotu.

In s’ora s’ambasciadore russu a Washington, Anatoli Antonov, at a lassare sa capitale americana sàbadu, cun s’òrdine de contoniare in pàtria pro consultatziones, e si pensat fintzas chi Putin at a fàghere su pròpiu. Seguru sa Rùssia at a pretèndere acrarimentos dae banda de is americanos pro su chi at naradu Biden.

Mosca pro immoe est movende·si in manera diplomàtica, fintzas pro ite is faeddos graes de su nou presidente americanu ant ispantadu unu pagu a totus.

Acusas chi ant fatu ispantu fintzas a is àteros Paisos, cumbintos chi sa lìnia polìtica de su presidente nou diat èssere istada prus pagu treulada.

Mancari gasi pariat chi is raportos tra is duas natziones deperet andare in manera diversa, a pustis de sa pròroga de su “New Start”, su tratadu chi règulat su nùmeru de is testadas nucleares. Un’acòrdiu chi Mosca aiat semper propostu, ma s’amministratzione Trump aiat mai atzetadu.

A pesare in is decraros de Biden, ddoe est su casu Navalny – su printzipale dissidente de Putin chi est in càrtzere – e is peri acusas de is servìtzios segretos americanos a sa Rùssia, chi diat àere chircadu de cunditzionare is eletziones americanas a dannu de Biden pro agiudare a Trump.

Su presidente nou, a ogna contu, non cùngiat is ghennas narende de èssere prontu a traballare cun Mosca subra is chistiones de interessu americanu. Putin at rispostu de èssere disponìbile issu, ma solu si at a cumbènnere a sa natzione sua, in prus at fatu sa proposta de un’atòbiu in video-cunferèntzia tra Rùssia, USA e àteros Paisos, abertu a su pùblicu e in mundu-visione.

E s’Itàlia? Su Ministru de is èsteros, Luigi De Maio, puru pedende craresa a pitzu de su tema de is deretos umanos, cumbidat de tènnere abertos is canales de comunicatzione e de cooperatzione cun sa Rùssia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu depet ismentigare a lestru sa partida contra sa Juventus e torrare a pigare s’àndala pro pòdere abarrare in Sèrie A.

Pro is casteddajos s’aversàriu benente at a èssere su Spezia, un’iscuadra chi est fàghende un’istajone bona, tenende contu chi est un’iscuadra promòvida a nou.

A ghiare is lìgures ddoe est su tècnicu Vincenzo Italiano, chi est istadu capatzu dae pònnere in dificultade iscuadras fortes meda de su campionadu, bastat a pensare a sa vitòria contra su Milan.

Pro custu puru at èssere una partida istragosa meda pro is ruju-blu, chi sunt falados in is partes bàscias de sa classìfica pro more de sa vitòria de eris sero de su Torino contra su Sassuolo pro tres a duos.

Tzertu, pro su Casteddu pesat galu sa partida pèrdida contra sa Juventus, mescamente pro is tres gol marcados dae Cristiano Ronaldo in su primu tempus.

Custu pro ite a is giogadores sardos est mancadu s’apretu e sa gana de fàghere puntos, netzessària pro chircare de adderetzare s’istajone.

In prus de custu si ddoe est postu s’àrbitru puru, chi non che at bogadu a Ronaldo pro cussa calada de pee a iscarigadura de su portieri Alessio Cragno.

Una detzisione birgongiosa chi de seguru at cunditzionadu su resurtadu finale. Difatis is òmines de Leonardo Semplici, cun unu giogadore in prus, diat àere pòdidu a su mancu paregiare. Su presidente Tommaso Giulini, in custas dies, at sighidu is ùrtimos allenamentos de is casteddajos pro indanimare s’iscuadra.

At a bastare custu pro fàghere torrare sa gana de bìnchere a is sardos e fàghere bìdere sa balentia issoro a is tifosos casteddajos?

Isperamus chi siat aici. Siat a èssere una làstima a s’arrèndere pròpiu immoe, pro ite su Casteddu podet galu nàrrere sa sua in Sèrie A.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22″