Nudda de fàghere pro Luna Rossa. Sa barca italiana s’est dèpida a arrèndere a New Zealand chi est torra resèssida a difèndere sa Copa Amèrica galu pro 7 regatas a 3.

Mancari in is primos apuntamentos is italianos apant mustradu ca s’imbarcatzione fiat pronta a parare fronte a su Defender de is meres de domo, cun su resurtadu de is regatas firmu 3 a 3, is ùrtimas garas ant premiadu is “All Black”.

Tocat a nàrere chi is òmines de su Skipper Max Sirena sunt istados collionados puru dae sa sorte, difatis pro duas regatas, cando sa barca issoro s’agataiat a in antis meda de is aversàrios e teniant sa vitòria a portada dae manos, su bentu at sessadu de tirare. Custa cosa at fatu arròschere s’imbarcatzione italiana , permitende a New Zealand de lòmpere dae palas e de bìnchere.

Is italianos duncas non che dd’ant fata. Custu est su de battor annos chi un’iscuadra italiana partètzipat a is regadas chi assignant sa Copa Amèrica, pro portare “su pannu” in Itàlia.

Tzertu nemos s’at a ismentigare de Luna Rossa 2021 chi cun una bella gara at bìnchidu sa Prada Cup contra sa barca inglesa Ineos, e gràtzias a custu resurtadu at pòdidu cumpètere pro sa Copa Amèrica.

Ma is neozelandesos ant cumpresu chi dae immoe in susu ant a dèpere fàghere is contos cun is italianos, chi ant a sighire a s’allenare pro s’ editzione nùmeru 37 de sa cumpetitziones isportiva de vela prus antiga de su mundu, chi ocannu at festadu is 170 annos de vida.

Isperamus chi siat sa bia bona pro pònnere su nùmene dae Luna Rossa in su trofeu e batire is regatas de Copa Amèrica a Casteddu.

Sa barca de su mere Patrizio Bertelli – amministradore delegadu de Prada – difatis s’est preparada pròpiu in su cabu-logu sardu, in ue ddoe est sa base, acanta su Skiper Max Sirena est che unu de domo, e in s’iscuadra sunt presentes 14 sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22″

Su Casteddu at paregiadu 2-2 contra sa Sampdoria, a pustis de una partida bella a beru.

Is sardos, pro comente si fiat posta sa gara in su segundu tempus, torrat dae Genova cun unu puntu de oro.

Difatis is òmines de Semplici sunt resèssidos a colare in vàntagiu – in su primu tempus – gràtzias a su gol de su brasilianu Joao Pedro, a pustis de unu tiru lestru chi at coglionadu su portieri Audero.

Ma s’iscuadra doriana de s’ex allenadore Ranieri, òmine sabiu meda, at reagidu in is ùrtimos 25′ minutos de giogu, marchende duas retes.

Prima cun una calada de pee de su tertzinu Bereszynski e poi cun un’àteru tiru de s’atacante Gabbiadini – intradu in campu pagos minutos a in antis -.

Immoe i sardos non sunt prus s’iscuadra iscambada e sena gana de gherrare de is chidas coladas: sun prus unidos e sunt renessende a fàghere bìdere totu su caràtere issoro.

Custu assentu at fatu lòmpere is casteddajos a su parègiu a sa coa de sa partida, gràtzias a Nainggolan – su giogadore prus famadu de is ruju-blu – chi at marcadu su gol de su 2-2.

Pregiadu meda pro su resurtadu s’allenadore nou Semplici, chi at fatu is complimentos a is òmines suos, ma sena festare meda, antzis, pensende a sa partida benente.

Su Casteddu at a giogare contra sa Juventus in sa Sardigna Arena, ca eris est istada bogada dae sa Copa de is Campiones pro manu de is portoghesos de su Porto.

Pro is sardos at a èssere una partida isconchiosa meda pro ite is biancu-nieddos ant a èssere afelonados ca non sunt resèssidos a adderetzare su resurtadu de andada de sa manifestatzione de Fùbalu prus importante in Europa.

Ronaldo puru, su mègius giogadore de Sèrie A, eris at delusu, e seguru at a bòlere fàghere bìdere su valore suo pròpiu contra is sardos.

Sa partida chi benit no at a èssere fàtzile duncas. Su Casteddu at a dèpere donare cura a non repìtere is matessi isbàllios de sa partida pèrdida contra s’iscuadra de Pirlo in su girone de andada e proare a regalare una bella satisfatzione a is tifosos sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”