Su Fèstival de Sanremo sighit a abarrare un’eventu isetadu e sighidu meda in totu Itàlia.

S’editzione 2021 de su Fèstival de Sanremo est andada in direta dae su 2 a su 6 de martzu e at bidu sa partetzipatzione de 26 artistas pro sa setzione Campiones e oto pro sa setzione Propostas noas.

Su fèstival de sa cantzone italiana at bidu sa vitòria de is Maneskin, banda rock de giòvanos romanos chi, a pustis de àere retzidu custu trofeu, ant a dèpere rapresentare s’Itàlia a s’Eurovision Song Contest, su cuncursu musicale europeu, in programma su mese de maju.

A su segundu postu s’est classificada sa còpia Fedez e Francesca Michelin e a s’ùrtimu iscaleri de su pòdiu Ermal Meta.

Su cantautore e rapadore Willie Peyote s’est agiudicadu su prèmiu de sa crìtica Mia Martini cun sa sua “Mai dire mai (Sa locura)”.

Su duetu formadu dae Colapesce e Dimartino at retzidu su prèmiu Lucio Dalla pro su petzu: “Musica leggerissima”.

Sa cantante Madame at bìnchidu su prèmiu Sergio Bardotti pro su mègius testu, cuddu de “Voce”, gasi comente su prèmiu Lunezia, pro su petzu de prus balore musicale-literàriu.

Ermal Meta binchet cun “Un milione di cose da dirti” su prèmiu Giancarlo Bigazzi e Davide Shorty, in gara tra is propostas noas, at bintu su prèmiu Enzo Jannacci.

In fines Gaudiano, si leat in domo su Leontzinu comente primu classificadu tra is Propostas noas.

Dignos de remenu is meres de domo Amadeus e Fiorello, chi sunt istados capassos de istentare is telespetadores in custu momentu istòricu difìtzile cunditzionadu dae su Covid-19.

Mancari su prus pagu dinari postu a disponimentu pro sa manifestazione, Amadeus est resèssidu a batire in su palcu medas personàgios famados, chi no ant fatu intèndere sa mancàntzia de is istellas internatzionales de is annos colados.

Non sunt mancadas mancu ocannu is polèmicas, chi faghet parte de su Fèstival, ma fiat pretzisu a donare unu sinnu de ripresa a totu su mundu de s’ispetàculu proadu meda dae custos meses de firmu e de limitatziones.

S’isperat chi s’annu chi benit Sanremo si potzat fàghere cun su pùblicu presente in su teatru de s’Ariston, un’ausèntzia chi s’est intèndida meda a beru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In Isvètzia un’òmine at agurteddadu diversos passantes.

Est acontèssidu a Vetlanda – 12 mìgia abitantes -, e is incuirentes pensant chi si tratet de “un’atacu terrorìsticu”, fintzas a immoe s’allegat de tentadu omitzìdiu.

Su fatu est sutzèdidu bia merie, in una zona frecuentada meda, a presu de s’istatzione ferroviària de sa tzitadina.

Diversas persones chi ant donadu in deretura s’avisu, faeddende de un’atacu chi s’est acumpridu a sa lestra in 5 logos diversos unu fatu a s’àteru.

Is testimòngios chi ant assistidu a s’iscena ant contadu a sa giustìtzia de àere bidu un’òmine armadu de istrale e de gurteddu.

Is autoridades ant acorradu su tzentru de sa tzitadina, firmende fintzas sa lìnia ferroviària, chi est istada torrada a abèrrere a pustis de una pariga oras.

S’agressore est unu pitzocu de 20 annos. Pro ddu firmare sa politzia dd’at isparadu a is cambas e a pustis de s’arrestu dd’at leadu a s’ispidale.

Is feridos puru sunt istados sucursos in deretura e acumpangiados de presse in ambulantza a is prontos sucursos de sa tzitade. Sa portaboghe de sa politzia de sa regione Est, Angelica Israelsson, at naradu chi duas de is vìtimas sunt a istadu malu.

Su ministru de s’Internu isvedesu, Mikael Damberg, at definidu s’atacu “terrorosu”, ma no at fatu àteras decraratziones.

S’indagat pro intentada ochisura, ma si sighit peri sa pista terrorìstica. In passadu, in su nadale de su 2010, duas esplosiones belle simultàneas ant corfidu su tzentru de Istocolma, provochende unu mortu e duos feridos. Si fiat tratadu de un’atentadu suitzida, pretzèdidu dae minetzas de tenore jihadista, acanta si cundennaiat tra is medas cosas sa presèntzia militare de s’Isvètzia in Afganistàn.

Sete annos a pustis, in abrile, semper in sa capitale, unu uzbeku radicalizadu, chi dd’aiant refudadu s’asilu polìticu, nd’aiat boddidu unu muntone de gente in caminu cun un’autocarru furadu, ochiende chimbe persones. Interrogadu dae sa politzia aiat naradu chi si boliat vengare pro gherra de is otzidentales contra s’Isis.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”