Sa Sardigna bolet difèndere sa “Zona Bianca”, otenta gràtzias a su sacrifìtziu de is tzitadinos sardos.

Dd’at naradu su presidente de sa Regione Christian Solinas, durante sa trasmissione radiofònica de RAI Radio Uno “Un giorno da pecora”.

Su guvernadore at evidentziadu chi chie at a resurtare negativu a su tampone pro su Covid a s’isbarcu in is portos e aeroportos de s’Ìsula, ant a pòdere intrare in su territòriu regionale, imbetzes cussos positivos a su virus, ant a dèpere sighire a pilu e sinnu totu is protocollos prevìdidos dae is normativas.

Solinas at pretzisadu chi sa Regione s’at a cumportare in custu modu pro more de tutelare sa Salude Pùblica. Unu detzisu chi de seguru nd’at a pesare medas chèscias, gasi comente est capitadu cun is passaportos sanitàrios.

Ma custa borta nch’est su pretzedente de sa Sitzìlia. Difatis dae sa segunda chida de freàrgiu su presidente Musumeci at emanadu un’ordinàntzia chi previdet controllos severos pro totu is chi intrant in s’ìsula.

Difatis sunt istados ativados puntos de controllu a s’abertu pro sutapònnere a tampone lestru is chi isbarcant dae is naves e dae is aèreos. Su provedimentu at a bàlere finas a chenàbura su 5 de martzu. In prus de custu is chi intrat in Sitzìlia tenent s’òbligu de s’assentare in una prataforma fata apositamente pro cussu.

in s’ora chi bèngiat ativada sa mesura remonada dae su guvernadore sardu, in Sardigna sighit sa somministratzione de su vatzinu Anti Covid is betzos de prus de 80 annos.

Custa campagna de vatzinatzione est fundamentale pro cussa parte de sa populatzione prus dèbile e at a permìtere, paris cun is tampone de massa, de èssere prus trancuillos pro is meses imbenientes.Fintzas pro ite s’istade est apresiendesi e medas traballadores istajonales sunt isperant de pòdere cumentzare a traballare.

Tando bene bèngiant totu is medidas – in su respetu de is leges – pro bìnchere su coronavirus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Crotone-Casteddu est istada una partida istragosa meda pro is òmines de Leonardo Semplici. Is calabresos ant àpidu ocasiones meda pro marcare ant postu is casteddajos in dificultade prus de una borta.

Ma in su retàngulu birde ddoe teniat Leonardo Pavoletti, chi at mustradu chi comente prima punta est prus forte de Simeone.

S’atacante sardu at marcadu su primu gol de conca, a pustis de unu brìnchidu in mesu a is giogadores aversàrios, gràtzias a unu servìtziu de su tertzinu Charalampos Likogiannys. Fatu fatu su giogadore nàschidu a Livorno at procuradu unu rigore, chi est istadu iscutu e marcadu dae su capitanu Joao Pedro.

Su resurtadu finale est istadu duos a zero pro su Casteddu, unu triunfu pro is binchidores e grandu prègiu pro is tifosos casteddajos, chi isperant chi s’iscuadra si potzat sarbare dae sa ruta in Sèrie B.

S’allenadore nou de is ruju-blu pro, custa partida, paret chi nche dd’apat fata a risòlvere su problema de s’atacu, chi dae su mese de onniasantu a oe no est resèssidu a nche istichire sa botza in porta.

Is sèberos de Semplici sunt serbidos pro torrare a fàghere tres puntos a pustis de prus de tres meses, ma s’àndala pro sighire a abarrare in sa màssima categoria de su fùbalu italianu est galu longa meda.

Comente at naradu su tècnicu de is ruju-blu, chi at fatu is cumplimentos a s’iscuadra sua, mèrcuris sero tra is muros amigos de su Sardigna Arena, ddoe at èssere un’àtera partida istragosa meda contra su Bologna.

Is òmines de Sinisa Mihajlovic si presentant in Sardigna de muta bona, a pustis de sa partida bìnchida contra sa Lazio pro duos a zero.

In sa partida chi benit s’at a bìdere si su Casteddu at èssere galu perigulosu e cuntzentradu comente cumandat Semplici e prus che totu si superadu a beru sa crisi de resurtados.

Isperamus chi su prenetu de is giogadores prus famados comente Godin, Nainggolan, Joao Pedro e torra Pavoletti at a serbire a indanimare totu is àteros cumpàngios, finas a sa vitòria.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”