Zoom – Zoom Video Communications – est una sotziedade de servìtzios de telecunferèntzia cun sede a San Jose in Califòrnia chi frunit servìtzios de cunferèntzia remota chi cumbinat videocunferèntzias, riuniones in lìnia, tzarradas e collaboratzione mòbile.
At cunfirmadu in unu messàgiu ufitziale in su blog cosa sua, chi at a pònnere a disponimentu sa trascritzione de is sutatìtulos pro totus, intro s’agabbu s’annu. Sa cumpangia at ispiegadu puru comente at a funtzionare sa novidade.
Sa funtzionalidade at a èssere a tempus reale. Si basat in s’inteligèntzia artifitziale chi est giai impreada pro sa funtzione “Live Transcription”, disponìbile pro is impitadores chi pagant unu cànone in abbonamentu ebbia.
S’òspite de s’aposentu – est a nàrrere chi at creadu s’arresonu – at a pòdere abilitare sa visualizatzione de is sutatìtulos diretamente dae su programma de navigatzione o dae s’aplicativu.
Una diferèntzia non de pagu contu in cunfrontu a oe, pro ite is iscritos, prus che totu cussos sena abbonamentu, ant a pòdere tènnere profetu de sa trascritzione de su testu in tempus reale. Una funtzionalidade fundamentale pro is impitadores chi no intendent, chi finas a immoe non teniant sa possibilidade de pòdere sighire un’arresonu in lìnia, opuru deviant isetare sa visualizatzione de paràulas postas a manu dae is organizadores de sa videocunferèntzia.
Non s’ischit galu cando custa novidade at a essire, ma chi tenet problemas a s’uditu podet giai fàghere sa recherta de visualizatzione de is sutatìtulos, imbuchende in si pàginas de suportu de Zoom e isetende s’ativatzione de su sèberu pro su contu personale.
Ma est pretzisu a nàrrere chi sa trascritzione est disponìbile in inglesu ebbia e s’isperat chi cando at a èssere posta a disponimentu de totus sos impitadores, ddoe at a èssere sa possibilidade de tènnere sutatìtulos peri in àteras limbas.
Tocat a nàrrere chi is sutatìtulos automàticos sunt disponìbiles fintzas in àteros servìtzios de videocunferèntzia comente Google Meet e Microsoft Teams, e bida sa popularidade chi custa tipologia de aplicatzione est leende, est una cosa bona a beru donare sa possibilidade a is persones cun disabilidades tènnere trastos comente a custu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Dae lunis sa Sardigna at a colare in zona bianca, gràtzias a megioramentu de is paràmetros de s’ispàinu de su Covid-19.

Sa cunfirma est istada antitzipada dae s’assessore regionale a sa Sanidade Mario Nieddu, a pustis de àere chistionadu cun su presidente de s’Istitutu Superiore de sa Sanidade Silvio Brusaferro, e fatu fatu est essida s’ordinàntzia de su ministru de da Salude Roberto Speranza.

Sa matessi ordinàntzia, segundu is disponimentos prevìdidos, at assignadu is colores noos a totus is regiones italianas e sa Sardigna est s’ùnica chi est colada a sa zona bianca.

Difatis medas regiones sunt istadas decrassadas in zona àrangiu – Lombardia, Piemonte e Marche – e àteras de ruju — Basilicata e Molise -. Su passàgiu a sa zona ruja de su Molise est istadu pedidu dae su presidente de sa regione, Donato Toma.

Duncas, a diferèntzia de s’Ìsula, totu s’Itàlia at a tènnere limitatziones. Sa classificatzione noa pro is sardos est istada fata tenende contu de s’arriscu valutadu dae s’aplicatzione de medas critèrios, pro su prus automàticos, elaborados cun un’algoritmu, chi sunt istados seberados pro cumpudare s’andamentu de s’epidèmia e pertocant diversos àmbitos.

In s’ùrtimu perìodu de controllu, in Sardigna, is resurtados sunt megiorados medas. Indicadores importantes comente sa pertzentuale de ocupatzione de is postos letu in is terapias intensivas e su pesu de is casos ativos ogni 100.000 abitantes, sunt falados.

Su passàgiu a sa zona noa de apartenèntzia, cun belle nudda limitatziones, est istadu retzidu cun praghere mannu dae totus is sardos, mescamente dae is tzillerajos e ristoradores.

Ma però, a dolu mannu, calicuna bidda de sa Sardigna at a abarrare in zona ruja, pro more de sa variante inglesa de su Covid-19.

Bida sa situatzione, podet sutzèdere de totu, sende chi custa pesta malaita no est acabbada e tocat a sighire a donare cuidadu, bidu s’arriscu cuncretu de un’àtera undada de Covid.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”