Su ministru de sa Salude Roberto Speranza, in Parlamentu, at naradu chi sunt arribende règulas noas chi ant a bàlere finas a Pasca Manna.

Custa detzisione est istada pigada pro ite chircare de firmare sa variante inglesa de su Covid-19, chi tra pagu tempus at a èssere sa prus presente in Itàlia. In prus ddoe est sa timòria chi s’ìnditze Rt – sa mesura potentziale de sa contagiosidade de su Coronavirus – nche potzat isciaddire s’1 pro chentu e in medas regiones is terapias intensivas ant a lòmpere a prus de su 30%.

Pro totus custos motivos, su guvernu at cumpresu chi non nche sunt is cunditziones pro abrandare is règulas contra s’isparghimentu de su Covid-19.

Su Dpcm nou at a èssere in vigèntzia dae su 6 de martzu e at a bàlere finas a su 6 de abrile. Tocat a pònnere mente a custos disponimentos, pro ite chi s’at a torrare a ispainare s’epidèmia diat a èssere unu dannu mannu pro is ispidales e pro su pianu de is vatzinatziones.

In is dies coladas Mariastella Gelmini, sa ministra noa de is Afares Regionales, a s’atopu cun is presidentes de is Regiones, at presentadu is mesuras chi s’ant a pònnere a campu.

Tocat a nàrrere sa variante inglesa faghet tìmere in Sardigna puru: est donende pensamentu prus che totu su nord de s’Ìsula, acanta ddoe at biddas chi s’agatant in zona ruja. Est una noa de oe, ca su sìndigu de Madalena puru, in finis, at detzìdidu de cungiare totu.

Pro bonasorte de is sardos is medas laboratòrios regionales chi sunt impinnados a cumprèndere cales siant is variantes de su Covid-19 prevalentes in Sardigna, sunt traballende bene a beru. Sunt pròpiu custos tzentros de anàlisi chi ant individuadu is primos contàgios de sa variante noa in Bono.

Oe s’Assessore de sa Sanidade, Mario Nieddu, at naradu chi forsis sa Sardigna at a pòdere intrare in sa zona bianca, ma ddoe tenet medas sìndigos chi sunt pensende de annuntziare un’ordinàntzia cun limitatziones pro parare fronte a custa pesta malaita de sa variante inglesa de su Covid.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu chi at a èssere de iscena domìnigu in s’Istàdiu Scida, contra su Crotone, at a bìdere s’esòrdiu de s’allenadore nou Leonardo Semplici.

Una gara particulare pro is sardos, sa prima sena su tècnicu Eusebio Di Francesco, esoneradu in custas dies coladas, a pustis dae sa partida pèrdida contra su Torino.

A s’ex tècnicu dd’at a aspetare unu còmpitu difìtzile meda, pro ite dae immoe in susu at a dèpere calare in campu pro chircare de sarbare s’iscuadra sarda dae sa ruta in Sèrie B. Pro custa missione istragosa meda dd’at a serbire sa disponibilidade de totu is giogadores de sa rosa.

Sa prima proa cun s’iscuadra calabresa chi est s’ùrtima in classìfica, est una gara “piàdiga” cun s’allenadore Stroppa bravu meda, mancari pro immoe est resèssidu a boddire pagos puntos.

Is casteddajos si presentant cun un’iscuadra avilida meda, e at a tocare a is giogadores prus famados comente Godin, Nainggolan e Joao Pedro a chircare de apaghiare totu in àteros cumpàngios.

Tzertu, primu de totu at a èssere sa cunditzione fìsica de s’iscuadra a nàrrere si is ruju-blu ant a tènnere is cartas pro torrare a bìnchere a pustis de prus de tres meses.

Non s’ischit cale at a èssere su mòdulu nou de is sardos, bìdidos is possìbiles càmbios chi Semplici at a fàghere in difesa, tzentru-campu e atacu.

Podet èssere chi s’iscuadra gioghet cun bator difensores in su repartu arretradu, tres tzentrucampistas in mediana e unu trecuartista a palas de sa còpia de atacu. Ma custas sunt ipòtesi ebbia.

Seguru, s’allenadore nou at a dèpere risòrvere su problema de su repartu de in antis chi at marcadu belle nudda dae su mese de onniasantu a oe.Pro custu motivu, s’attacante Pavoletti tenent s’ocasione fortzis de apetigare su retàngulu birde de s’istàdiu calabresu e mustrare chi est prus balente de Simeone.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”