Dae lunis sa Sardigna at a colare in zona bianca, gràtzias a megioramentu de is paràmetros de s’ispàinu de su Covid-19.

Sa cunfirma est istada antitzipada dae s’assessore regionale a sa Sanidade Mario Nieddu, a pustis de àere chistionadu cun su presidente de s’Istitutu Superiore de sa Sanidade Silvio Brusaferro, e fatu fatu est essida s’ordinàntzia de su ministru de da Salude Roberto Speranza.

Sa matessi ordinàntzia, segundu is disponimentos prevìdidos, at assignadu is colores noos a totus is regiones italianas e sa Sardigna est s’ùnica chi est colada a sa zona bianca.

Difatis medas regiones sunt istadas decrassadas in zona àrangiu – Lombardia, Piemonte e Marche – e àteras de ruju — Basilicata e Molise -. Su passàgiu a sa zona ruja de su Molise est istadu pedidu dae su presidente de sa regione, Donato Toma.

Duncas, a diferèntzia de s’Ìsula, totu s’Itàlia at a tènnere limitatziones. Sa classificatzione noa pro is sardos est istada fata tenende contu de s’arriscu valutadu dae s’aplicatzione de medas critèrios, pro su prus automàticos, elaborados cun un’algoritmu, chi sunt istados seberados pro cumpudare s’andamentu de s’epidèmia e pertocant diversos àmbitos.

In s’ùrtimu perìodu de controllu, in Sardigna, is resurtados sunt megiorados medas. Indicadores importantes comente sa pertzentuale de ocupatzione de is postos letu in is terapias intensivas e su pesu de is casos ativos ogni 100.000 abitantes, sunt falados.

Su passàgiu a sa zona noa de apartenèntzia, cun belle nudda limitatziones, est istadu retzidu cun praghere mannu dae totus is sardos, mescamente dae is tzillerajos e ristoradores.

Ma però, a dolu mannu, calicuna bidda de sa Sardigna at a abarrare in zona ruja, pro more de sa variante inglesa de su Covid-19.

Bida sa situatzione, podet sutzèdere de totu, sende chi custa pesta malaita no est acabbada e tocat a sighire a donare cuidadu, bidu s’arriscu cuncretu de un’àtera undada de Covid.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su ministru de sa Salude Roberto Speranza, in Parlamentu, at naradu chi sunt arribende règulas noas chi ant a bàlere finas a Pasca Manna.

Custa detzisione est istada pigada pro ite chircare de firmare sa variante inglesa de su Covid-19, chi tra pagu tempus at a èssere sa prus presente in Itàlia. In prus ddoe est sa timòria chi s’ìnditze Rt – sa mesura potentziale de sa contagiosidade de su Coronavirus – nche potzat isciaddire s’1 pro chentu e in medas regiones is terapias intensivas ant a lòmpere a prus de su 30%.

Pro totus custos motivos, su guvernu at cumpresu chi non nche sunt is cunditziones pro abrandare is règulas contra s’isparghimentu de su Covid-19.

Su Dpcm nou at a èssere in vigèntzia dae su 6 de martzu e at a bàlere finas a su 6 de abrile. Tocat a pònnere mente a custos disponimentos, pro ite chi s’at a torrare a ispainare s’epidèmia diat a èssere unu dannu mannu pro is ispidales e pro su pianu de is vatzinatziones.

In is dies coladas Mariastella Gelmini, sa ministra noa de is Afares Regionales, a s’atopu cun is presidentes de is Regiones, at presentadu is mesuras chi s’ant a pònnere a campu.

Tocat a nàrrere sa variante inglesa faghet tìmere in Sardigna puru: est donende pensamentu prus che totu su nord de s’Ìsula, acanta ddoe at biddas chi s’agatant in zona ruja. Est una noa de oe, ca su sìndigu de Madalena puru, in finis, at detzìdidu de cungiare totu.

Pro bonasorte de is sardos is medas laboratòrios regionales chi sunt impinnados a cumprèndere cales siant is variantes de su Covid-19 prevalentes in Sardigna, sunt traballende bene a beru. Sunt pròpiu custos tzentros de anàlisi chi ant individuadu is primos contàgios de sa variante noa in Bono.

Oe s’Assessore de sa Sanidade, Mario Nieddu, at naradu chi forsis sa Sardigna at a pòdere intrare in sa zona bianca, ma ddoe tenet medas sìndigos chi sunt pensende de annuntziare un’ordinàntzia cun limitatziones pro parare fronte a custa pesta malaita de sa variante inglesa de su Covid.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”