Su polìticu lombardu at a èssere in Casteddu lunis su 1 de martzu in ocasione de su protzessu pro sa cuerela presentada contra un’ativista sardu, Marco Aresu, acusadu de àere iscritu unu messàgiu in facebook contra a Salvini

Su giòvanu, segundu s’acusa diat diat àere invocadu pratza Loreto contra Salvini, in ocasione de sa bìsita sua in su 2017 in su cabulogu isulanu.

Non si connoschent àteros particulares de sa bìsita de su senadore de sa Lega, ma s’est ischidu chi forsis ddoe at a èssere un’atopu cun su presidente Solinas a pràngiu, in unu ristorante de sa tzitade.

Su guvernadore e su capu leghista ant a tènnere modu de allegare de vàrios temas, bidu chi su partidu fundadu dae Umberto Bossi est su chi at agiudadu de prus a Solinas a bìnchere is ùrtimas regionales e immoe est una de is fortzas de sa majoria chi faghet parte de s’esecutivu de Mario Draghi.

Seguru ant a faeddare de is meda progetos de su Recovery Fund chi cantu prima su presidente de sa Regione at a presentare in su Cussìgiu de bia Roma e a su guvernu natzionale.

Medas s’isetant peri chi ddoe ant a èssere crarimentos pro is ùrtimos dolores de bentre tra is cumponentes de sa majoria e de sa giunta sarda, e podet èssere chi sa presèntzia de Salvini potzat serbire a agatare solutziones e a apaghiare is ànimos.

Semper lunis, a ora de is 10.30 dae in antis de su tribunale de Casteddu, s’Assòtziu Libertade at organizadu un’atòbiu de sustegnu a Marco Aresu.

S’assòtziu narat chi s’ativista sardu diat àere fatu una crìtica polìtica ebbia a s’ex ministru de s’Internu Salvini. Su messàgiu de Aresu, semper segundu Libertade, diat èssere petzi una valutatzione in is cunfrontos de unu polìticu chi at fatu de s’òdiu e de sa timoria bia is prus dèbiles un’istrumentu pro otènnere cunsensu.

Su messàgiu però a Aresu dd’est costada un’acusa pro reatos de difamatzione, istigatzione a delìncuere e minetzas contra a Salvini, chi comente risartzimentu diat bòlere una summa de 30.000 èuros.

“Espressende sa solidariedade nostra a Mauro,- concruit su comunicadu de s’Assòtziu sardu- denuntziamus su chi pro nois est unu tentativu craru de pònnere timòria e de tapare sa buca a sa libertade de espressione pro manu de is istitutziones repressivas italianas”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Timoria pro sa variante inglesa de su Covid in Sardigna, a pustis chi sunt essidos a campu àteras cundiduras.

Donat pensamentu su nord de s’Ìsula, in ue Santu Diadoru est intradu in zona ruja.

Pro immoe su sìndigu de Sa Madalena s’est torradu a crèere: a pustis de àere intesu s’assessore Mario Nieddu e is autoridades de sa sanidade sarda. Su primu tzitadinu madaleninu, Fabio Lai, difatis at seberadu de parpare.

Cunfirmadu dae su sìndigu Giuseppe Porcheddu unu casu de variante inglesa de su Coronvirus a Budune. Fintzas in custu casu est positiva una minorenne – comente in Madalena etotu, acanta est sa cuntagiada est una pisedda de 11 annos -.

In s’ora in Bono, prima zona ruja de sa Sardigna e ue s’est registradu su primu epitzentru epidemiològicu isulanu, custu mangianu est cumentzada sa campagna de monitoràgiu bòlida dae Ares-Ats pro atremenare sa presèntzia de sa variante inglesa.

In Terranoa imbetzes su sìndigu at detzìdidu de cungiare bator iscolas e autorizare sa didàtica de tesu a pustis de un’aumentu repente de is contàgios.

In su mentres is laboratòrios de sa Gaddura, de su Tataresu e de sa Provìntzia de Nùgoro, sunt traballende pro cumprèndere cales siant sas variantes de su Covid-19 prevalentes in Sardigna.

Difatis gràtzias a sa metòdica chi si basat in s’anàlisi de su tampone molecolare, in s’ausèntzia de s’amplificatzione de su gene “S”, si podet codificare sa proteina Spike acanta sunt localizadas is mudaduras de is variantes inglesa, brasiliana e sudafricana. In custu modu, su 13 e freàrgiu coladu sunt istados individuados is primos malàidos cun custa variante: in Bono. Difatis gràtzias a custos resurtados est istada avèrtida in deretura s’Igiene pùblica.

Immoe fintzas Santu Diadoru intrat a manera ufitziale in “zona ruja” semper a càusa de sa variante inglesa de su covid e de is casos registrados in bidda.

In su tzentru costeri est istada publicada s’ordinàntzia annuntziada dae sa sìndiga Rita Deretta, cun cale intrant in vigèntzia totus is limitatziones pro parare fronte a s’ispàinu de su virus: proibidu a s’iscostiare in intrada e in essida dae su territòriu comunale; butegas, tzilleris e ristorantes serrados; abarrant abertos istancos, potecarias e paraputecarias, butegas de alimentares, produtos agrìculos e florovivaìstico, edìcolas.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”