Timoria pro sa variante inglesa de su Covid in Sardigna, a pustis chi sunt essidos a campu àteras cundiduras.

Donat pensamentu su nord de s’Ìsula, in ue Santu Diadoru est intradu in zona ruja.

Pro immoe su sìndigu de Sa Madalena s’est torradu a crèere: a pustis de àere intesu s’assessore Mario Nieddu e is autoridades de sa sanidade sarda. Su primu tzitadinu madaleninu, Fabio Lai, difatis at seberadu de parpare.

Cunfirmadu dae su sìndigu Giuseppe Porcheddu unu casu de variante inglesa de su Coronvirus a Budune. Fintzas in custu casu est positiva una minorenne – comente in Madalena etotu, acanta est sa cuntagiada est una pisedda de 11 annos -.

In s’ora in Bono, prima zona ruja de sa Sardigna e ue s’est registradu su primu epitzentru epidemiològicu isulanu, custu mangianu est cumentzada sa campagna de monitoràgiu bòlida dae Ares-Ats pro atremenare sa presèntzia de sa variante inglesa.

In Terranoa imbetzes su sìndigu at detzìdidu de cungiare bator iscolas e autorizare sa didàtica de tesu a pustis de un’aumentu repente de is contàgios.

In su mentres is laboratòrios de sa Gaddura, de su Tataresu e de sa Provìntzia de Nùgoro, sunt traballende pro cumprèndere cales siant sas variantes de su Covid-19 prevalentes in Sardigna.

Difatis gràtzias a sa metòdica chi si basat in s’anàlisi de su tampone molecolare, in s’ausèntzia de s’amplificatzione de su gene “S”, si podet codificare sa proteina Spike acanta sunt localizadas is mudaduras de is variantes inglesa, brasiliana e sudafricana. In custu modu, su 13 e freàrgiu coladu sunt istados individuados is primos malàidos cun custa variante: in Bono. Difatis gràtzias a custos resurtados est istada avèrtida in deretura s’Igiene pùblica.

Immoe fintzas Santu Diadoru intrat a manera ufitziale in “zona ruja” semper a càusa de sa variante inglesa de su covid e de is casos registrados in bidda.

In su tzentru costeri est istada publicada s’ordinàntzia annuntziada dae sa sìndiga Rita Deretta, cun cale intrant in vigèntzia totus is limitatziones pro parare fronte a s’ispàinu de su virus: proibidu a s’iscostiare in intrada e in essida dae su territòriu comunale; butegas, tzilleris e ristorantes serrados; abarrant abertos istancos, potecarias e paraputecarias, butegas de alimentares, produtos agrìculos e florovivaìstico, edìcolas.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Oramai est arribbada s’ora de sa veridade pro su guvernu ghiadu dae Mario Draghi.

Difatis cras a ora e is 10 su primu ministru nou at a fàghere su discursu programmàticu in s’àula de Palatzu Madama, chi at a èssere repìtidu giòbia a Montecitorio.

SA majoria manna chi l’at a sustènnere est treulada dae medas cuntierras tra is partidos. Tando non totu in Parlamentu est seguru.

Is discuncòrdias prus fortes diant èssere in su M5S, cun brigas internas, cun is medas dissidentes prontos votare nono a s’esecutivu nou s’ala “governista” chi imbetzes traballat pro sustènnere su guvernu.

Ma fintzas sa Sinistra italiana aparit segada e is raportos tra Lega e Pd si faghent semper prus lègios. Crara de in deretura sa positzione de Fratelli d’Italia ghiada dae Giorgia Meloni chi s’est posta dae meda a s’opositzione de s’esecutivu ghiadu dae s’ex presidente de sa BCE.

Fintzas sa nòmina de is sutasegretàrios no at a èssere fàtzile, cun una prova de fortza tra is partidos polìticos de sa majoria.

In s’ora su premier Draghi est isetende de agatare solutziones pro sa pandemia, de sa cale a donare prus pensamentu sunt is variantes de su Covid-19. Prima de totu cussa inglesa, chi tra carchi chida at a a èssere sa chi s’at a ispainare de prus.

In su mentres su Cts, s’Iss e su Tzentru europeu pro sa preventzione e su controllu de is maladias, cheret a s’esecutivu nou de afortiare is mesurat contra su Covid e cussìgiat unu firmu totale nou.

Un’ipòtesi difìtzile de atuare pro ite su mundu de is impresas s’oponet a barra parada a custa detzisione. Difìtzile istabilire si at a èssere torradu a cunfirmare su cummissàriu Arcuri, acusadu dae medas de no àere donadu rispostas eficatzes a sa luta contra su Coronavirus.

Seguru a pustis de àere otentu sa fidùtzia – francu corfos de iscena – Draghi dae lunis at a atuare vàrios provedimentos in sa lìnia in is vatzinos e cun su cuntrastu a sa pandemia.

Pro immoe custu est s’elencu de is ministros de su guvernu:

Luciana Lamorgese a s’Internu, matessi càrriga giai in su guvernu Conte

Lugi De Maio (M5S), a is Èsteros, matessi càrriga giai in su guvernu Conte

Lorenzo Guerini (Pd) a sa Difesa, matessi càrriga giai in su guvernu Conte

Daniele Afranco a s’Economia, diretore generale atuale de sa Banca de Itàlia

Giancarlo Giorgetti (vitze-segretàriu de sa Lega), a s’Isvilupu Econòmicu

Marta Cartabia a sa Giustìtzia, ex presidente de sa Corte Costitutzionale

Roberto Speranza (Leu), a sa Salude, matessi càrriga giai in su guvernu Conte

Federico De Incà (M5S) a is Raportos cun su Parlamentu, matessi càrriga giai in su guvernu Conte

Roberto Cingolani a su ministeru nou de sa Transitzione ecològica, ex diretore Iit

Patrizio Bianchi a s’Imparu, dotzente universitàriu

Cristina Messa a s’Universidade, dotzente universitària

Enrico Giovannini a is Infrastruturas e Trsportos, ex presidente de s’Istat

Renato Brunetta (Forza Italia) a sa Pùblica amministratzione

Dario Franceschini (Pd) a sa Cultura, matessi càrriga giai in su guvernu Conte

Andrea Orlando (vitzesegretàriu de su Pd) a su Traballu

Massimo Garavaglia (Lega) a su Turismu

Stefano Patuanelli (M5S) a s’Agricultura

Vittorio Colao a s’Innovatzione tecnològica

Mariastella Gelmini (Fortza Itàlia) a is Afares regionales

Mara Carfagna (Forza Italia) a su Sud

Elena Bonetti (Italia Viva) a is Paris oportunidades, matessi càrriga giai in su guvernu Conte

Fabiana Dadone (M5S) a is Polìticas giovaniles

Erika Stefani (Lega) a is Disabilidades

Su sutasegretàriu a sa presidèntzia de su Consìgiu at a èssere su magistradu Roberto Garofoli.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”