Po immoe, su guvernu Conte si dd’at sarbada.

Eris sero at otentu sa majora relativa a su Senadu cun 156 votos – 140 contràrios e 16 astènnidos – a pustis chi sa presidente Casellati at firmadu su risultadu de sa votatzione.

Difatis est tocadu a detzìdere chi is onorèvoles, Ciampolillo e Nencini, ant votadu prima o a pustis chi sa Presidente de su Senadu at cungiadu su tempus pro votare.

Una borta cunvalidadu su sèberu de is duos senadores, est istada declarada cunfirmada sa fidùtzia a su guvernu.

Tzertu Conte no at otentu sa majoria assoluta a Palatzu Madama — est a nàrrere 161 votos — e medas de s’opositzione ant pedidu is dimissiones suas.

Su capu de sa Lega Salvini e sa mere de Fratelli d’Italia Meloni ant sollitzitadu su Presidente de su Consìgiu de pigare atu de sa mancàntzia de sa majora assoluta e andare a sa lestra a su Quirinale acanta su Presidente de sa Repùbblica Mattarella. Is duos polìticos de s’opositzione diant a bòlere andare a su votu in mese de làmpadas pro fàghere detzìdere a is italianos dae chie èssere guvernados.

Su partidu “Italia Viva” chi cun is dimissiones de is ministras Bellanova e Bonetti e de su sutasegretàriu Scalfarotto ant abertu sa crisi de guvernu, e ite at a fàghere immoe?

Eris si sunt astènnidos in su votu finale e custu at a permìtidu a s’esecutivu de otènnere sa fidùtzia cun una majoria relativa, ma est craru chi sa punna printzipale de Renzi est sa de donare vida a unu guvernu istitutzionale.

Un’esecutivu chi potzat arribbare finas a s’agabbu de sa legisladura sena Conte comente primu ministru.

Pro immoe sunt tropu pagos is responsàbiles — is chi sunt apensamentados pro is efetos de una crisi de guvernu – chi eris ant donadu sa fide a su guvernu.

Est seguru chi pro is meses sighentes a sa Natzione diat serbire unu guvernu forte chi potzat afrontare s’apretu sanitàriu e econòmicu de s’Itàlia.

Pro bona sorte de s’Itàlia s’ùrtima paràula at a èssere sa de su presidente Mattarella.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Crisi de guvernu, Conte oe a sa proa de su votu in Senadu

Su guvernu Conte a sa chirca – difìtzile chirca ma no impossìbile – de sa majoria a Palatzu Madama

A pustis de àere otentu sa majoria assoluta a sa Càmera cun 321 votos – su plenum de s’assemblea est de 630 – su primu ministru Giuseppe Conte at a dèpere superare sa proa de su Senadu, acanta is nùmeros a favore de su guvernu sunt contados.

Su partidu “Itàlia viva”, a pustis de àere lassadu su guvernu, at annuntziadu chi s’at a astènnere in su votu finale e custu at a permìtere a s’esecutivu de otènnere sa fidùtzia cun una majoria relativa.

Difatis non serbit unu quorum mìnimu e at a bastare a superare s’opositzione fintzas cun unu votu ebbia.

Medas però sutalìniant chi si Conte non superaret sa cuota de 161 a Palatzu Madama — est a nàrrere sa majoria assoluta, su plenum est de 315 prus 6 senadores a vida – diant dèpere presentare is dimissiones.

Totu custu dae unu puntu de bista mescamente polìticu, ma no est obligatòriu. Difatis diat bastare a torrare in segus in s’istòria republicana pro bìere chi sunt istados dòighi is guvernos de minoria, in una o in totu e is duas is Càmeras, tra custos fintzas su primu guvernu De Gasperi e in is annos prus reghentes su primu Berlusconi.

Is prepostos a is traballos narant chi a favore de su guvernu atuale ddoe diat tènnere unu nùmeru de senatore( tra 152 e 159) prontos a donare sa fidùtzia. A is votos de is esponentes de M5S, Pd e Leu si diant pòdere agiùnghere tra 12 e 15 votos de su grupu Mistu o de is foressidos de àteros grupos, e àteros 7 de su grupu de is Autonomias.

Ma si tratat petzi de previsiones. Custu mangianu si sunt abertos is traballos in Senadu. Su guvernu at retzidu s’apògiu de is Senadores Monti, De Falco e Casini, cun custu ùrtimu chi at sotadu a Conte de torrare a dialogare cun Renzi remonende peri a Aldo Moro: “Mègius faddire paris chi tènnere resone a solos”.

In su mentres in custas oras is Senadores sunt istados partzidos in tres categorias: is responsàbiles – meda apensamentados pro is efetos de una crisi de guvernu, is traitores – chi sunt isetende postos ebbia, e is isfinges – is chi finas a s’ùrtimu non si esponent. Sunt pròpiu custos chi ant a poderare is italianos in riolu, e non pro sa subravivèntzia de su Conte-bis ebbia.

S’apuntamentu est pro custu sero, cando a pustis de su votu s’at a cumprèndere cale at a èssere su guvernu chi — francu imprevistos improvisos – in is meses sighentes s’at a dèpere fàghere càrrigu de gestire s’apretu sanitàriu e econòmicu de s’Itàlia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”