In sa die de oe su Presidente de sa Camera Roberto Fico at a cumentzare is consultatziones cun is partidos pro bìere chi si ddoe sunt is cunditziones de fàghere su guvernu “Conte-ter”.

Fico – chi at retzidu su mandadu esplorativu dae su Presidente Sergio Mattarella – at a atopare pro primu is delegados de su Movimentu Chimbe Isteddos, e a sighire is rapresentantes de su Partidu Democràticu, Itàlia Viva e Lìberos e Uguales.

Sa crisi de su Guvernu s’est aberta a pustis de is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto.  Mancari is votos a favore de Giuseppe Conte a sa Camera e  a su Senadu – bàtoro dies a oe – est istada declarada   sa crisi cun is dimissiones de su primu ministru.

S’incàrrigu de Fico est istragosu meda, pro ite su capu de Itàlia Viva, Matteo Renzi, diat puntare a unu Guvernu ghiadu dae unu primu ministru chi non siat Conte.

Is esponentes printzipales de su Partidu Democràticu e de su M5S bolent  comente Presidente de su Consìgiu semper s’abogadu pulliesu.  Ma essende chi su tentativu de allargare sa majoria sena is votos de su partidu de Renzi no est resèssidu, at èssere difìtzile meda chi Conte bèngiat cunfirmadu.

In custas oras sunt essidos a pìgiu àteros nùmenes, comente cussu de su  Ministru de is Esteros Luigi di Maio e de sa Ministra de is Internos Luciana Lamorgese.

In unu cuntestu polìticu che custu non s’ischit ite at a pòdere capitare. Seguru – sarvu sorpresas – non s’at a lòmpere in presse a is eletziones, comente imbetzes est dimandende sa minoràntzia ghiada de su capu de sa Lega Matteo Salvini.

Fico at a dèpere agatare una solutzione a lestru, pro ite s’Itàlia non si podet permìtere àteros “trumbulamentos” in is meses sighentes, bidas totu is discumbènios causados dae sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Sardigna non si donat pro pèrdida e sighit sa batalla sua contra sa detzisione a banda de su Guvernu, chi l’at insertada in zona arantzu.

A custu propòsitu, s’assessoradu regionale de sa Sanidade est aprontende sa documentatzione de afidare a s’ufìtziu legale de sa Regione, pro pòdere presentare su ricursu contra sa classificatzione donada dae su guvernu.

Sa punna est de torrare cantu prima in sa zona groga, evitende in custu modu is limitatziones chi sa zona arantzu cumportat e chi sunt creende disacatos mannos a s’economia isolana giai dannificada.

A fàghere “lassinare” sa Sardigna in sa zona dolore de aràngiu fiat istadu, tra is vàrios paràmetros cunsiderados dae su guvernu, sa propassada de su lìmite crìticu de su 30% de is postos ocupados in terapia intensiva.

Su perìodu pigadu in cunsideru fiat istadu cussu tra s’11 e su 17 de ghennàrgiu, cando in s’Ìsula fiat istadu isciaddidu de unu puntu pertzentuale custu lìmite.

In su mentres-tempus sighint is brigas tra sa majoria e s’opositzione regionale. Su Presidente Solinas at fatu presente chi sunt istados inchingiados 30 postos letu in terapia intensiva in s’Azienda ospedaliera Universitària de Tàtari e àteros 14 sunt disponìbiles in su nosocòmiu de su Binaghi, definende sena sentidu sa mòvida de su guvernu. Sa minoria atacat giunta pedende si custas “novidades” comunicadas pro tempus diant àere evitadu chi su declassamentu in zona groga pro sa Sardigna. De custu nd’at allegadu s’assessore de sa Sanidade Nieddu, ispieghende chi prima de s’abertura de is terapias intensivas noas, custa informatzione non si diat èssere pòdida comunicare.

Ma diant pòdere èssere istados fintzas àteros paràmetros a fàghere intrare s’Ìsula in zona arantza: su forte ritardu de notìfica, su pesu de is casos ativos ogna 100 mìgia abitantes e su nùmeru de is infetziones in aumentu — medas in residèntzia pro is betzos-.

In is ùrtimos duos puntos elencados, is sìndigos sardos denùntziant chi diant pòdere èssere isballiados a càusa de iscunsertu in su portale ufitziale.

Non diat èssere sa prima bia chi diat capitare a livellu natzionale: sa Lombardia est abarrada in zona ruja pro una chida pro neghe de is datos incumpletos imbiados dae is entes regionales prepostos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”