In Isvètzia un’òmine at agurteddadu diversos passantes.

Est acontèssidu a Vetlanda – 12 mìgia abitantes -, e is incuirentes pensant chi si tratet de “un’atacu terrorìsticu”, fintzas a immoe s’allegat de tentadu omitzìdiu.

Su fatu est sutzèdidu bia merie, in una zona frecuentada meda, a presu de s’istatzione ferroviària de sa tzitadina.

Diversas persones chi ant donadu in deretura s’avisu, faeddende de un’atacu chi s’est acumpridu a sa lestra in 5 logos diversos unu fatu a s’àteru.

Is testimòngios chi ant assistidu a s’iscena ant contadu a sa giustìtzia de àere bidu un’òmine armadu de istrale e de gurteddu.

Is autoridades ant acorradu su tzentru de sa tzitadina, firmende fintzas sa lìnia ferroviària, chi est istada torrada a abèrrere a pustis de una pariga oras.

S’agressore est unu pitzocu de 20 annos. Pro ddu firmare sa politzia dd’at isparadu a is cambas e a pustis de s’arrestu dd’at leadu a s’ispidale.

Is feridos puru sunt istados sucursos in deretura e acumpangiados de presse in ambulantza a is prontos sucursos de sa tzitade. Sa portaboghe de sa politzia de sa regione Est, Angelica Israelsson, at naradu chi duas de is vìtimas sunt a istadu malu.

Su ministru de s’Internu isvedesu, Mikael Damberg, at definidu s’atacu “terrorosu”, ma no at fatu àteras decraratziones.

S’indagat pro intentada ochisura, ma si sighit peri sa pista terrorìstica. In passadu, in su nadale de su 2010, duas esplosiones belle simultàneas ant corfidu su tzentru de Istocolma, provochende unu mortu e duos feridos. Si fiat tratadu de un’atentadu suitzida, pretzèdidu dae minetzas de tenore jihadista, acanta si cundennaiat tra is medas cosas sa presèntzia militare de s’Isvètzia in Afganistàn.

Sete annos a pustis, in abrile, semper in sa capitale, unu uzbeku radicalizadu, chi dd’aiant refudadu s’asilu polìticu, nd’aiat boddidu unu muntone de gente in caminu cun un’autocarru furadu, ochiende chimbe persones. Interrogadu dae sa politzia aiat naradu chi si boliat vengare pro gherra de is otzidentales contra s’Isis.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Mèrcuris sero su Casteddu at bìnchidu contra su Bologna pro unu a zeru tra is muros amigos de su Sardigna Arena.

Un’àtera vitòria importante meda a pustis de su resurtadu de duos a zero contra su Crotone de sa chida colada.

Semplici at intzertadu is sèberos giustos pro pòdere sighire a abarrare in sa màssima categoria de su fùbalu italianu, mancari su caminu siat galu longa meda.

S’allenadore nou de is ruju-blu pro, custa partida, paret chi nche dd’apat fata a risòlvere non isceti su problema de s’atacu, ma at torradu fintzas a donare un’assetiada a sa difesa chi no est pighende prus gol.

In prus in custa partida at marcadu sa rete de sa vitòria su defensore Rugani, a su primu gol cun sa màllia de su Casteddu.

Sa rete de conca est lòmpida gràtzias a unu brìnchidu in mesu a is giogadores aversàrios, a pustis de unu servìtziu arribadu dae s’àngulu de su campu.

Contra is òmines de Mihajlovic si sunt presentados in Sardigna de muta bona, a pustis de sa partida bìnchida contra sa Lazio pro duos a zero, est istada una partida istragosa meda.

In calicuna ocasione su portieri Cragno est istadu atentu e at fatu paradas bellas meda.

Is giogadores sardos ant sufridu, ma abarrende unidos, sunt resèssidos a cungiare sa partida cun custu resurtadu importante.

Pro is tifosos casteddajos, chi isperant chi s’iscuadra si potzat sarbare dae sa ruta in Sèrie B, est istada una satisfatzione manna meda torrare a bìnchere duas partidas de sighidu.

Comente at naradu su tècnicu de is ruju-blu, chi at fatu is cumplimentos a s’iscuadra sua, at a tocare a pensare a sa partida benidora chi s’at a giogare foras de domo.

Difatis a Gènova contra sa Sampdoria, allenada dae s’ex Ranieri at èssere un’àtera partida sacrificosa meda.

Comente cumandat Semplici a is casteddajos at a tocare a gherrare in zona de su campu. Amus a bìdere si in Ligùria puru is ruju-blu ant a torrare a balangiare torra is tres puntos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”