Mèrcuris sero su Casteddu at bìnchidu contra su Bologna pro unu a zeru tra is muros amigos de su Sardigna Arena.

Un’àtera vitòria importante meda a pustis de su resurtadu de duos a zero contra su Crotone de sa chida colada.

Semplici at intzertadu is sèberos giustos pro pòdere sighire a abarrare in sa màssima categoria de su fùbalu italianu, mancari su caminu siat galu longa meda.

S’allenadore nou de is ruju-blu pro, custa partida, paret chi nche dd’apat fata a risòlvere non isceti su problema de s’atacu, ma at torradu fintzas a donare un’assetiada a sa difesa chi no est pighende prus gol.

In prus in custa partida at marcadu sa rete de sa vitòria su defensore Rugani, a su primu gol cun sa màllia de su Casteddu.

Sa rete de conca est lòmpida gràtzias a unu brìnchidu in mesu a is giogadores aversàrios, a pustis de unu servìtziu arribadu dae s’àngulu de su campu.

Contra is òmines de Mihajlovic si sunt presentados in Sardigna de muta bona, a pustis de sa partida bìnchida contra sa Lazio pro duos a zero, est istada una partida istragosa meda.

In calicuna ocasione su portieri Cragno est istadu atentu e at fatu paradas bellas meda.

Is giogadores sardos ant sufridu, ma abarrende unidos, sunt resèssidos a cungiare sa partida cun custu resurtadu importante.

Pro is tifosos casteddajos, chi isperant chi s’iscuadra si potzat sarbare dae sa ruta in Sèrie B, est istada una satisfatzione manna meda torrare a bìnchere duas partidas de sighidu.

Comente at naradu su tècnicu de is ruju-blu, chi at fatu is cumplimentos a s’iscuadra sua, at a tocare a pensare a sa partida benidora chi s’at a giogare foras de domo.

Difatis a Gènova contra sa Sampdoria, allenada dae s’ex Ranieri at èssere un’àtera partida sacrificosa meda.

Comente cumandat Semplici a is casteddajos at a tocare a gherrare in zona de su campu. Amus a bìdere si in Ligùria puru is ruju-blu ant a torrare a balangiare torra is tres puntos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Crotone-Casteddu est istada una partida istragosa meda pro is òmines de Leonardo Semplici. Is calabresos ant àpidu ocasiones meda pro marcare ant postu is casteddajos in dificultade prus de una borta.

Ma in su retàngulu birde ddoe teniat Leonardo Pavoletti, chi at mustradu chi comente prima punta est prus forte de Simeone.

S’atacante sardu at marcadu su primu gol de conca, a pustis de unu brìnchidu in mesu a is giogadores aversàrios, gràtzias a unu servìtziu de su tertzinu Charalampos Likogiannys. Fatu fatu su giogadore nàschidu a Livorno at procuradu unu rigore, chi est istadu iscutu e marcadu dae su capitanu Joao Pedro.

Su resurtadu finale est istadu duos a zero pro su Casteddu, unu triunfu pro is binchidores e grandu prègiu pro is tifosos casteddajos, chi isperant chi s’iscuadra si potzat sarbare dae sa ruta in Sèrie B.

S’allenadore nou de is ruju-blu pro, custa partida, paret chi nche dd’apat fata a risòlvere su problema de s’atacu, chi dae su mese de onniasantu a oe no est resèssidu a nche istichire sa botza in porta.

Is sèberos de Semplici sunt serbidos pro torrare a fàghere tres puntos a pustis de prus de tres meses, ma s’àndala pro sighire a abarrare in sa màssima categoria de su fùbalu italianu est galu longa meda.

Comente at naradu su tècnicu de is ruju-blu, chi at fatu is cumplimentos a s’iscuadra sua, mèrcuris sero tra is muros amigos de su Sardigna Arena, ddoe at èssere un’àtera partida istragosa meda contra su Bologna.

Is òmines de Sinisa Mihajlovic si presentant in Sardigna de muta bona, a pustis de sa partida bìnchida contra sa Lazio pro duos a zero.

In sa partida chi benit s’at a bìdere si su Casteddu at èssere galu perigulosu e cuntzentradu comente cumandat Semplici e prus che totu si superadu a beru sa crisi de resurtados.

Isperamus chi su prenetu de is giogadores prus famados comente Godin, Nainggolan, Joao Pedro e torra Pavoletti at a serbire a indanimare totu is àteros cumpàngios, finas a sa vitòria.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”