S’Itàlia de su fùbalu bolet torrare a bìnchere contra sa Lituania sa gara de is Cualificatziones pro su Mundiale chi s’at a giogare in su Qatar.

Is òmines de Roberto Mancini, in is dies coladas, ant bìnchidu prima contra s’Irlanda de su Nord – cun su resurtadu de 2-0 gràtzias a is gol de Ciro Immobile e Domenico Berardi – e a pustis contra sa Bulgaria – semper 2-0 cun is retes de Andrea Belotti e Manuel Locatelli -.

Ses puntos chi ant permìtidu a sa Natzionale Asula de ghiare su Girone C paris cun s’Isvìtzera, chi pro is italianos est s’àversàriu prus istragosu.

Mancini est un’allenadore sàbiu e ischit chi at a tocare a lòmpere a sa partida contra is elvèticos binchende sa partida contra sa Lituania – chi s’at a disputare in sa capitale Vìlnius -. Custu pro ite s’Itàlia at a falare in campu contra is rujos-crociados sena perunu anneu.

Pro sa gara benente su técnicu de Jesi no at a tènnere a dispositzione una pariga dae giogadores pro infortùniu, ma semus seguros chi at a seberare bene is supridores.

In s’annu de is Europeos – ispostadu pro more de su Covid-19 – custas partidas ant a serbire a s’allenadore de sa Natzionale pro cumprèndere chie portare a custa cumpetitzione.

Is asulos ant a dèpere sarbare s’onore a su fùbalu italianu, pro ite ocannu is iscuadras italianas impignadas in is Copas europeas sunt istadas bogara a malu modu. Est abarrada feti sa Roma.

Oramai su Mondiale bìnchidu dae s’Itàlia in su 2006 in Germània est unu regodu ebbia, ma is òmines de Mancini est torradu s’apretu e sa gana pro torrare a bìnchere, e immoe tocat a torrare a fàghere bisare is tifosos asulos.

Diat a èssere una cosa manna a beru, a pustis de custu ùrtimu annu iscomunigadu pro more de su Covid-19, e unu sinnale de isperu pro torrare a lestru a sa normalidade.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Procura de Palermo at pedidu su rinviu a giudìtziu de s’ex ministru de s’Internu Matteo Salvini pro is reatos de secuestru de persone e refudu de atos de ufìtziu.

Custu est su chi est acontèssidu a sa fine de s’udièntzia preliminare de su tribunale de Palermo, acanta est imputadu su capu de sa Lega. Segundu s’acusa Salvini in s’austu de su 2019, diat àere negadu in modu illegìtimu s’isbarcu de 147 migrantes sucùrridos a largu de Lampedusa dae sa nave de s’ong Open Arms.

Su leghista at naradu de no èssere apensamentadu, e de àere traballadu semper pro sa defensa de s’Itàlia e pro su respetu de sa lege. At fintzas afirmadu chi durante su mandadu suo de ministru de s’Internu at sarvadu vidas umanas e cun s’operadu suo at permìtidu chi su problema esseret postu a s’atentu de s’Europa.

S’udièntzia preliminare a càrrigu de su senadore est istadu fatu in s’àula bunker de su càrtzere Ucciardone de Palermu, e est incumentzada cun sa recherta de su Procuradore de Palermu Francesco Lo Voi de fàghere assistire s’imprenta a su protzedimentu chi pro lege s’acumprit a ghennas cungiadas.

Ma ite arriscat Salvini? Sa pena prevìdida, comente at torradu a nàrrere dae su caporione de sa Lega, est de 15 annos.

Segundu su procuradore de Palermu su protzessu contra Salvini no est un’àutu polìticu, sende chi, semper segundu su Francesco Lo Voi, is congruidas a is cales sunt arribbados e is testimonias regortas durante s’istrutòria portant a retènnere chi si tratet de un’atu amministrativu.

In prus s’ex presidente de su Consìgiu Conte diat àere naradu chi non s’est mai discussu in Consìgiu de is ministros de is sìngulos casos. Pro sa cuntzessione de su Pos su Cdm non s’est mai ocupadu e chi niuna detzisione est istada mai cumpartzida e chi su problema de sa re-distributzione fiat unu problema generale e no acapiadu a is sìngulos casos.

Non ddoe diat èssere istada niunu cumpartzimentu cun is àteros esponentes de su Guvernu. Sa detzisione diat èssere istada de su ministru de s’Internu ebbia, e comente diat àere naradu su ministru Di Maio, is àteros nde sunt istados informados solu gràtzias a unu tweet de Salvini. Su cumpartzimentu dae banda de totu su guvernu de tando, diat àere interessadu petzi sa ridistributzione de is migrantes.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”