Su Casteddu at a èssere de iscena cras contra s’Hellas Verona, chi at a bìdere s’esòrdiu – in gara ufitziale – de Walter Zenga.

Una gara particulare tando, sa prima sena su tècnicu Rolando Maran, esoneradu a is primos de martzu, a in antis de s’apretu COVID-19.

Su Casteddu si presentant cun una formatzione de emergèntzia, bida s’ausèntzia de duos ponteddos de s’iscuadra comente Nainggolan e Joao Pedro. Su belga est foras pro neghe de unu dolu musculare, mentras su brasilianu depet iscontare una die de iscualìfica. No ant a giogare nemmancu su difensore Faragò, su tzentrucampista Oliva e su cunvalescente Pavoletti.

Medas is intzertesa in sa trasferta vèneta pro su Casteddu. Primu de totu non s’ischit cale at a èssere sa cunditzione fìsica de s’iscuadra, pro more de is meses chi is atletas non si sunt pòdidos allenare totu paris, problema chi tocat fintzas su Verona. In prus ddoe tenet dudas pro su possìbile mòdulu de is sardos, bìdidos is probàbiles càmbios de Zenga in difesa e a tzentru-campu.

Podet èssere chi s’iscuadra gioghet cun bator difensores in su repartu arretradu, tres tzentrucampistas in mediana e unu trecuartista a palas de sa còpia de atacu. Custu ùrtimu est su repartu chi tenet prus pagu sèberos a disponimentu, cun Simeone e Pereiro chi cun prus probabilidade ant printzipiare giai dae su primu minutu de sa partida.

S’Hellas est un’iscuadra matanosa meda de afrontare, massimamente in domo, e rapresentat sa bera rivelatzione de su campionadu de ocannu. Is armas mègius de is pitzocos de Juric sunt su pallègiu a tzentru-campu e sa solidesa difensiva.

Su regulamentu nou chi at a èssere atuadu in custas ùrtimas partidas de su campionadu, cunsentint 5 càmbios. Est possìbile chi durante sa partida, s’ex portieri de s’Inter e de sa Natzionale, potzat propònnere carchi giogadore interessante de sa Primavera de su Casteddu.
Is giòvanos Landinetti, Lombardi e prus che totu Carboni, tenent s’ocasione de apetigare su retàngulu birde de s’istàdiu veronesu.

A is iscuadras de Sèrie A ddis aspetat unu perìodu difìtzile meda, acanta s’at a calare in campu ogni tres dies, e pro custu at a serbire sa disponibilidade de totu is giogadores de sa rosa.
Pro sa sotziedade custa at a èssere un’ocasione pro valutare medas giogadores e pro fàghere is sèberos de mercadu pro s’istajone chi benit.

Is autoridades de su logu ant naradu chi su “Magic Bus” poniat in perìgulu sa vida de is andaiant a ddu bìdere e pro custu est istadu leadu cun unu elicòteru.

Su postalinu betzu e ruinadu fiat parchegiadu in su coro de su parcu natzionale de Denali, a chèntinas de chilòmetros a nord de Anchorage, in s’àndala Stampede.

Custu veìculu est divenidu famadu pro ite, su 6 de cabudanni de su 1992, ddoe est istadu agatadu mortu Christopher McCandless, unu pitzocu de 24 annos chi aiat detzìdidu de andare a bìvere in Alaska.

S’idea de su giòvanu fiat sa de bìvere de su chi diat àere agatadu in su sartu. Un’ispètzia de refudu in is cunfrontos de sa sotziedade materialista e de su consumu, arribbada a pustis de s’èssere laureadu. Christopher a pustis de àere biagiadu in paritzos istados americanos, fiat lòmpidu in Alaska, in ue si pensat chi siat mortu de patimentos.
S’istòria sua, acapiada in s’ùrtimu perìodu a su “Magic Bus” – comente beniat mutiat su postalinu – est istada contada in su giornale Outside de Jon Krakauer, s’iscritore americanu chi fatu fatu at publicadu su libru a tìtulu “Nelle terre estreme”, chi at ispiradu su film de Sean Penn “Into the wild”. Ispantosas meda is mùsicas de Eddie Vedder, colonna sonora de s’òpera tzinematogràfica .

In medas, pro copiare sa marrania disfortunada de McCandless si sunt aventurados in cussu logu ispèrdidu pro agatare su pulminu, divenidu sa domo e sa tumba de Christopher. Ogna annu percursu fiat rugradu dae chèntinas de persones, medas privas de esperièntzia e de atretzadura adeguada, chi pro ddoe lòmpere arriscaiant sa vida. Paritzos sunt mortos allupados chirchende de giumpare is abbas fritas de su riu Teklanka, àteros ant pèrdidu sa vida in caminu.
Fintzas unu grupu de escursionistas italianos, pagos meses a oe, est istadu sarbadu dae is guàrdias de su parcu natzionale.
Ogna interventu de sucursu cumportaiat medas isfortzos e costos tropu artos, e pro custu is autoridades s’Alaska ant detzisu de nde pesare su postalinu.

Istravanadas meda is immàgines giradas dae is sordados de sa Guàrdia Natzionale chi ant elitrasportadu su pulminu betzu, bolende in pitzu de is padentes crosos de conìferas.
De acòrdiu pro nde iscostiare su mezu fintzas sa sorre de Christopher, Carine McCandless, chi at sotadu is escursionistas ispirados dae su frade a bìvere s’Alaska in seguridade. Galu non s’ischit in ue su “Magic Bus” at a èssere postu.