Is autoridades de su logu ant naradu chi su “Magic Bus” poniat in perìgulu sa vida de is andaiant a ddu bìdere e pro custu est istadu leadu cun unu elicòteru.

Su postalinu betzu e ruinadu fiat parchegiadu in su coro de su parcu natzionale de Denali, a chèntinas de chilòmetros a nord de Anchorage, in s’àndala Stampede.

Custu veìculu est divenidu famadu pro ite, su 6 de cabudanni de su 1992, ddoe est istadu agatadu mortu Christopher McCandless, unu pitzocu de 24 annos chi aiat detzìdidu de andare a bìvere in Alaska.

S’idea de su giòvanu fiat sa de bìvere de su chi diat àere agatadu in su sartu. Un’ispètzia de refudu in is cunfrontos de sa sotziedade materialista e de su consumu, arribbada a pustis de s’èssere laureadu. Christopher a pustis de àere biagiadu in paritzos istados americanos, fiat lòmpidu in Alaska, in ue si pensat chi siat mortu de patimentos.
S’istòria sua, acapiada in s’ùrtimu perìodu a su “Magic Bus” – comente beniat mutiat su postalinu – est istada contada in su giornale Outside de Jon Krakauer, s’iscritore americanu chi fatu fatu at publicadu su libru a tìtulu “Nelle terre estreme”, chi at ispiradu su film de Sean Penn “Into the wild”. Ispantosas meda is mùsicas de Eddie Vedder, colonna sonora de s’òpera tzinematogràfica .

In medas, pro copiare sa marrania disfortunada de McCandless si sunt aventurados in cussu logu ispèrdidu pro agatare su pulminu, divenidu sa domo e sa tumba de Christopher. Ogna annu percursu fiat rugradu dae chèntinas de persones, medas privas de esperièntzia e de atretzadura adeguada, chi pro ddoe lòmpere arriscaiant sa vida. Paritzos sunt mortos allupados chirchende de giumpare is abbas fritas de su riu Teklanka, àteros ant pèrdidu sa vida in caminu.
Fintzas unu grupu de escursionistas italianos, pagos meses a oe, est istadu sarbadu dae is guàrdias de su parcu natzionale.
Ogna interventu de sucursu cumportaiat medas isfortzos e costos tropu artos, e pro custu is autoridades s’Alaska ant detzisu de nde pesare su postalinu.

Istravanadas meda is immàgines giradas dae is sordados de sa Guàrdia Natzionale chi ant elitrasportadu su pulminu betzu, bolende in pitzu de is padentes crosos de conìferas.
De acòrdiu pro nde iscostiare su mezu fintzas sa sorre de Christopher, Carine McCandless, chi at sotadu is escursionistas ispirados dae su frade a bìvere s’Alaska in seguridade. Galu non s’ischit in ue su “Magic Bus” at a èssere postu.

Ph: Roberto Anedda

Bella noa a beru, pro sa Sardigna chi fintzas in s’editzione de ocannu at tentu unu sutzessu mannu in assignamentu de is chimbe velas pro su mare prus bellu.

Legambiente e Touring Club ant premiadu s’Ìsula comente sa Regione cun prus logos chi podet bantare custu prèmiu bramadu.

In totu sunt istadas premiadas bìndighi localidades italianas de mare, e chimbe de custas sunt sardas.

Su binchidore de sa classìfica de ocannu est istadu su cumprensóriu de Baunei, pro sa prima borta in s’istòria dae cando est nàschidu su prèmiu.

Su tertzu postu est istadu assignadu a un’àteru logu sardu, sa costera de Chia, chi est lòmpida fatu fatu a sa Maremma Toscana.

Is àteras localidades de s’Ìsula chi sunt istadas seberadas sunt: Pranarza – Bosa -, Costera de Gaddura e AMP Cabu Testa, Baronia de Pasada e Parcu de Tepilora.

Pro chie connoschet su mare ogiastrinu, su de èssere istadu declaradu su mare prus bellu, no est cosa noa. S’abba de su mare est colore de su chelu craru sena nues, e is areniles lìmpidos che s’oru.

Ph: Roberto Anedda

Tocat a andare a ddos bìdere custos logos, unu de is ùrtimos bìculos paradisu abarrados in sa Terra.

In sa costera baunesa is montes si nche atzufant in mare e regalant a su bisitadore un’ispetàculu ispantosu meda. Is calas ogiastrinas parent chi siant istadas fatas a pinzellu dae unu pintore famadu.

Tzertu, custu reconnoschimentu est unu bellu billete de bìsita pro su turismu e pro s’economia de s’Ogiastra, pro ite non s’ischit comente at a èssere s’istajone a pustis de s’abertura a is ispostamentos tra regiones.

Is chimbe velas de Legambiente e Touring Club, garantint una vacàntzia rispetosa de s’ambiente, in mesu a sa Naturalesa, in ue s’agatat abba bona e cosas lichitas de papare.

Pro immoe, est istada meda apretziada dae is turistas s’aplicatzione pro prenotare ogni die s’intrada a Cala Goloritzé. Su modu chi at pensadu su Comune de Baunei pro evitare s’atropèlliu de gente – sunt permìtidas 250 presèntzias ebbia – at otènnidu unu muntone de prenotatziones.

Dae parte nostra, su cussìgiu est su de bisitare custu logu ammajadore, bida fintzas s’esperièntzia e s’emotzione chi podet regalare s’ambiente de s’Ogiastra ebbia.