Contu a s’imbesse pro sa prima gara de su fùbalu professionista italianu, a pustis de su firmu impostu dae is limitatziones Covid-19.

Sunt colados prus de tres meses dae cando s’est giogada s’ùrtima partida de Sèrie A, cun in campu Sassuolo-Brescia, acabada 3-0.

Sa partida chi at a sinnare s’incumentzu nou de s’istajone, at a bìdere in campu Juventus e Milan, in sa semifinale de torrada de Copa Itàlia. A s’andada, in su campu de San Siro, su resurtadu finale est istadu 1-1, cun su vantàgiu de Rebic pro is ruju-nieddos, e su parègiu de is biancu-nieddos cun unu rigore de Ronaldo a s’agabbu de sa partida.

Ma ddoe tenet una novidade: in casu de paridade non s’at a andare a is tempos suplementares, ma deretu a is rigores.

S’àtera semifinale Napoli-Internazionale s’at a giogare sa die sighente, su 13 de mese de làmpadas in s’Istàdiu San Paolo. In custa gara is lombardos ant a dèpere recuperare su gol de Ruiz, in favore de is partenopeos , chistidu in sa gara de andada.

At a èssere curiosu meda a bìdere is cartzadores torra in campu pro giogare una partida bera de noranta minutos, a pustis de medas meses de firmu e cun is allenamentos colletivos torrados a cumintzare dae pagu tempus.

Medas is infortùnios de custas chidas, e pro custu, s’est valutadu de evitare de giogare possìbiles tempos suplementares.

Fintzas su Casteddu de Zenga at pagadu custu incumentzu disavesadu de su campionadu, cun s’istropiamentu de su belga Nainggolan. Su forte tzentrucampista, in prèstidu dae s’Inter, at tentu unu dannu musculare a unu cambile e at a brincare sa gara a su Bentegodi de su 20 de làmpadas. Unu discàpitu lègiu pro s’ex portieri de sa Natzionale de Itàlia ’90, bidu s’importu chi tenet in s’iscachiera tàtica de s’iscuadra.

Sa partida contra su Verona, at a èssere su primu esòrdiu de Zenga in sa banchita de su Casteddu, bidu chi a pustis de èssere intradu a su postu de Maran, su campionadu est istadu suspèndidu a càusa de sa pesta de su coronavirus.

Sa partida contra is iscalìgeros no at a èssere fàtzile, s’iscuadra rivelatzione de su campionadu uguale a su Casteddu in sa prima parte de s’istajone. In prus de s’ausèntzia de Nainggolan, s’allenadore milanesu at a dèpere fàghere a mancu peri de su cannoniere de is ruju-blu, Joao Pedro, chi at a brincare su disafiu essende iscualificadu.

Su campionadu de Sèrie A de fùbalu, suspèndidu pro more de s’emergèntzia COVID-19, est pro torrare a cumintzare cantu prima.

Sa data atatzada est su 13 de mese de làmpadas – francu corpos de iscena -, e s’at a tancare su 2 de austu.

Una detzisione chi acuntentat is apassionados de su giogu natzionale e fintzas is atletas chi nche ant coladu is ùrtimas chidas a s’allenare a sa sola.

Is giogadores ant a pòdere torrare a traballare totu paris, a pustis de paritzos meses chi su campionadu est istadu suspèndidu.

S’at a cumintzare gràtzias a su protocollu aprontadu dae sa Federcalcio, chi est istadu cambiadu gosi comente at bòlidu sa Cummissione ténnicu-iscientìfica de su Guvernu.

Custu documentu sanitàriu est importante meda, pro ite at a permìtere de agabbare s’istajone 2019-2020 in seguresa.

Calicuna natzione europea comente sa Germània at detzisu de torrare a cumintzare su campionadu a lestru: sa Bundesliga, difatis, at a giogare tra pagas dies.

S’Inghilterra e s’Ispagna puru sunt in pessu de cumintzare torra is partidas de fùbalu. Sa Frantza imbetzes at cungiadu s’istajone tempus prima.

Totus in campionados europeos prus famados, capitende chi sa pesta si torraret a s’ispainare tra is giogadores, ant seberadu unu pianu B.

S’est detzisu ca at a bàlere de sa classìfica de cando s’ant a firmare pro sa segunda borta is cumpetitziones.

A pàrrere de su presidente de su Coni, Giovanni Malagò, sa Sèrie A no at istudiadu chi custa possibilidade at a pòdere capitare.

Is giogadores de su Casteddu puru, lunis chi benit, s’ant allenare totu paris in is campos de Assèmini cun s’allenadore nou Walter Zenga.

Is ruju-blu ant èssere apretados dae sa gana de giogare, e de fàghere bìdere a is tifosos issoro de àere superadu a beru sa crisi de is meses prima chi si su campionadu si firmaret.

S’iscuadra de s’ex portieri de sa Natzionale at a giogare in su campu òspite de Ferrara, contra sa S.P.A.L. pro proare a bìnchere sa prima partida de su 2020.

Si est possìbile pro sighire a abarrare in su tretu de sa classìfica bonu pro is cualificatziones a sa Liga Europea benidora. Ma immoe sa cosa prus pretzisa pro su mundu de sa botza italianu est cussa de torrare a cumintzare.