Tortolì. Noas malas dae s’Ogiastra. Una persone chi nd’est contoniada dae s’istràngiu, sutaposta a unu tampone, est resurtada positiva a su COVID-19.

Is cunditziones de salude suas non donant pensamentos a is dotores, essende asintomàtica, e immoe diat èssere in cuarantena in domo sua etotu.

Sa Ats at fatu a ischire chi tenet totu suta controllu, e su Comunu de Tortolì at sotadu sa populatzione a respetare is normas in matèria contra s’ispàinu de su coronavirus.

Su servìtziu de igiene pùblica de s’Ats de Lanusè at dispostu pro unu sugetu, domitziliadu in su territòriu cumonale de Tortolì, s’isulamentu domitziliare obligatòriu pro motivu de sanidade pùblica.

Su comunicadu ufitziale de s’Ats- comente at fatu a ischire su Comunu de Tortolì – informat “chi dae unu primu tampone su sugetu est resurtadu positivu a su virus “.

“Si tratat de una persone chi fiat in s’èsteru chi a s’arribu in Sardigna s’est posta deretu in cuarantena, sighende is disponimentos de lege. Istat bene de salude (asintomàtica) e in isulamentu domitziliare” ispiegat s’amministratzione tortoliesa. “Comente su casu s’est presentadu est istadu tratadu in deretura, leende totu is protocollos chi tocat, asseguramus is tzitadinos chi s’Ats tenet sa situatzione suta controllu. Invitamus duncas a sighire sa vida se semper, rispetende però is règulas basilares: istesiamentu sotziale, impreu de mascareddas, igienizatzione de is manos, evitare s’afollamentu de gente. Su sìndigu est a totora in cuntatu cun s’Ats e cun s’Usca (Unidade Ispetziale de Continuidade Assistentziale). Ogni agiornamentu at a bènnere donadu cun is canales istitutzionales de su Comunu. A sa persone interessada auguramus chi coitet a sanare”

Si tratat de su primu casu registradu in Tortolì, chi nos faghet cumprèndere chi a custu inimigu invisìbile est pretzisu a ddi donare semper cuidadu e in su matessi tempus, chi sa responsabilidade de chie arribbat o torrat a Sardigna est fundamentale, pro evitare s’ispainamentu de su virus.

Custu non est s’ùnicu casu de persone positiva a su COVID-19, registradu eris in Sardigna: un’àteru puru in su Comunu de Aristanis.

Immoe est ufitziale: is cuntzertos de ocannu in Sardigna, chi fiant in arriscu, sunt istados cantzellados.

Is ispetàculos sunt brincados pro more de is ùrtimos disponimentos de su guvernu contra s’epidèmia de su COVID-19. Chie est interessadu a iscurtare is nùmenes famados de sa mùsica natzionale e mundiale dd’at a tocare a ispetare a s’annu nou.

Is cuntzertos mannos de Ben Harper, Mika, Tiziano Ferro e Tullio de Piscopo – giustu pro fàghere carchi nùmene – sunt rimandados a s’istade de su 2021.

Sa cosa prus pretzisa est sa seguresa pro su pòpulu sardu e is turistas chi s’isperat ant a lòmpere in s’Ìsula in is meses benentes. Manifestatziones mannas meda, comente custas, difatis podent favorire s’ispàinu de sa pesta malaita de su coronavirus.

Tzertu at a èssere un’istade prus pòvera, sena istellas de sa mùsica. Una làstima a beru, pro ite su cartellone musicale sardu fiat prenu de artistas de bàlia.

E is billetes pro is ispetàculos ant a èssere rimbursados? Cussos de su cuntzertu Tiziano Ferro ant a bàlere pro s’annu chi benit puru.

Galu, no s’ischit nudda pro is billetes de is cuntzertos de is àteros artistas famados. Tra unas cantas dies ant a fàghere ischire calicuna cosa.

A Pula puru, pro sa matessi chistione de su COVID-19, est istadu cantzelladu s’ispetàculu musicale “Notre Dame de Paris”. S’òpera famada, iscrita dae Luc Plamondon cun sa mùsica de Riccardo Cocciante, fiat programmadu dae su 31 de su mese de argiolas a su 2 de austu.

Bonas noas imbetzes pro sa manifestatzione “Time in jazz” de Belchidda, comente at naradu su musitzista Paolo Fresu. Ocannu at a èssere unu fèstival cun prus pagu gente, ma semper una festa de livellu musicale artu meda.

Unu messàgiu bellu meda cussu de su “Time jazz”, in custu tempus in ue sunt cungende totu is festas de is biddas sardas. Una bona ispera pro torrare a lestru a sa vida chi aìamus a in antis de su coronavirus.