Sunt bastados ses casos noos de infetziones pro torrare a pònnere in oriolu sa Tzina.

A pustis de trintaghimbe dies chi non fiat essidu a campu perunu casu a Wuhan, custa coa de chida custos impestados noos sunt donende pensamentu meda a is autoridades tzinesas.

Sa tzitade, connota a dolu mannu pro èssere istada su primu logu acanta su COVID-19 s’est iscasiddadu, est apressibende a parare fronte a un’àteru possìbile epitzentru de sa maladia.

Difatis Wuhan, intro pagu tempus, est pronta a fàghere sa proa de s’àtzidu nuclèicu a totus is 11 milliones de residentes. In custas dies totus is distretos ant dèpidu presentare unu pranu fatu a sa minuda pro evitare chi si torret a presentare s’apretu de cumentzu de annu.

In veridade is dirigentes locales de sa Preventzione e de su Controllu sunt semper abarrados a s’atentu, mancari is resurtados bonos otentos in is meses colados contra su coronavirus.

Su segretàriu locale de su Partidu Comunista, Wang Zhonglin, in s’addòbiu de lunis in sa tzitade tzinesa, at bòlidu torrare a repìtere calicunu cuntzetu.

At naradu chi tocat a crèschere sa cobertura de is proas, tzentralizende su protzessu de verìfica – difatis pro s’ora sa tzitade de Wuhan, chi tenet prus de 11 milliones de abitantes, at fatu unu millione de test ebbia -.

At sighidu narende chi sa vitòria detzisiva no est galu lòmpida e contra custu inimigu invisìbile tocat a poderare semper is ogros abertos.

Su dirigente locale de su partidu, at concruidu narende chi non bisòngiat èssere ispensados, antzis, est a èssere semper abbistos.

Duncas tocat a tènnere unu cumportamentu responsàbile e prudente, bìdidos peri is fatos tristos acontèssidos a Wuhan.

Sa torrada de s’epidèmia in Tzina diat tènnere efetos lègios a beru pro s’economia e pro su morale de totu sa natzione, e in prus podet tènnere cunseguèntzias malas fintzas in is àteros Paisos corfidos meda dae su COVID-19, pròpiu in su momentu chi medas de custos sunt torrende a bellu a bellu a si nde istantargiare.

Un’esèmpiu est s’Itàlia, in ue pro sa chida chi benit ant a abèrrere torra diversos setores produtivos, faghende torrare sùlidu a s’economia de su Paisu, dannificada meda dae su firmu de is ùrtimos meses.

Bonas noas dae sa luta contra su virus Corona: pro sa prima bia a su mundu unu vatzinu candidadu contra su coronavirus nou, at neutralizadu su virus in is tzèlulas umanas.

Comente at decraradu a s’Ansa Luigi Aurisicchio de s’azienda Takis de Pomezia, is anticorpos ingendrados in is sòrighes dae su vatzinu italianu funtzionant.

Is proas sunt istadas fatas in su Spallanzani (su pràpiu istitutu chi at isuladu su virus). Pro is proas subra s’òmine s’at a dèpere isetare a pustis de s’istiu.

Aurisicchio at fintzas decraradu: «Gràtzias a is cumpetèntzias de su Spallanzani, a su chi nd’ischimus, semus is primos a su mundu a àere dimustradu sa neutralizatzione de su coronavirus pro manu de unu vatzinu.

Nos isetamus chi custu acuntessat fintzas in s’òmine. Nois semus faghende totu su possìbile pro more chi unu vatzinu chi naschet dae sa chirca italiana, cun una tecnologia totu italiana e innovativa, bèngiat isperimentadu in Itàlia e postu a disponimentu de totus. Pro lòmpere a custu – at agiuntu– tenimus bisòngiu de su suportu de is istitutziones e de collaboradores chi nos agiudent a atzelerare su protzessu: custa no est una gara e unidos podimus bìnchere totus contra su coronavirus».

«Is resurtados otentos finas a oe lassant ispetu bonu, prus meda de is aspetativas: a pustis de una sìngula vatzinatzione is sòrighes ant isvilupadu anticorpos chi podent firmare s’infetzione de su virus Sars-CoV-2 in is tzèllulas umanas», at naradu Aurisicchio.

A pustis de àere osservadu chi is chimbe vatzinos candidados ingendraiant una cantidade manna de anticorpos, is chircadores ant seberadu is duos vatzinos chi ant donadu is resurtados mègius. Dae su sàmbene ricu de anticorpos est istadu isuladu su suru chi est istadu analizadu in su laboratòriu de Virologia de s’Istitutu Spallanzani. «Aìamus bidu sa cantidade de anticorpos induida, immoe bidimus chi is anticorpos renessent a firmare su virus. S’àteru passu – at agiuntu – at a èssere su de cumprèndere cantu tempus durat sa risposta immunitària».

Totus e chimbe is vatzinos candidados si basant subra su materiale genèticu de sa proteina Spike, sa punta moleculare chi su virus impreat pro intrare in is tzèlulas umanas, e in sa tècnica de s’eletroporatzione, chi cunsistet in un’inietzione in su mùsculu acumpangiada dae un’impulsu elètricu lestru pro fatzilitare s’intrada de su vatzinu in is tzèlulas e ativare in custu modu su sistema immunitàriu.