Noas malas chi interessant su COVID-19 pro sa Repùbblica Pobulare Tzinesa

Sa tzitadina de Suifenhe – localidade ispèrdida de chentumìgia abitantes in su fritu Nordest mantzesu chi tenet medas negòtzios cun sa Rùssia, immoe a dolu mannu est divènnida famada a càusa de su coronavirus.

Mancari sa positzione isulada a làcana cun Sibèria, Suifenhe, est un’epitzèntru nou de s’epidèmia de coronavirus in Tzina , cun 400 casos noos de impestados atzertados.

Su guvernu tzentrale tzinesu s’est mòvidu in deretura mandende duos aeroplanos de càrrigu prenos de istrumentos e forniduras de meighinas pro permìtere de fraigare un’ispidale provisòriu in ue isulare is malàidos.

Sa tzitadina de monte inghiriada dae padentes crosos, però no est s’ùnica a èssere istada corpida dae un’epidèmia noa de coronavirus. Difatis a parte Suifenhe, un’àtera infetzione de COVID-19 s’est iscasidada in Harbin, capitale provintziale de sa zona.

In su cabulogu in totale ddoe tenet 40 persones positivas a su virus, e in s’àrea metropolitana bivent prus de deghe milliones de tzitadinos. Si sa pidèmina s’ispainaret diat èssere unu perìgulu berdaderu pro su Paisu asiàticu de rùere torra in s’emergèntzia, a pustis de su casu de Wuhan.

In prus, brulla de su destinu, sa prima tzitade corpida dae sa maladia est istada torrada a abèrrere una deghina de dies a oe.

Tocat a firmare in deretura s’ispartzinamentu de su coronavirus a Harbin. Dd’ant cumprèndidu bene is responsàbiles de su partidu comunista de sa zona, chi ant retzidu una nota de demèritu pro custos contàgios. Una mancàntzia grave chi at a abbarrare in is fascìculos personales e chi at a pesare meda pro carrieras issoro.

Si narat chi s’epitzèntru de su COVID-19 in Tzina siat dipèndidu dae sa torrada in pàtria de un’istudiante dae is Istados Unidos de Amèrica.

In su mentres sa tzitadina a làcana cun sa Rùssia, Suifenhe, est istada cungiada, coladòrgiu de sa dogana est istadu serradu e totus is tzitadinos tenet s’òbbligu de s’abbarrare acorrados in domo. Ma s’oriolu prus mannu, comente amus giai naradu, est prus che totu pro sa populosa Harbin, chi in custas oras est poderende in pensamentu una natzione intrea.

S’Amministradore Delegadu de sa Apple, Tim Cook, at fatu a ischire ca sa sotziedade sua at donadu belle 7 milliones de dollaros a sa Tzina.

Sa summa, 50 milliones de yuan, at andare a sa sanidade de s’istadu asiàticu. Su rapresentante de su colossu americanu dd’at fatu cun una nota pubblicada in sa retza sotziale Weibo, su Facebook tzinesu.

Sa lassa de sa Apple, partzida in duas partes, est istada firmada in favore de sa Fundatzione tzinesa chi s’òcupat de sa lota a sa poberesa.

Sa prima parte, 20 milliones de yuan, est destinada de is ispidales de s’Hubei, sa provìntzia tzinesa malassortada chi est istada sa prus corfida dae s’epidèmia de Covid-19.

Sa segunda imbetzes, 30 milliones de yuan, est istada donada a sa sanidade de s’istadu asiàticu comente agiudu pro afrontare is meses sighentes e cussos chi ant a bènnere a pustis.

Unu gestu importante, cussu de sa Apple, prus che totu si si cunsiderant is raportos malos tra Istados Unidos e Tzina in su setore istratègicu de sa tecnologia. Bastat a pensare a is brigas tra is duas potèntzias mundiales pro sa chistione de Huawei.

Cook nd’at aprofitau pro bantare s’ispìritu de resistèntzia e resilièntzia mustradu dae su pòpulu tzinesu corfidu dae s’epidèmia de coronavirus. In prus at bòlidu torrare gràtzias a is dutores de sa Repùbblica Pobulare pro su bonucoro e su coràgiu mustrados dutante s’apretu, chi sunt istados de esèmpiu pro su Mundu.

Giai in sa metade de su mese martzu, totu is butegas de sa Apple in Tzina, a pustis de sa serrada pro s’epidèmia de su Covid-19, aiant torradu a abèrrere, fintzas si pro pagas oras a sa die.

Is 42 butegas cungiadas a su cumintzu de freàrgiu coladu sunt istadas torradas a abèrrere cun medas impestu a càusa de is limitatziones severas impostas pro s’atrèmenu de s’infetzione. Giai in sa prima chida de martzu fiant 38 is butegas abertas. Is ùrtimas bator butegas ant torradu a abèrrere in sa metade de su mese coladu, comente si podet lèghere in su situ internet de sa sotziedade americana.

S’epidèmia aiat corfidu meda sa domanda de is produtos a màrchiu Apple in Tzina, cun disacatos graves pro sa sotziedade americana, bida sa mannària de su mercadu tzinesu.