Nudda prus autotzertificatzione pro is ispostamentos tra is Regiones, custu su primu puntu tocadu dae su presidente de su Cussìgiu Giuseppe Conte durante sa direta de immoe pagora.

Sa situatzione, tenta semper suta controllu, donat isperas bonas. Is frutos de sa longa cuarantena, duncas, si bident. Unu detzisione chi non est istada leada a coro ligeri- at naradu su primu ministru – ma a cale s’est arribbados a pustis de s’anàlisi de is nùmeros.

«So bidende meda prègiu e cuntentesa» sighit Conte «pro sa bella istajone. Nos meritamus, a pustis de chidas de sacrifìtzios, allegria e divertimentu».

Non tocat ismentigare però s’importu de is ùnicos duos trastos chi nos podet agiudare in custa fase de abertura: is aparatos de protetzione individuale e su distantziamentu sotziale.

Àtera novidade: s’arribu de turistas europeos in Itàlia sena chi siant sutapostos a cale si siat genia de cuarantena. Medas is Ministros chi sunt traballende sena pasu – ispiegat Conte — pro more chi s’Itàlia si potzat torra istantargiare.

«Sa bellesa de s’Itàlia no est mai andada in cuarantena».

Ma bisòngiat a fàghere is contos cun un’àteru apretu, cussu econòmicu e sotziale. 80 is milliardos postos dae su Guvernu finas a immoe.

«M’iscuso pro is ritardos,» agiunghet «ma non fìamus prontos pro custas erogatziones».

Unu pagu a coromalu su presidente de su cussìgiu at faeddadu de is setores in tribulia manna, comente cussu de s’ispetàculu, su cummèrtziu e su turismu.

Su benidore però est prenu isperu: si traballat in manera contina – agiunghet – pro torrare a promòvere e rinnovare s’Itàlia dae is fundamentas. Unu cumintzu nou: custu est su progetu chi su Guvernu cheret atuare.

Modernidade, digitalizatzione, lestresa: custos is faeddos crae de una ripresa, cussa italiana, chi s’isperat torret a istantargiare totu su sistema, dannificadu meda pro s’apretu coronavirus.

Reduire sa burocratzia, fàghere a manera chi sa banda larga siat sa règula in totu Itàlia. Investire, andare a in antis, segare in ue si podet pro fatzilitare is protzeduras e is tempos mortos. Riformare su sistema fiscale. Cuntrastare is disugualidades e sustentare is persones aorradas.

«Sa summa chi s’Europa at a pònnere a disponimentu de s’Itàlia no at a dèpere abarrare su tesoreto de su Guvernu in càrriga» ispiegat «ma at a èssere una risursa pro totus».

Pro is dies sighentes a Palatzu Chigi sunt istadas medas mentes brillantes, assòtzios, sindacados e gosi sighende: serbint ideas e cussìgios pro atuare custu progetu rivolutzionàriu.

A sa una de note su Guvernadore Christian Solinas at firmadu s’ordinàntzia chi donat inghitzu a sa Fase 2 in s’Ìsula, cunforma a s’ùrtimu Dpcm de su Guvernu natzionale.

Su documentu tenet contu peri de is inditos varados dae sa Cunferèntzias de is Regiones.

S’ordinàntzia si cumponet de 133 pàginas, incruit is documentos cun is lìnias ghia pro sa seguridade in is logos pùblicos e de traballu.

Illustramus in pagos faeddos is novidades printzipales presentes in su provedimentu regionale.

Prima de totu oe su 18 de maju ant a pòdere torrare a abèrrere tzilleris, albergos, ristorantes, logos de cultu e marinas. Is bolos cummertziales dae e pro Casteddu e Terranoa ant a incumentzare dae su 21 de maju, imbetzes pro bìdere s’arribu de is turistas de àteras Regiones italianas at a tocare a isetare finas a su 3 de mese de làmpadas.

Custa at a èssere una data de tènnere bene a mente, bidu s’importu de turismu in s’economia sarda. Chie at a arribbare in Sardigna a in antis de custa die at a dèpere osservare una cuarantena de batòrdighi dies, abarrende isuladu dae su restu de sa populatzione.

In prus, s’ordinàntzia previdet sa possibilidade de tzelebrare is ritos in presèntzia de fideles, a totus is cunfessiones religiosas. Duncas at a èssere possìbile andare a missa a crèsia, abarrende semper a largu is unos de is àteros e limitende su nùmeru de is partetzipantes.

Imbetzes at a tocare a isetare una chida pro pòdere bisitare is museos e is sitos archeològicos de s’Ìsula. Is pischinas e is palestras ant a pòdere abèrrere dae su 25 de maju ebbia, e pro ùrtimos, su 15 de mese de làmpadas, ant a abèrrere is tzìnemas e is teatros.

De pònnere a notu chi is datas de abertura noa de is edifìtzios isportivos e de is logos culturales, in pessu remonados, si uniformant a cussas istabilidas dae su provedimentu de su Guvernu.

E su pòpulu sardu custa Fase 2 comente dd’at pigada?

Oe in die ddoe est istadu unu bellu aumentu de su tràficu, pro su prus in is tzitades de s’Ìsula, cun calicuna filera de màchinas in is artèrias printzipales. Su tempus malu at firmadu is amantiosos de su mare, a càusa de sa proina chi at fatu abasciare is temperaduras.

Cussos chi si bolent annieddigare suta su sole ant a dèpere tènnere galu unu pagu de passèntzia, su tempus bonu at a torrare tra unas cantas dies, ma sena si betare a modde. Difatis, comente at ispetzificadu su Guvernadore Solinas a merie, non ddoe est galu s’autorizatzione pro sa balneatzione. In is istabilimentos balneàrios, a mala bògia, ant a tocare a sighire is protocollos de seguridade, su pròpiu in is marinas lìberas, acanta at a tocare osservare is distàntzias anti COVID-19.