A sa una de note su Guvernadore Christian Solinas at firmadu s’ordinàntzia chi donat inghitzu a sa Fase 2 in s’Ìsula, cunforma a s’ùrtimu Dpcm de su Guvernu natzionale.

Su documentu tenet contu peri de is inditos varados dae sa Cunferèntzias de is Regiones.

S’ordinàntzia si cumponet de 133 pàginas, incruit is documentos cun is lìnias ghia pro sa seguridade in is logos pùblicos e de traballu.

Illustramus in pagos faeddos is novidades printzipales presentes in su provedimentu regionale.

Prima de totu oe su 18 de maju ant a pòdere torrare a abèrrere tzilleris, albergos, ristorantes, logos de cultu e marinas. Is bolos cummertziales dae e pro Casteddu e Terranoa ant a incumentzare dae su 21 de maju, imbetzes pro bìdere s’arribu de is turistas de àteras Regiones italianas at a tocare a isetare finas a su 3 de mese de làmpadas.

Custa at a èssere una data de tènnere bene a mente, bidu s’importu de turismu in s’economia sarda. Chie at a arribbare in Sardigna a in antis de custa die at a dèpere osservare una cuarantena de batòrdighi dies, abarrende isuladu dae su restu de sa populatzione.

In prus, s’ordinàntzia previdet sa possibilidade de tzelebrare is ritos in presèntzia de fideles, a totus is cunfessiones religiosas. Duncas at a èssere possìbile andare a missa a crèsia, abarrende semper a largu is unos de is àteros e limitende su nùmeru de is partetzipantes.

Imbetzes at a tocare a isetare una chida pro pòdere bisitare is museos e is sitos archeològicos de s’Ìsula. Is pischinas e is palestras ant a pòdere abèrrere dae su 25 de maju ebbia, e pro ùrtimos, su 15 de mese de làmpadas, ant a abèrrere is tzìnemas e is teatros.

De pònnere a notu chi is datas de abertura noa de is edifìtzios isportivos e de is logos culturales, in pessu remonados, si uniformant a cussas istabilidas dae su provedimentu de su Guvernu.

E su pòpulu sardu custa Fase 2 comente dd’at pigada?

Oe in die ddoe est istadu unu bellu aumentu de su tràficu, pro su prus in is tzitades de s’Ìsula, cun calicuna filera de màchinas in is artèrias printzipales. Su tempus malu at firmadu is amantiosos de su mare, a càusa de sa proina chi at fatu abasciare is temperaduras.

Cussos chi si bolent annieddigare suta su sole ant a dèpere tènnere galu unu pagu de passèntzia, su tempus bonu at a torrare tra unas cantas dies, ma sena si betare a modde. Difatis, comente at ispetzificadu su Guvernadore Solinas a merie, non ddoe est galu s’autorizatzione pro sa balneatzione. In is istabilimentos balneàrios, a mala bògia, ant a tocare a sighire is protocollos de seguridade, su pròpiu in is marinas lìberas, acanta at a tocare osservare is distàntzias anti COVID-19.

Is datos de is ùrtimos cuntàgios sunt de cunfortu, in is 24 ras coladas sunt istados registrados 3 casos ebbia subra prus de 2 mìgia tampones, duncas si podet pensare chi s’apertura ddoe at a èssere, peri si su Guvernadore at torradu a nàrrere chi custu non depet indoire sa gente a pensare chi sa crisi siat colada. Tocat a evitare chi nche siat una undada noa de cuntàgios.

«Semus istudiende, paris cun su Comitadu tècnicu sientìficu, protocollos chi garantant sa màssima seguresa – at afirmadu su Guvernadore- fintzas in custa fase noa chi no ischimus cantu at a durare e chi a ogna contu ìmplicat una cunvivèntzia cun su virus, e tocat a donare atentu medu. In totu custu tempus amus lassadu abertos medas setores comente su de s’indùstria petrolchimica e sa metallùrgica non ferrosa chi ant depidu adotare mesuras de seguridade e preventzione imponentes e chi ant traballadu sena si firmare e no ant tentu perunu cuntàgiu, sinnu chi si si pòmpiant normas non ddoe at perìgulu perunu».

«At a èssere possìbile torrare a abèrrere is cantieris de is òperas mannas – at sighidu Solinas – chi est unu setore chi cunsentit de traballare sena arriscos mannos. Gràtzias a carchi deroga prefetìtzia, in unos cantos cantieris s’est pòdidu sighire a traballare, e fintzas in custas ocasiones non si sunt registrados cuntàgios, pensamus chi s’atividade edilìtzia in generale, si benit fata rispetende su distantziamentu adeguadu e cun is aparatos giustos, at a pòdere torrare a cumintzare. Amus giai dadu su nulla osta a is traballos de manutentzione e a a su collocamentu de is barriteddos e de is istabilimentos balneàrios e semus analizende una sèrie de àteras atividades chi dae su 4 maju ant a pòdere torrare a abèrrere ».

Su Guvernadore est istadu prus prudente pro s’apertura de portos e aeroportos: «Semus valutende cun su Comitadu tècnicu sientìficu de torrare a abèrrere peri is iscalos de s’ìsula, ma est galu a coidu pro nde faeddare. Pro su chi interessat is ispostamentos dae unu comunu a s’àteru – at concruidu su guvernadore de sa Sardigna- su tema est istadu afrontadu cun unu Dpcm e in unu decretu sunt istadas istabilidas is motivatziones chi permitint is ispostamentos. Su testu nou chi at a dèpere istabilire is règulas noas no est galu definidu, de su 4 e maju pro sa Sardigna paris cun su Comitadu, pensamus chi s’ant a pòdere fàghere is ispostametos ma donende cura e cun totus is aparatos netzessàrios . Dae su 4 de maju is limitatziones ant a èssere prus pagu graes, ma a su mancu is su primu tempus non s’at a pòdere tzirculare sena motivu cuncretu».