Is datos de is ùrtimos cuntàgios sunt de cunfortu, in is 24 ras coladas sunt istados registrados 3 casos ebbia subra prus de 2 mìgia tampones, duncas si podet pensare chi s’apertura ddoe at a èssere, peri si su Guvernadore at torradu a nàrrere chi custu non depet indoire sa gente a pensare chi sa crisi siat colada. Tocat a evitare chi nche siat una undada noa de cuntàgios.

«Semus istudiende, paris cun su Comitadu tècnicu sientìficu, protocollos chi garantant sa màssima seguresa – at afirmadu su Guvernadore- fintzas in custa fase noa chi no ischimus cantu at a durare e chi a ogna contu ìmplicat una cunvivèntzia cun su virus, e tocat a donare atentu medu. In totu custu tempus amus lassadu abertos medas setores comente su de s’indùstria petrolchimica e sa metallùrgica non ferrosa chi ant depidu adotare mesuras de seguridade e preventzione imponentes e chi ant traballadu sena si firmare e no ant tentu perunu cuntàgiu, sinnu chi si si pòmpiant normas non ddoe at perìgulu perunu».

«At a èssere possìbile torrare a abèrrere is cantieris de is òperas mannas – at sighidu Solinas – chi est unu setore chi cunsentit de traballare sena arriscos mannos. Gràtzias a carchi deroga prefetìtzia, in unos cantos cantieris s’est pòdidu sighire a traballare, e fintzas in custas ocasiones non si sunt registrados cuntàgios, pensamus chi s’atividade edilìtzia in generale, si benit fata rispetende su distantziamentu adeguadu e cun is aparatos giustos, at a pòdere torrare a cumintzare. Amus giai dadu su nulla osta a is traballos de manutentzione e a a su collocamentu de is barriteddos e de is istabilimentos balneàrios e semus analizende una sèrie de àteras atividades chi dae su 4 maju ant a pòdere torrare a abèrrere ».

Su Guvernadore est istadu prus prudente pro s’apertura de portos e aeroportos: «Semus valutende cun su Comitadu tècnicu sientìficu de torrare a abèrrere peri is iscalos de s’ìsula, ma est galu a coidu pro nde faeddare. Pro su chi interessat is ispostamentos dae unu comunu a s’àteru – at concruidu su guvernadore de sa Sardigna- su tema est istadu afrontadu cun unu Dpcm e in unu decretu sunt istadas istabilidas is motivatziones chi permitint is ispostamentos. Su testu nou chi at a dèpere istabilire is règulas noas no est galu definidu, de su 4 e maju pro sa Sardigna paris cun su Comitadu, pensamus chi s’ant a pòdere fàghere is ispostametos ma donende cura e cun totus is aparatos netzessàrios . Dae su 4 de maju is limitatziones ant a èssere prus pagu graes, ma a su mancu is su primu tempus non s’at a pòdere tzirculare sena motivu cuncretu».

Ant a pòdere torrare unu pagu de bentu medas famìlias sardas in dificultades càusa de sa difusione de su COVID-19.

Sa regione at postu a disponimentu una bella summa de dinare pro parare fronte a una situatzione epocale drammàtica chi bona parte de sa populatzione isulana est bivende.

Su Cussìgiu regionale de sa Sardigna at aprovadu a manera comuna su DL 126/A “Medidas istraordinàrias apretosas pro agiudare sas famìlias a afrontare s’apretu econòmicu – sotziale causadu dae sa pandemia”.

Su provedimentu previdet unu contributu de 800 èuros a su mese, pro duos meses, a cada nùcleu familiare residente in Sardigna sena rèditu o chi, a pustis de s’apretu Covid-19, s’agatet in s’impossibilidade de prodùere rèditu. Pro sas famìlias cun medas fìgios, cun prus de sos tres personas, est prevìdida una summa de 100 èuros in prus a persone.

Comente giai mentovadu, sas fortzas polìticas de majoria e opositzione de s’assemblea regionale, ant votadu cumpatas a s’aprovatzione de custas medidas istraordinàrias. In custu momentu, sas brigas tra partidos sunt istadas postas a una banda, e s’est traballadu unidos pro agatare un’acòrdiu.

Su provedimentu tenet una cobertura de 120 milliones de èuros. Sas risursas ant a èssere trasferidas a sos comunos chi s’ant a ocupare de intregare su dinare cunforma sos critèrios istabilidos dae sa Giunta Regionale.

Pro custas mesuras, pigadas dae su Cussìgiu Regionale pro parare fronte a sas dificultades econòmicas de sas famìlias sardas, Matteo Salvini at fatu sos cumplimentos a Christian Solinas pro sos 120 milliones postos a disponimentu.

Su capu de sa Lega at torradu a espressare s’istima sua a su Presidente de sa Regione Sardigna, binchidore de sas ùrtimas eletziones sardas gràtzias fintzas a s’alleàntzia cun su partidu de su Carroccio.

«In s’ora chi su guvernu ponet 400 milliones ebbia pro totus sos italianos, sa Regione Sardigna ponet 120 milliones pro sos tzitadinos suos ebbia, cun 800 èuros a familiare. Orgugliosu de sos sìndigos e guvernadores nostros, dae Nord a Sud».

Custos sos faeddos de Salvini, pubblicados dae s’ufìtziu de Imprenta de sa Liga in Senadu.