Dae sa chida benente at a èssere possìbile andare a su tzilleri a si pigare su cafè, papare in ristorante o comporare unu bestire in butega.

Su pròpiu s’at a pòdere andare dae su barbieri pro si nde segare is pilos o a mare a pigare su sole.

Difatis custa chida at a arribbare s’ordinàntzia noa chi at a permìtere s’abertura de medas atividades cummertziales.

Su Presidente de sa Regione Christian Solinas, at naradu chi prima de firmare su provedimentu bolet ispetare chi siat formalizados is protocollos Inail e su decretu de su Guvernu.

Ma si non ddoe ant a èssere sorpresas a s’ùrtimu momentu, su Guvernu at donadu a is Regiones s’ampramanu pro permìtere s’aviu de is atividades econòmicas.

Tocat a nàrrere chi is assòtzios de categoria e is entes locales non sunt de acòrdiu cun is lìnias ghia adotadas dae su guvernu. Difatis custos disponimentos sunt istados criticados pro ite a bias non tenet perunu sentidu e in prus sunt prenos de burocratzia.

Pro esèmpiu in is ristorantes su tretu chi si depet lassare tra una mesighedda e s’àtera est ispropositadu, comente s’òbligu de sanificare a totora su locale.

Si is inditos de sighire diant a dèpere abarrare custos, si diat arriscare unu fallimentu de su setore de sa ristoratzione, cun paritzas pèrdidas econòmicas. Su prus de is atividades piticas ant a èssere custrintas a lissentziare is dipendentes, o peus a cungiare totu.

Fintzas su setore de sa bestimenta non diat èssere a tretu de bajulare is costos de is imponimentos noos, comente sa sanificatzione de is bestires a pustis de ogni proa.

Su pròpiu arresonu pro is pilucheris e barbieris, chi ant a dèpere igienizare de cantora sa butega e is ainas de traballu

Peri su nùmeru limitadu is clientes, pro custas partidas iva, diat pòdere causare medas pèrdidas.

Is assòtzios de categoria e is entes locales pedint prus critèriu in s’aplicatzione de is lìnia ghias de custa fase noa de abertura.

Non mancant fintzas is rechertas a su Guvernadore Solinas de predispònnere provedimentos chi potzant permìtere a is siendas piticas de andare a dae in antis e de non serrare.

Tra sas prus importantes: finantziamentos a fundu pèrdidu, moratòria pro is pesones, isgràvios econòmicos pro is partes non copidas dae is interventos istatales, iscantzellamentu de is derramas e de is bulletas pro is meses chi is atividades fiant cungiadas, e s’apoderamentu de is ammortitzadores sotziales finas a cando at a acabbare s’apretu de su COVID-19.

Is datos de is ùrtimos cuntàgios sunt de cunfortu, in is 24 ras coladas sunt istados registrados 3 casos ebbia subra prus de 2 mìgia tampones, duncas si podet pensare chi s’apertura ddoe at a èssere, peri si su Guvernadore at torradu a nàrrere chi custu non depet indoire sa gente a pensare chi sa crisi siat colada. Tocat a evitare chi nche siat una undada noa de cuntàgios.

«Semus istudiende, paris cun su Comitadu tècnicu sientìficu, protocollos chi garantant sa màssima seguresa – at afirmadu su Guvernadore- fintzas in custa fase noa chi no ischimus cantu at a durare e chi a ogna contu ìmplicat una cunvivèntzia cun su virus, e tocat a donare atentu medu. In totu custu tempus amus lassadu abertos medas setores comente su de s’indùstria petrolchimica e sa metallùrgica non ferrosa chi ant depidu adotare mesuras de seguridade e preventzione imponentes e chi ant traballadu sena si firmare e no ant tentu perunu cuntàgiu, sinnu chi si si pòmpiant normas non ddoe at perìgulu perunu».

«At a èssere possìbile torrare a abèrrere is cantieris de is òperas mannas – at sighidu Solinas – chi est unu setore chi cunsentit de traballare sena arriscos mannos. Gràtzias a carchi deroga prefetìtzia, in unos cantos cantieris s’est pòdidu sighire a traballare, e fintzas in custas ocasiones non si sunt registrados cuntàgios, pensamus chi s’atividade edilìtzia in generale, si benit fata rispetende su distantziamentu adeguadu e cun is aparatos giustos, at a pòdere torrare a cumintzare. Amus giai dadu su nulla osta a is traballos de manutentzione e a a su collocamentu de is barriteddos e de is istabilimentos balneàrios e semus analizende una sèrie de àteras atividades chi dae su 4 maju ant a pòdere torrare a abèrrere ».

Su Guvernadore est istadu prus prudente pro s’apertura de portos e aeroportos: «Semus valutende cun su Comitadu tècnicu sientìficu de torrare a abèrrere peri is iscalos de s’ìsula, ma est galu a coidu pro nde faeddare. Pro su chi interessat is ispostamentos dae unu comunu a s’àteru – at concruidu su guvernadore de sa Sardigna- su tema est istadu afrontadu cun unu Dpcm e in unu decretu sunt istadas istabilidas is motivatziones chi permitint is ispostamentos. Su testu nou chi at a dèpere istabilire is règulas noas no est galu definidu, de su 4 e maju pro sa Sardigna paris cun su Comitadu, pensamus chi s’ant a pòdere fàghere is ispostametos ma donende cura e cun totus is aparatos netzessàrios . Dae su 4 de maju is limitatziones ant a èssere prus pagu graes, ma a su mancu is su primu tempus non s’at a pòdere tzirculare sena motivu cuncretu».