“Proite sos italianos in s’istade imbetzes de s’Egitu non sèberant sa Sardigna?”. L’at naradu Vittorio Sgarbi chi in prus at agiutu: “Diant pòdere andare a Budelli!”. Làstima però chi s’arenile cun s’arena rosa est serrada a sa balneatzione.

 Su crìticu de arte Vittorio Sgarbi no amat sas marinas de s’Egitu e preferit sas de sa Sardigna, in particulare sa marina rosa de Budelli. Su post suo de promotzione turìstica de sa Gaddura però s’est trasformadu in una polèmica manna, sende chi in sa famada marina maddalenina no est prus possìbile fàghere su bagnu, ma si podet petzi ammirare.

Totu est cumintzadu cando Vittorio Sgarbi in sa pàgina ufitziale sua at iscritu “so leghende chi ocannu medas italianos andant a su mare in Egitu. Ma deo mi dimando: proite un’italianu si nde depet andare a Sharm el-Sheikh sbiende totu sas bellesas chi tenet in domo? No, gràtzias. Ma est meda mègius Caorle (Vènetu), Sampieri (Ragusa), Arcomagno (Calàbria) o sa Marina Rosa de Budelli in Sardigna”. Su crìticu de arte, duncas, at postu una fotografia de Budelli, bolende in custa manera  omaggiare sa bellesa de sa marina de s’arcipelagu de Sa Madalena.

Diversos impitadores però l’ant fatu notare in deretura chi cussa localidade sarda, oramai dae belle trinta annos, est serrada a sa balneatzione. A Budelli difatis non si podet prus atzèdere, nemancu cun sa barca. Dae su 1994, annu de istitutzione de su Parcu Natzionale de s’Artzipèlagu de sa Madalena, in cussa marina est proibidu s’atzessu, su trànsitu, sa pàsida e sa balneatzione, a càusa de su peoramentu (e de sas furas) de s’arena sua. Difatis, pro more de is furones de arena, ma peri pro more de su turismu massivu, s’arena rosa fiat isparende, e tando sas autoridades ant detzidu de proibire de su totu s’atzessu a cussa marina, pro permìtere de la preservare e la protègere. S’arenile faghet a ammirare petzi a unos 70 metros dae s’oru de mare.

 “Progetto finanziato con l’Avviso Pubblico IMPRENTAS annualità 2021-2022”

Premiadas in Casteddu sas menzus star-up de sa Sardigna: eredidades digitales,imballazzos de licoritzia e frores a tennologia arta.

A sa Manifattura Tabacchi de Casteddu sunt bistadas premiadas sas menzus start-up de sa Sardigna in su mentres de s’edissione 2025 de su SIOS Startupitalia Open Summit, s’abbenimentu chi donz’annu assortat impresarios,imbestidores, innoadores e appassionados de tennologia. Su filu chi conduit de cust’annu, “HUMANS – Su Tempus benidore est Umanu” at ghiadu unu cunsideru tottu paris supra s’appitzicu intre mezoru tennologicu e tzentralidade de sa pessona.

Supra su cataffale est pigada Zephorum, sa prima peagna dedicada a sa organissasione, controllu e cummemorassione de s’eredidade digitale. Su disignu permittit de ordiminzare itte at a sutzedere a sos temas insoro online pustis de sa morte: dae sa possibilidade de disparrere de su tottu dae su web, fintzas a s’isseberu de dassare un’ammentu digitale chi duret in su tempus, fintzas po ingendras.

Intre sas finalistas puru Bloomlabs, una solussione noa po su campu de sos frores fundada supra s’intelligentzia artifiziale e machine learning. Sa Start-up accomettat problemas comente s’istagionalidade, s’organissassione cumplessa e s’accreschimentu de sos pretzios, gratzias a algoritmos chi regulant in manera automatica sas cundissiones de su clima in sos tenimentos a s’inserru, permittinde una semenadura de frores po tottu s’annu.

At alcansadu attentzione meda fintzas Alkelux, chi isfroscat bio-additivos anti microbici po imballazzos de sa cosa de pappare partinde dae sos arrefudos dae sas mattas de sa licoritzia. Sa tennologia permittit de allongare sa costoidura de sa cosa de pappare comente frutta e pane, dande unu contribbudu po minimare meda sos isperdissios.

S’edissione 2025 de su SIOS at creffidu evidentziare comente s’intelligentzia artifitziale, s’internet of Things, sa realidade accreschida e atteras tennologias chi sunt naschinde potant mustrare no solu istrumentos de cambiamentu, ma fintzas levas po s’incluisione sotziale e su mezoramentu de sa calidade de sa vida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22