Forsis sa sorte est giai iscrita dae cando naschimus.

Sa morte de Paolo Sedda, un’òmine de 48 annos de Gavoi, assistente capu assestadore de sa Politzia de Istadu, in servìtziu in s’Iscuadra Mòbile de Nùgoro, est capitada a pustis de èssere intradu a modde in s’abba pro bisitare una gruta a Cala Luna, in su tretu de costa tra Baunei e Durgali.

Unu logu chi Sedda connoschiat bene, pro ite fiat un’òmine pràtigu de andare suta de s’abba a profundidades mannas meda. Sa die malaita fiat paris cun àteros tres cumpàngios e un’istrutore, ma a s’ora de nde essire a foras, Paolo non s’est bidu prus.

Is amigos, in deretura ant donadu s’avisu a is autoridades pro chircare de sarbare su cumpàngiu chi fiat abarradu in sa gruta.

Sa Capitaneria de su portu de Arbatassa est intervènnida cun is primos somotzadores de is Vìgiles de su Fogu, chi ant cumintzadu sa chirca de s’òmine ispèrdidu. Fatu fatu àteras iscuadras de sucurridores, su giòbia sero fintzas a ora de note, sunt intrados in sa gruta, ma pro de badas. Su gavoesu no est istadu agatadu.

S’ispera fiat chi su politziotu èsseret renèssidu a si sarbare in calicunu nitzu cun àera pro pòdere alidare. Ma no est capitadu nudda de custu: su chenàbura a merie su corpus de s’isfortunadu Sedda est istadu agatadu sena vida.

Fiat in su fundu de sa gruta a 15 metros de profundidade, in un’istrintòrgiu prus a suta de ue is cumpàngios dd’aiant bidu s’ùrtima borta.

Comente s’est ischida sa noa mala de sa morte de su gavoesu, is ispàtzios sotziales si sunt prenos de ambasciadas de dolu e de condulèntzias de connoschentes e de àtera gente puru.

Su sindacadu de is politziotos at chertu regordare su collega mortu cun paràulas càrrigas de sentidu, pro un’òmine chi at a mancare a totus.

Galu non s’ischit comente est capitada custa disgràtzia manna chi at fatu pèrdere sa vida a Paolo Sedda. Diat a pòdere èssere chi apat tentu unu mancamentu o chi apat pèrdidu s’orientamentu. Calicuna cosa at a essire a campu a pustis de s’otomia e dae is relatziones de is espertos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Comintzat a apessamentare sa crèschida de is casos de Covid-19 in s’Ìsula.

Cun 16 persones positivas a su Covid, de is cales una deghina contagiadas dae sa variante Delta, e 50 in cuarantena, a Usini, in provìntzia de Tàtari, su livellu de atentzione restat artu e su sìndigu Antonio Brundu pròrogat is limitatziones finas a su 19 de onniasantu.

A su presente abbarrant firmas note e die totus is atividades de ispetàculu, musica, dantza e teatru, siat in logos serrados siat as’abertu, e abbarrat proibida sa suministratzione de cosa de bufare alcòlicas de asportu a pustis de is 22, mesuras adotadas su 5 de argiolas coladu a pustis de s’iscoberta de un’epitzentru epidèmicu de sa variante Delta de su virus in bidda.

In acòrdiu cun s’Ats Sardigna est istada fata in deretura una campagna de controllu, cun 537 tampones chi ant iscoviadu duos positivos noos.

Comente at ispiegadu su sìndigu usinesu, tentu contu de s’iscassa tzirculatzione virale e de èssere resèssidos a atremenare pro s’ora sa cadena de su contàgiu, s’at a pòdere evitare de impreare àteras mesuras graes e dannosas in custu momentu de dificultade.

Su pesu de is infetziones de virus SarsCoV2 est creschidu belle in totu is regiones – 19 – e, in oto de custas sa crèschida de cada chida est istada de prus de su 50%: est sa mapa chi nde istupat dae is balores postos in su giassu CovidTrends, chi dae meses sighit s’andamentu de s’epidèmia de Covid-19 in Itàlia.

Nde essit a campu una mapa s’Itàlia in biancu e nieddu in ue sa situatzione est diversa meda. Segundu is datos, agiornados a s’11 de argiolas, in s’ùrtima chida est istadu su Molise a registrare sa crèschida majore, cun su 257%, posca sa Sardigna (+146%) e su Vènetu (123%); sighint a distàntzia, cun balores superiores a su 50%: Làtziu (+84%), Ligùria (+71%), Emìlia Romagna,Toscana e Campània (+56%).

Àteras sete regiones ant registradu una crèschida cumprèndida tra su 20% e su 50%: provìntzia autònoma de Boltzanu (+48%), Lombardia (+43%), Calàbria (+40%), Sitzìlia (+36%), Marche (+33%), Umbria (+32%), Piemonte (+26%). Su pesu in s’ùrtima chida est istada inferiore a su 20% in Friuli-Venètzia Giùlia (18%), Pùglia (+17%), Abrutzu (13%) Basilicata (+8%), cun sa provìntzia autònoma de Trentu e sa Badde de Aosta, chi registrant crèschidas negativas de -24% sa prima e de -46% sa segunda.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”