Is Asulos sunt is Campiones de Europa.

Custa est sa segunda vitòria de su torneu pro natziones de su continente, a pustis de cussa de su 1968 a is tempos de Fachetti, Mazzola, Riva e Rivera, giustu pro nomenare calicunu giogadore balente de tando.

Una copa chircada in su 2000 contra sa Francia e in su 2012 contra s’Ispagna, ma totu e is duas is bortas s’Itàlia at perdidu sa finale.

Non custa bia però, cun is òmins de Mancini chi sunt renèssidos a bìnchere contra s’Inghilterra a Wembley.

Una partida istragosa meda, cun sa rete marcada de is inglesos, a pustis una pariga de minutos dae su frùsciu de s’àrbitru. Difatis su terzinu Shaw, a pustis de tres minutos, at fatu gol pro more de Di Lorenzo chi no dd’at frimadu e Donnarumma no at cungiadu bene su primu palu.

Gràtzias a su vàntagiu de 1-0, is meres de domu ant istronadu s’Itàlia, chi casi pro totu su primu tempus no est renèssida a intrare in partida e a portare is òmines suos a in antis.

Pro bona sorte sua s’Itàlia at mantèsiu sa defensa, cun Chiellini e Bonucci chi no ant lassadu tretu a su capitanu inglesu Kane, semper prontu pro fàghere gol. S’allenadore Mancini s’est ispramadu candu s’est ingortu su regista de s’iscudra asula, Jorginho. Imbetzes su giogadore de su Chelsea at istrintu is dentes e est abbaradu in campu.

Su segundu tempus est istadu un’àtera partida pro sa natzionale italiana, cun Mancini chi in s’ispozadòrgiu est istadu capatzu de tocare is cordas giustas de is giogadore, chi sunt torrados in su rètangulu birde comente dimónios. Sunt serbidos is càmbios puru: cun Belotti chi est intradu a su postu de Immobile e Cristante chi at remplassadu a Barella.

Difatis ant cungiadu is inglesos in s’area issoro e a pustis de medas ocasiones, Bonucci est renèssidu a marcare sa rete de su parègiu un’atzione in mìscia.

A pustis de custu gol su resurtadu però no est cambiadu, si non cun is rigores chi ant decraradu s’iscudra binchidora.

Dae is ùndighi metros, gràtzias a Donnarumma chi at paradu duos tiros, sa Natzionale est torrada Campione de Europa a pustis de 53 annos, e in Itàlia est cumintzada sa festa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Non s’acumprit su bisu de Matteo Berrettini: bìnchere Wimbledon e conchistare su tìtulu prus disigiadu de su tennis mundiale.

Su disafiu tra s’italianu, rivelatzione de su torneu e primu asulu de s’istòria a arribbare a finale, e su pluricampione Novak Djokovic s’est concruidu comente si pensaiat: at bintu su favoridu.

Djokovic at bìnchidu pro 1-3: su tennista serbu, chi aiat giai bintu in su 2019, ùrtima editzione prima de su Covid, at ugualadu in custu modu a Roger Federer e a Rafa Nadal, e immoepnnat a ugualare su primadu de Rod Lacer de su 1969: bìnchere totus e bator is torneos prus importantes in un’annu solare, fàghere su Slam Mannu.

Berrettini s’est dèvidu arrèndere a Novak Djokovic, pro ses bias campiones in Wimbledon: su tennista serbu, nùmeru 1 a su mundu, difatis at iscunfitu s’italianu, a sa prima finale in s’erba de su torneu londinesu mai giogada dae un’asulu, in bator set gherrados meda (6-7, 6-4, 6-4, 6-3).

Derrotende a Berrettini in finale, su serbu Djokovic at conchistadu su de binti tìtulos suos de su slam mannu, ugualende su primadu de Federer e de Nadal.

Djokovic tenet fintzas sa possibilidade de conchistare in su matessi annu is bator tìtulos printzipales, marrania in campu maschile, non benit acumprida dae unu tennista dae prus de mesu sèculu.

Contra unu Djokovic gasi, no est bastadu, pro s’italianu, mancu unu servìtziu supersònicu: durante sa partida contra su nùmeru unu de su mundu una prima botza de s’asulu at tocadu is 222 km/h. No est unu primadu, ma est una velotzidade manna meda, meda prus arta de cussa de ‘aversàriu suo chi est lòmpida a a 199.

Ma su chi prus faghet ispantu est sa continuidade, chi nde essit a campu dae sa lestresa mèdia de is batutas suas: 203 contra 185, galu prus craru in is segundas de servìtziu (arma prus potente de Berrettini): 173 km/h, contra is 141 de Nole.

Datos chi, in prus de cunfirmare chi Berrettini tenet una de sas armas suas prus eficatzes in su servìtziu, dimustrant fintzas chi Djokovic, tra sos medas puntos de fortza suos, tenet sa capatzidade de rispòndere a servìtzios potentes comente a cussos de Berrettini.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”