Mancant pagas dies a sa finale de Wembley, pro su disafiu Itàlia-Inghilterra chi tifosos de is duos Paisos sunt ispetandu cun ariolu.

Duas iscuadras chi in su caminu issoro ant dimustradu semper unidade e fortza in defesa, cun is giogadores prontos a gherrare in ogna botza.

Is duos allenadores, Mancini e Southgate, ant preparadu bene meda is Europeos e seberadu òmines bonos pro su giogu chi teniant in conca.

Tzertu sa natzionale de is tres liones at a falare in campu tra is muros amigos, cun su prus de is tifosos chi at a tifare pro fàghere torrare una copa internatzionale in terra inglesa a pustis de su Mundiale bìnchidu in su 1966.

Is Asulos però ant a bèndere sa pedde a caru prètziu e ant a proare a ruinare sa festa a is inglesos. Tocat sempres a pensare chi in su retàngulu birde s’ant a afrontare ùndighi òmines pro ognuna iscuadra, duncas mancari s’Istàdiu de Wembley at a èssere un’inferru pro sa natzionale italiana, at a pòdere capitarede totu.

Su perìgulu prus mannu pro s’Itàlia at a èssere su capitanu de is inglesos Kane, chi in is ùrtimas garas at marcadu una pariga de retes. Pro cussu, sa còpia de su tzentru de sa defensa asula, formada dae Chiellini e dae Bonucci diant fàghere una guàrdia bona a beru.

Diat tocare a betare un’ograda a Sterling, s’atacante esternu chi est meda lestru e difìtzile de frimare, ma semus seguros chi Mancini at pensadu calchi cosa pro cungiare bene is ispàtzios pro lòmpere a is partes de Donnarumma.

S’Itàlia imbetze at a iscumìtere a pitzu de is tres atacantes, cun Chiesa e Insigne semper abistos cus is tiros dae foras de s’àrea de rigore, e cun s’ispera chi Immobile in custa partida potzat torrare a marcare su gol comente nos at abituadu in Sèrie A, in ue s’annu coladu at bìnchidu su cosìngiu de oru.

De seguru Verratti, Jorginho e Barella – is tres de tzentrucampu – ant a fraigare su giogu pro s’Itàlia, e Donnarumma at a èssere prontu si èsseret a lòmpere a is rigores.

Amus a bìdere comente at a acabare sa partita domìniga: isperamus de torrare a festare comente in su 1968.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

S’Itàlia est renèssida a bìnchere contra s’Ispagna, in una partida chi pro is òmines de Roberto Mancini est istada istragosa

Difatis, pro casi totu sa gara, s’iscuadra italiana at patidu su bellu giogu de is aversàrios, chi cun sa botza a tzentrucampu ant dominadu sa partida.

Cun unu pagu de sorte, is Asulos ant agatadu sa rete de su vantàgiu gràtzias a Chiesa – a su 60′ minutu – chi est istadu bravu a marcare s’unu a zeru cun una isticada de pee.

Finas a cussu momentu is ispagnolos sunt istados perigulosos meda, cun su giogadore Olmo, ischieradu farsu noe, a fàghere ammachiare is difensores italianos. In una pariga de bortas est istadu Donnarumma a cungiare sa porta e a sarbare su resurtadu.

S’ex portieri de su Milan però no at pòdidu fàghere nudda contra s’atzione cuncordada de Olmo e Morata, cun s’atacante de sa Juventus chi at marcadu sa rete de su parègiu pro s’unu a unu a s’80′ minutu.

Is tempos suplementares no ant cambiadu su resurtadu, ma sunt serbidos is rigores pro decrarare sa primu iscuadra chi s’at a giogare sa finale de is Europeos.

Comente a semper is tiros dae is ùndighi metros sunt istados una loteria, chi custa bia at premiadu s’Itàlia. Olmo, s’òmine mègius in campu at isbagliadu su rigore iscutu a pitzu de sa traversa, comente su matessi Morata, chi s’est fatu parare sa botza dae Donnarumma. Pro sa natzionale italiana s’ùnicu a non fàghere gol est istadu su tzentrucampista Locatelli, imbetzes sa rete detzisivas dd’at marcada Jorginho.

Su resurtadu finale de chimbe a tres at promòvidu is òmines de Mancini a si giogare sa finale a Wembley contra s’Inghilterra chi ant a èssere is meres de domo.

In inglesos ant bìnchidu a is suplementares contra sa Danimarca, gràtzias a unu rigore de Kane, chi su portiere aversàriu a parare est renèssidu, ma no at pòdidu nudda in sa respinta de su capitanu de s’iscuadra de is tres Liones.

Dòminiga amus a ischire chie at a èssere s’iscuadra campione de s’Europa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”